Zezi nin i sɔnnzɔnfuɛ’m be fɛli kpa jenvie’n su lɔ. Sanngɛ kɛ be juli ce’n su lɔ’n, be fiteli bian nɲɔn mɔ be yo sro kpa’n, be su. Mmusu’m be kle bian nɲɔn sɔ’m be yalɛ. Yɛ be yo wlɛ kpa. Be fin asieliɛ kun su, be wanndi bali Zezi i wun lɛ. Ndɛ nga Marki nin Liki be klɛli’n nun’n, be fa e ɲin sie i sran nɲɔn sɔ’m be nun kun su. Afin atrɛkpa’n, sran sɔ’n yo wlɛ kpa trɛ i wiengu kun’n, kpɛkun mmusu’m be o i su w’a cɛ kpa.

Bian sɔ’n ti afɛfuɛ kpa. Ɔ fɛ i wun kplɛn’n yɛ ɔ fa wlan-ɔn. Kɔnguɛ nin wia nun’n, “ɔ o asieliɛ nin oka’m be su. Ɔ kpankpan, kpɛkun ɔ fa yɔbuɛ mun kpɛkpɛ i wunnɛn’n.” (Marki 5:5) I wlɛ m’ɔ yo’n ti’n, sran’m be sinman atin ng’ɔ o asieliɛ’n i wun lɛ’n su. Afin srɛ kun be. Sran’m be fali jrɔkɔ be cili i, yɛ be boli i kpanwun. Sanngɛ ɔ kpɛkpɛli jrɔkɔ’m be nun, kpɛkun ɔ bubuli kpanwun’m be nun. Sran fi i wunmiɛn’n jumɛn i liɛ’n nun, naan se kɛ ɔ́ cí i.

Bian sɔ’n ɔli Zezi i wun lɔ naan w’a koto i bo. Kpɛkun mmusu nga be kle i yalɛ’n, be yoli maan ɔ kpan seli kɛ: “?Zezi, Ɲanmiɛn m’ɔ o like kwlaa ti su’n i Wa, ngue yɛ a bɛ i yolɛ-ɔ? Ta nda Ɲanmiɛn ɲrun kɛ a su kleman min ɲrɛnnɛn.” Zezi kusu kleli kɛ ɔ kwla mmusu mun. Ɔ seli kɛ: “Mmusu, jaso bian’n su.”​—Marki 5:7, 8.

Nán mmusu kunngba cɛ yɛ ɔ kle bian’n i yalɛ-ɔ. I sɔ’n ti’n, kɛ Zezi usɛli i kɛ: ‘?Be flɛ wɔ sɛ’n?’, mmusu’n tɛli i su kɛ: “Be flɛ min Akpingbin, afin e sɔnnin kpa.” (Marki 5:9) Mmusu sɔ mɔ be sɔnnin kpa’n, be bo ti kun be kle bian’n i yalɛ. Yɛ kɛ bian’n wun i ɲrun’n, ɔ yo be fɛ. Be srɛli Zezi kɛ “nán ɔ se be kɛ be wɔ kunman dan mɔ be simɛn i bo’n nun.” Afin be si sa nga cɛn wie lele’n ɔ́ wá jú be nin be si Satan’n su’n.​—Liki 8:31.

Kɛ ɔ́ yó sɔ’n, nn kɔkɔti akpi nɲɔn (2.000) be o lika sɔ’n nun lɛ be su didi. Ɲanmiɛn Mmla’n waan kɔkɔti’m be ti fiɛn naan ɔ fataman kɛ Zuifu’m be ta wie. Mmusu’m be seli Zezi kɛ: “Man e atin naan e ko wlu kɔkɔti’m be nun.” (Marki 5:12) Yɛ ɔ mannin be atin-ɔn. Ɔ maan be ko wluli kɔkɔti’m be nun. Kɔkɔti akpi nɲɔn mun (2.000) be kwlaa kpan be fin kpɔlɛ fleiin’n su lɔ be guali jenvie’n nun naan b’a mlɔn.

 Kɛ kɔkɔti’m be sunianfuɛ’m be wunnin sa ng’ɔ juli’n, be wanndi ɔli klɔ’n nin nanmue’m be nun be ko kan kleli lɔfuɛ mun. Ɔ maan sran’m be bali be wa niannin sa ng’ɔ juli’n. Kɛ be juli lɛ’n, be wunnin bian nga mmusu’m be kle i yalɛ laa’n. I ɲin su w’a klo. I kpa bɔbɔ’n, w’a wla tralɛ, yɛ ɔ ti Zezi i wun lɛ.

Be nga be wunnin bian’n annzɛ be tili sa sɔ’n, srɛ kunnin be dan kpa. Afin be siman like nga Zezi wá yó i be klɔ’n su ekun-ɔn. I sɔ’n ti’n, be srɛli Zezi kpa kɛ ɔ jaso be mɛn’n nun naan ɔ wɔ. Kɛ Zezi fuli alie’n nun’n, bian nga mmusu’m be kle i yalɛ laa’n, ɔ srɛli i kɛ ɔ nin i bé kɔ́. Sanngɛ ɔ seli bian’n kɛ: “Kɔ ɔ osufuɛ’m be sin. Ko kan sa kwlaa nga Zoova yo mannin wɔ’n, ɔ nin aunnvuɛ ng’ɔ sili wɔ’n, be ndɛ kle be.”​—Marki 5:19.

Titi’n, kɛ Zezi yo sran’m be juejue’n, ɔ se be kɛ nán maan be bo su kle sran. Afin ɔ kunndɛman kɛ bewanbewan ndɛ’m be su yɛ sran’m be jran be lafi i su-ɔ. Sanngɛ bian nga mmusu’m be kle i yalɛ laa’n i liɛ’n, Zezi seli i kɛ ɔ bo su kle sran uflɛ. Afin i bɔbɔ kwla di lalo se kɛ Zezi kwla mmusu mun. Kpɛkun ɔ kwla kan Zezi i ndɛ kle be nga Zezi bɔbɔ kwlá juman be wun lɔ’n. Yɛ sɛ sran’m be su kan wafa nga kɔkɔti’m be wuli’n i ndɛ naan be kpɛ wie gua nun’n, bian sɔ’n kwla kan wafa nga sa sɔ’n yoli’n, i ndɛ sɛsɛsɛ. Yɛ bian’n ɔli-ɔ. Kpɛkun ɔ ko kannin sa kwlaa nga Zezi yoli mɛnnin i’n i ndɛ Dekapɔlu mɛn’n nun.