Jam afe da yange beyé’é mvuse ya jame ba te tôbane de e mañ, éyoñe ba suane kindik. Bôte bebaé be to angôndô ya ngul ba so vôme mesoñ me né, bese bebaane be to njalan a mimbia minsisim, a ba ke mbil vôm Yésus a ne! Nkañete wo dañe kobô ve ajô môte wua ya été, éko éziñ nnye a yiane dañe bo ngul, a mimbia minsisim mi tabeya nye nyul ayap.

Éngôngole môt éte ja ke ja wulu teke biyé nyul. Alu ba môs, a tabe “mesoñ été a minkôle yôp, ve yôn, a tene nyôle jé a mekok.” (Marc 5:5) A ne mbia ayok, aval e ne na bôte ba ko woñe ya tyi’ilane vôm a ne. Abui e nga jeñe na é ka’a nye, ve biyoñ bise a nga mane té bengôkop be mbe nye mo a mebo. Môt éziñ a nji bo ngule ya jôé nye.

Nté môt ate a subu Yésus bebé a kute nye meboñe si, nde mimbia minsisim mia tindi nye na a yôtan yôb été na: “A Yésus, Mone Zambe A dañe bôte bese Yôp, bia wo bi ne za ajô? Me ajô wo, Zambe a lô na, te [tibili] ma.” Nde Yésus a liti na a jôé mimbia minsisim a jô’ô na: “A mbia nsisim, kôlô’ô be môte nyô.”​—Marc 5:7, 8.

Nya ajôô a ne na, môte nyi a bili abui mimbia minsisime nyul. Éyoñe Yésus a sili na, “Ô ne jôé na za?” a yalane na: “Jôé dam e ne na Ézuk; amu bi ne abui.” (Marc 5:9) Nsamba bita Beromain ô ne ézuk amu ô bili betoyini bezimbi; nde, abui mimbia minsisim mi maneya late na mia tibili môte nyi, mi wô’ô mvaé. Mia ye’elane Yésus na a “bo te jô mie na mi ke [beta yee].” Mia yiane yemelane jé ja yange mie a masa wop Satan.​—Luc 8:31.

E fefele valé, beta mbame bengôé 2 000 a di vôm ate, betit Atiñe da tyili, a Bejuif be nji yiane bi bi betite bete. Mimbia minsisim mia jô ñhe nye na: “Lôme’ bia bi ke nyiin mbam bengôé.” (Marc 5:12) Yésus a kañese, ane ba ke nyiine bengôé. Nde bengôé 2 000 bete bese ba yôô nlumbu nkô, a ke ku mañ été a mane wu.

 Éyoñe beba’ale bengôé ba yene jam ete, ba ji’a ke tison été a minlam na, be ke kate jam ba te yen. Nde bôte ba té na ba zu yene jame da te boban. Éyoñ ba suan, ba yene na môt a to a bili mimbia minsisim a nto mvo’é, a nga bo fe mam aval da yian. A mbe’e biyé, a to fe mebo me Yésus si!

E bôte ba wô’ô jam ete, nge yene môt ate a mis ba semé beta nseman, be ko woñ éyoñe ba simesane mame mefe Yésus a ne ngule ya beta bo vôm ate. Nde ba ye’elane Yésus na a kôlô si jap. Éyoñe Yésus a dañeya éfunga été na a ke, nde môt a mbe a bili mimbia minsisim a ye’elane nye na ba nye be ke. Ve Yésus a jô môt ate na: “Kele’ nda jôé be bôte bôé, ô kate be beta be mam Tate a te bo wo, ô kate fe be ane a te ko wo éngôngo.”​—Marc 5:19.

Yésus a wô’ô kate bôte a te mane saé na, be bo teke de kate môt éziñ, amu a nji yi na be yemelane za a né fo’o ve amu ba yene bitua bi mam a bo. Ve afôla di, môt a to a bili mimbia minsisim a ne ndeme ja liti na, Yésus a ne ngul, a môt ate a ne ngule ya kañete bôte ba ye bi fane ya yene Yésus. A jam a ye kate be da ye volô na be bo te té nlañ ôfe nge laane minsos a lat a awu bengôé. Nde môt ate a ke, a kañete Décapole ase jame Yésus a nga bo asu dé.