Anmezir ki bann disip i ariv lo lans apre sa move leksperyans ki zot in pas atraver lo lanmer, zot ganny en sok! De zonm vyolan posede par demon i sorti dan en simityer pa tro lwen e tay kot Zezi! Labib i koz plis lo enn ant sa de zonm, petet akoz i pli vyolan e i’n ganny kontrole par bann demon pour plis letan.

Sa pov zonm i al partou touni. Lizour konman aswar i “kriye e koup koup son lekor avek ros dan simityer e dan montanny.” (Mark 5:5) I sitan sovaz ki bann dimoun i per pour pas dan sa semen. Serten dimoun in esey anmar li, me i kas bann lasenn ek minot ki zot met lo son lanmen ek lipye. Napa personn ki annan ase lafors pour met li anba kontrol.

Sa zonm i vin kot Zezi e tonm azenou devan li. Bann demon ki pe kontrol li i fer li kriye: “Ki ou’n vin fer isi ou Zezi, Garson Bondye Tre O? Fer serman par Bondye vivan pour pa tourmant mwan.” Zezi i montre ki annan pouvwar lo bann demon. I donn zot lord: “Demon, sorti dan sa zonm.”​—Mark 5:7, 8.

An realite, i annan en kantite demon ki pe kontrol sa zonm. Ler Zezi i demande, “Ki mannyer ou apele?” zot reponn: “Mon apel Larme, akoz i annan en kantite nou.” (Mark 5:9) Dan en larme oubyen Lezyon Romen, i annan plizyer milye solda, alor i annan en kantite demon ki’n zwenn ansanm pour fer sa zonm soufer e zot pran plezir dan son soufrans. Zot sipliy Zezi “pour ki i pa donn lord pour zot al dan labim.” I paret ki zot realize ki pou arive avek zot ek zot sef, Satan, a lavenir.​—Lik 8:31.

Dan zalantour, i annan apepre 2,000 koson ki pe manze. Dapre Lalwa, koson i enpir e bann Zwif pa devret ni menm sonny zot. Bann demon i dir: “Anvoy nou dan sa bann koson pour ki nou a kapab antre dan zot.” (Mark 5:12) Zezi i dir zot ale e zot antre dan sa bann koson. Ler  sa i arive, sa 2,000 koson i taye, tonm dan presipis e noye dan lanmer.

Ler bann dimoun ki pe okip bann koson i vwar sa, zot taye pour al rakont bann dimoun dan lavil ek lakanpanny. Bann dimoun i vin vwar sa ki’n arive. Ler zot vini, zot vwar sa zonm ki ti posede par demon. La i la pe asize o bor Zezi, i’n met en lenz lo li e son lespri in bon.

Bann dimoun ki tann sa ki’n arive oubyen ki vwar sa zonm i per akoz zot pa konnen ki Zezi i kapab fer ankor. Zot sipliy Zezi pour kit sa landrwa. Ler Zezi pe anbark dan kannot pour ale, sa zonm ki ti posede par demon i sipliy Zezi pour vin avek li. Me Zezi i dir li: “Al kot ou fanmir e rakont zot tou sa ki Zeova in fer pour ou e sa konpasyon ki i’n demontre anver ou.”​—Mark 5:19.

Normalman Zezi i demann bann dimoun ki i’n geri pour pa dir personn akoz i pa anvi ki dimoun i annan lafwa dan li zis akoz bann zistwar eksitan ki dimoun i rakonte. Dan sa ka, sa mirak lo sa zonm ki ti posede par demon i donn levidans konkret ki Zezi i annan pwisans Bondye e osi sa zonm i kapab pres avek dimoun ki petet Zezi pa pou kapab zwenn li menm. Deplis, temwannyaz sa zonm pou kapab demanti okenn fo rapor konsernan lanmor sa bann koson. Alor sa zonm i ale e i konmans anons partou dan Dekapol sa ki Zezi in fer pour li.