Eratou se qai yaco bula ga e baravi na tisaipeli ni oti na ka vakadomobula e sotavi mai wai. Dua tale na ituvaki rerevaki ratou baci donuya qo. Erau basika mai na dua na ibulubulu e rua na tagane vakarerevaki rau curumi timoni, rau qai cicivi Jisu! E duatani sara e dua vei rau, ni rairai voravora cake nona itovo qai balavu cake na gauna era lewai koya tu kina na timoni.

E vakaloloma na tagane qori ni dau luvawale ni veilakoyaki voli. E ‘qoqolou ena bogi kei na siga ena ibulubulu kei na veidelana qai dau tavalaki koya ena vatu.’ (Marika 5:5) Na kena vakarerevaki na tagane qori e sega ni doudou kina e dua me muria na sala ya. Era saga eso mera vesuki koya, ia e drutilaka na sinucodo kei na iqamuniyava. E sega ni vakamalumalumutaki koya rawa e dua.

Ni volekati Jisu yani na tagane ya, e kailavaka ena nodra veivakamuai na timoni: “Na cava meu cakava vei iko, Jisu na Luve ni Kalou Cecere Duadua? Mo bubului ena yaca ni Kalou ni o na sega ni vakararawataki au.” E vakaraitaka o Jisu ni lewai ira na timoni ena nona vakarota: “O iko yalo velavela, lako tani vua.”​—Marika 5:7, 8.

E curumi tagane tu e levu na timoni qai kilai qori ni taroga o Jisu: “O cei na yacamu?” E sauma o tagane: “Na yacaqu o Vavakoso, ni keimami le levu.” (Marika 5:⁠9) Dua na vavakoso se iwasewase ena mataivalu ni Roma era lewena e vica vata na udolu na sotia. E kilai rawa e keri na levu ni timoni era curumi tagane tu ra qai marau nira raica nona rarawa. Era vakamasuti Jisu “me kua ni vakaroti ira mera lako ina qara sega ni vakabotona.” Kena ibalebale era sa kila rawa tu na timoni na ka ena caka vei ira kei na nodra iliuliu o Setani.​—Luke 8:31.

E 2,000 na vuaka era kana voleka toka. E tukuni ena Lawa ni manumanu dukadukali na vuaka, sega tale ga ni dodonu me laurai vei ira na Jiu na vuaka. Era kaya na timoni: “Vakatalai keimami vei ira na vuaka, me keimami curumi ira.” (Marika 5:12) E tukuna sara o Jisu vei ira na timoni mera lai curumi ira na vuaka. Era qai cici na 2,000 na vuaka ina barinivatu, ra lutu i wasawasa ra mani luvu kece.

 Nira raica qori na dau vakatawa vuaka, era lai tukutuku sara ina koro kei na veiyasana. Era mani lako na lewenivanua mera lai raica na ka sa yaco. Nira yaco yani, era raica ni sa bula vinaka tale na tagane curumi timoni, sa vinaka tale tu nona vakasama. Sa vakaisulu, qai dabe toka e yasa i Jisu!

Dua na ka nodra rere o ira era rogoca na itukutuku se ra raici tagane sara ga, era sega ni kila na ka ena yacovi ira ena vuku ni ka e yaco qori. Era vakamasuti Jisu me biuta nodra yasayasa. Ni vakarau vodo i waqa o Jisu, e kerea na tagane a curumi timoni me rau lako vata. Ia e kaya vua o Jisu: “Lako i vale vei ira na wekamu, lai tukuna vei ira na veika e cakava vei iko o Jiova, kei na nona lomani iko.”​—Marika 5:19.

E dau veivakaroti o Jisu vei ira e vakabula mera kua ni talanoataka, ni sega ni vinakata mera yavutaka na lewenivanua nodra rai me baleti koya ena veika veivakurabuitaki era rogoca. Ia nona vakabulai na tagane a curumi timoni tu e ivakadinadina ni kaukaua e tu vei Jisu, e tukuni kina me lai talanoataka nira rawa ni rogoca tale ga o ira ena rairai sega ni sotava o Jisu. E rawa ni vakamalumu wakanikau tale ga nona itukutuku ni rairai sega ni taleitaki nodra mate na vuaka. E gole sara o tagane ena yasayasa taucoko vakaTikapoli me lai talanoataka na veika e cakava vua o Jisu.