Be ni kaselɔi lɛ yashɛ ŋshɔ lɛ naa yɛ jaramɔ shihilɛ ni amɛtsɔ mli yɛ ŋshɔ lɛ hiɛ lɛ sɛɛ lɛ, amɛna nɔ ko ni hã amɛnaa kpɛ amɛhe waa. Hii enyɔ ni yɔɔ daimonioi, ní hiɛ efee kramakrama jɛ gɔɔ ko ni bɛŋkɛ jɛmɛ lɛ mli, ni amɛsha foi kɛba Yesu ŋɔɔ! Amaniɛbɔɔ lɛ wie amɛteŋ mɔ kome he titri, ekolɛ akɛni ehiɛ efee kramakrama ni daimonioi lɛ ená enɔ hewalɛ be kpalaŋŋ fe mɔ kroko lɛ hewɔ.

Nuu ni nii yɔɔ mɔbɔ nɛɛ nyiɛɔ yayaiaŋ. Nyɔɔŋnyɔɔŋ kɛ shwaneshwane lɛ, “ebolɔɔ yɛ gbohii abui lɛ amli kɛ gɔji lɛ anɔ ni ekɛ tɛi folɔɔ ehe.” (Marko 5:5) Ehiɛ yɛ laŋlaŋ aahu akɛ mɛi sheɔ gbeyei akɛ amɛbaatsɔ nakai gbɛ lɛ nɔ. Mɛi eka akɛ amɛbaafimɔ lɛ, shi etserɛɔ kɔsɔŋkɔsɔi lɛ ni ekumɔɔ gboklɛi lɛ yɛ enaji ahe. Mɔ ko mɔ ko nyɛɛɛ ehe ajɔɔ.

Be ni nuu lɛ bɛŋkɛ Yesu, ní eho egbee enajianaa lɛ, daimonioi lɛ ni kudɔɔ nuu lɛ hã ebolɔ akɛ: “Mɛni mikɛ bo yɔɔ feemɔ, Yesu, Nyɔŋmɔ ni Nɔ Kwɔ Fe Fɛɛ lɛ Bi? Kã Nyɔŋmɔ kitã akɛ opiŋŋŋ mi.” Yesu hã ana akɛ, eyɛ hewalɛ yɛ daimonioi lɛ anɔ, ejaakɛ efã akɛ: “Jee nuu lɛ mli, bo mumɔ ni he tseee.”​—Marko 5:7, 8.

Anɔkwa, daimonioi babaoo ená nuu lɛ nɔ hewalɛ. Be ni Yesu bi lɛ akɛ: “Te atsɛɔ bo tɛŋŋ?” lɛ, ehã lɛ hetoo akɛ: “Atsɛɔ mi Lejio, ejaakɛ wɔyi fa.” (Marko 5:9) Yɛ Roma tabilɔi ateŋ lɛ, asraafoi akpei abɔ feɔ lejio kome; enɛ tsɔɔ akɛ, daimonioi babaoo efee ekome kɛmiiná nuu lɛ nɔ hewalɛ, ni kɛ́ eepiŋ lɛ, eŋɔɔ amɛnaa. Amɛkpa Yesu fai koni “ekafã amɛ akɛ amɛyabote bu kwɔŋkwɔŋ lɛ mli.” Eeenyɛ efee akɛ, amɛyɔse nɔ ni baaba amɛ kɛ amɛhiɛnyiɛlɔ Satan nɔ wɔsɛɛ lɛ.​—Luka 8:31.

No mli lɛ, kpolotoi aaafee 2,000 miiye nii yɛ he ko ni bɛŋkɛ jɛmɛ; kpolotoi ji kooloi ni he tseee yɛ Mla lɛ naa, ni esaaa akɛ Yudafoi lɛɔ amɛ po. Daimonioi lɛ kɛɛ lɛ akɛ: “Hã wɔya kpolotoi lɛ amli, koni wɔyabote amɛmli.” (Marko 5:12) Yesu kɛɛ amɛya, ni amɛyabote kpolotoi lɛ amli. Kɛkɛ ni kpolotoi 2,000 lɛ fɛɛ wo foi gidigidi kɛjɛ gɔŋkpɔ lɛ nɔ kɛyabote ŋshɔ lɛ mli ni amɛgboi.

 Be ni kpolotoi lɛ akwɛlɔi lɛ na enɛ lɛ, amɛjo foi, ni amɛyabɔ amaniɛ yɛ maŋ lɛ mli kɛ koiasɛɛ. Mɛi lɛ ba koni amɛbakwɛ nɔ ni etee nɔ lɛ. Be ni amɛba lɛ, amɛna nuu ni daimonioi lɛ eje emli lɛ akɛ ehe ewa lɛ, ni ejwɛŋmɔ miitsu nii jogbaŋŋ. Naa, ewo atade ni eta Yesu naji anaa!

Gbeyei mɔmɔ mɛi ni nu enɛ kɛ mɛi ni na nuu lɛ, ni amɛleee bɔ ni nɔ ni tee nɔ nɛɛ baasa amɛhe ahã. Amɛkpa Yesu fai akɛ eje amɛkpokpaa lɛ nɔ eya. Be ni Yesu kwɔɔ lɛlɛ koni eya lɛ, nuu ni no mli lɛ eyɔɔ daimonioi lɛ kpa lɛ fai akɛ ehã ekɛ lɛ aya. Shi Yesu kɛɛ nuu lɛ akɛ: “Yaa owekumɛi lɛ aŋɔɔ yɛ shĩa, ni oyagba amɛ nibii fɛɛ ni Yehowa efee ehã bo, kɛ mɔbɔ ni ena bo lɛ.”​—Marko 5:19.

Bei pii lɛ, Yesu fãa mɛi ni etsaa amɛ lɛ akɛ amɛkakɛɛ mɔ ko mɔ ko, ejaakɛ esumɔɔɔ ni mɛi damɔɔ naakpɛɛ nii ni amɛnu akɛ efeɔ lɛ nɔ amɛmuɔ sane naa yɛ ehe. Shi yɛ shihilɛ nɛɛ mli lɛ, mɛi fɛɛ ni baana nuu ni kulɛ eyɔɔ daimonioi lɛ baana faŋŋ akɛ Yesu yɛ hewalɛ, ni kɛfata he lɛ, nuu lɛ baanyɛ eye mɛi ni ekolɛ Yesu diɛŋtsɛ nine shɛŋ amɛnɔ koni eshiɛ etsɔɔ amɛ lɛ odase. Agbɛnɛ hu, kɛ́ mɔ ko wie nɔ ko ni ejaaa yɛ kpolotoi ni gboi lɛ ahe lɛ, edaseyeli lɛ baanyɛ ahã ana akɛ nɔ ni mɔ lɛ wie lɛ bɛ mli. No hewɔ lɛ, nuu lɛ tee ni eyabɔi nɔ ni Yesu fee ehã lɛ lɛ shiɛmɔ yɛ Dekapoli fɛɛ.