Jesús disipulokuéra tuichaiterei oñemondýi kuri pe márpe, pórke haimete ojahogapa. Péro koʼág̃a tuichavéntema oñemondýi hikuái og̃uahẽvo pe kóstape. Upépe osẽ chupekuéra mokõi kuimbaʼe oñendemoniáva, oúva hína peteĩ sementériogui opytáva ag̃ui upégui. Koʼã kuimbaʼe imbareteterei, ha odipara Jesús oĩha gotyo. Posívlemente oñeñeʼẽve peteĩre, pórke iviolentove ha arevéma oĩ umi demónio poguýpe.

Ko kuimbaʼe ningo aréma oiko opío. Ha “ára ha pyhare oiko umi panteónrupi ha umi sérrore, osapukái ha oñekytĩmba itápe” (Marcos 5:5). Iviolentoiterei rupi, entéronte okyhyjepa chugui ha avave noñanimái ohasa haʼe oĩhárupi. Oĩma oñapytĩva chupe kadénape, péro haʼe omondohopa umíva. Ndaipóri ipuʼakáva hese.

Haʼe oñemoag̃uívo Jesúsre, oñesũ henondépe ha umi demónio okontroláva pe kuimbaʼépe heʼika chupe: “Nde Jesús, Ñandejára Ijojahaʼỹva Raʼy, ¿maʼerã guaʼu piko reju? Ñandejárare ehura chéve ndachekastigamoʼãiha”. Jesús katu ohechauka ipoderosoveha umi demóniogui, heʼívo: “Esẽ pe kuimbaʼégui nde demónio” (Marcos 5:7, 8).

Añetehápe, heta voi la demónio odomináva pe kuimbaʼépe. Jesús oporandu: “¿Mbaʼéicha nde réra?”. Pe kuimbaʼe heʼi: “Che cheréra Lehión, oreretaitereígui” (Marcos 5:9). Yma ningo Roma ehérsitope, peteĩ lehiónpe oĩ vaʼekue míles de soldádo. Upéicharõ jaʼekuaa hetaiterei demónio ombosufriha ko kuimbaʼépe, ha igústo chupekuéra upéva. Umi demónio ojerure Jesúspe animínte hag̃ua “omondo chupekuéra pe yvykua pypukúpe”. Péicha jahecha umi demónio oikuaa porãha mbaʼépa ohaʼarõ chupekuéra ha huvichakuéra Satanáspe (Lucas 8:31).

Ag̃ui upégui, peteĩ sérrope, oĩ amo 2.000 kurérupi okarúva hína. Asegún pe Léi, koʼã animál ikyʼa ha umi hudío ndoguerekói vaʼerã. Umi demónio heʼi Jesúspe: “Oremondóna roike hag̃ua umi kure retepýpe” (Marcos 5:12). Jesús omeʼẽ chupekuéra permíso, ha haʼekuéra ojapo upéva. Umi 2.000 kure odiparapa ojepoi yvatégui ha ojahogapa pe márpe.

 Umi kuimbaʼe oñangarekóva umi kurére katu, odiparapa ha oho omombeʼu upe oiko vaʼekue pe siudápe ha umi kampañaháre. Ha umi hénte ou ohecha mbaʼépa la oikóva. Og̃uahẽvo, otopa hikuái pe kuimbaʼe oĩ vaʼekue heta demónio poguýpe, oguapyha hína Jesús ypýpe, itrankíloma, oñemondéma ha ihuísio porãma.

Umi hénte ohendúva la oikóva ha ohecháva pe kuimbaʼe okueramaha, opyta okyhyjeterei pórke nontendéi mbaʼéicha rupípa oiko upéva. Upémarõ ojerure hikuái Jesúspe oho hag̃ua upe siudágui. Upéi Jesús ojupi pe kanóape ha oho upégui. Pe endemoniadokue katu osuplika Jesúspe oho hag̃ua hendive. Péro haʼe heʼi chupe: “Terehóntena nde rógape ne hentekuéra rendápe, ha emombeʼu chupekuéra opa mbaʼe Jehová ojapo vaʼekue nderehe ha mbaʼéichapa ndeporiahuvereko” (Marcos 5:19).

Jesús omonguera rire peteĩ persónape, heʼi jepi chupe ani hag̃ua omombeʼu avavépe. Haʼe ndoipotái umi hénte ombopy ha omoakã la ohendúva, ha upeakuére oiko oguerovia ogueroviaʼỹ vaʼerã. Péro koʼág̃a idiferénte. Jesúspe ijetuʼútama opredika umi hénte upepeguápe, péro pe endemoniadokue ikatúta ojapo upéva. Avei entéro ohecháva pe kuimbaʼépe, oñemeʼẽta enkuénta Jesús oipuruha ipodér ojapo hag̃ua heta mbaʼe porã. Upéva ojurumbotýta umi oñeʼẽ vaisévape hese omanomba haguére umi kure. Upévare pe kuimbaʼe ojapo Jesús heʼíva ha oho Decápolis tuichakuére omombeʼu opa mbaʼe Jesús ojapo vaʼekue hese.