Hahediba taudia be gohu ai ia vara dika badana idia hanaia bona kone dekenai idia ginidae neganai, idia itaia gauna dainai idia gari bada. Lauma dikadia ese idia biagua dagedage taudia rua be gara gabuna amo idia raka-lasi bona Iesu dekenai idia heau mai! Baibel ese idia ta ia herevalaia, reana badina ia dagedage bada bona nega daudau demoni ese idia biagua.

Unai tauna be madi kopina kavakava ia loaloa. Dina bona hanuaboi, “gara gabunai bona ororo dekenai ia boiboi bada bona nadi amo sibona ia utua.” (Mareko 5:5) Ia dagedage bada dainai, taunimanima be unai dala amo idia hanaia lasi. Haida ese seini amo ena imana aena idia kwatua toho, to seini ia hamakohia. Ta be hegeregere lasi ia dogoatao totona.

Vadaeni Iesu dekenai ia heau lao bona ena aena badinai ia goru diho. Ia idia biagua demoni ese idia hasiahua dainai ia boiboi badabada: “Iesu, Ataiai Momokani Diravana ena Natuna, dahaka dainai iniseni oi mai? Dirava ena ladanai oi lau noia lau do oi hahisia lasi.” Iesu ia hahedinaraia ia be mai ena siahu demoni ia biagudia totona, unai dainai ia oda henia: “Lauma dikana, inai tauna amo oi raka-lasi.”​—Mareko 5:7, 8.

To momokani, unai tauna lalonai demoni momo idia noho. Iesu ese ia nanadaia: “Emu ladana be daika?” Ia haere: “Tuari Oreana, badina ai be momo herea.” (Mareko 5:9) Roma tuari oreana lalonai soldia taudia be tausen momo; unai hegeregerena demoni momo be unai tauna lalonai idia noho bona ia mamia hisihisina idia moalelaia. Iesu idia noia “idia do ia oda henia lasi guri dobu masemase dekenai idia lao totona.” Idia diba vadaeni idia bona edia gunalaia tauna Satani be dika do idia davaria.​—Luka 8:31.

Kahirakahira ai boroma 2,000 bamona be rei idia ania noho, Taravatu hegeregerena, unai animal be miro bona Iuda taudia ese do idia naridia lasi. Demoni idia gwau: “Boroma lalonai ai do oi siaia lao.” (Mareko 5:12) Vadaeni, Iesu ese ia siaidia lao bona boroma lalonai idia vareai. Bena unai boroma 2,000 be idia heau lao, hagahaga amo idia roho diho bona gohu lalonai idia maloa mase.

 Boroma naria taudia be unai idia itaia neganai, idia heau lao, siti bona hanua lalonai unai sivarai idia gwauraia totona. Taunimanima idia lao ia vara gauna idia itaia totona. Idia ginidae neganai, idia itaia lauma dikadia ese idia rakatania tauna ena lalona be ia namo. Dabua ia hahedokilaia bona Iesu ena aena badinai ia helai!

Unai sivarai idia kamonai eiava unai tauna idia itaia taudia be idia gari dikadika, badina ia vara gauna ena anina idia lalopararalaia lasi. Iesu idia noia edia gabu do ia rakatania. Iesu be bouti ia guia neganai, ia hanamoa tauna ese ia noia, do ia bamoa. To Iesu ese ia hamaoroa: “Emu varavara dekenai oi lao, bona Iehova ese oi totona ia karaia gaudia bona ia hahedinaraia hebogahisina oi gwauraia.”​—Mareko 5:19.

Iesu be ta ia hanamoa neganai, ia hamaoroa ma ta do ia hadibaia lasi, badina ia ura lasi taunimanima be ia bona ia karaia gaudia dainai lalohadai kererena idia abia. To Iesu ese inai tauna ia hamaoroa ia karaia gauna be ma haida do ia hadibaia, unai amo Iesu ia lao diba lasi gabudia dekenai taunimanima ia haroro henia diba. Danu, inai tauna ena sivarai amo ma haida be boroma idia mase ena badina idia lalopararalaia diba. Unai dainai unai tauna ia lao bona Dekapoli ena hanua ibounai dekenai Iesu ese ia karaia karana ia sivarailaia.