Nakigtot dagiti adalan idi nakasangladdan kalpasan ti nakaam-amak a panaglayagda. Adda naggapu iti sementerio a dua a nauyong a lallaki a naluganan iti demonio a nagtaray ken Jesus! Impamaysa ti amin ti atensionda iti maysa a lalaki gapu ta mabalin a nauy-uyong ken nabaybayagen a konkontrolen dagiti demonio.

Labus nga agpagnapagna daytoy kakaasi a lalaki. Aldaw ken rabii nga “agririaw iti sementerio ken iti bambantay sana sugatsugaten ti bagina iti batbato.” (Marcos 5:5) Gapu ta nakauy-uyong, mabuteng dagiti tattao a lumabas iti dayta a paset ti dalan. Dadduma ti nangkawar iti ima ken sakana, ngem pugsatenna dagita. Awan ti makabael a mangparmek kenkuana.

Idi immasideg ti lalaki ken Jesus ken nagruknoy iti sakana, pinagikkis dagiti demonio ti lalaki. Impukkawna: “Apay nga addaka ditoy, Jesus nga Anak ti Kangatuan a Dios? Dinak koma dusaen. Ikarim dayta iti Dios.” Impakita ni Jesus nga adda autoridadna kadagiti demonio. Imbilinna: “Sika a demonio, rummuarka iti daytoy a tao.”—Marcos 5:7, 8.

Iti kinapudnona, adu a demonio ti limmugan iti lalaki. Idi dinamag ni Jesus, “Ania ti naganmo?” kinunana: “Armada, ta adukami.” (Marcos 5:9) Ti maysa nga armada dagiti Romano ket buklen ti rinibu a soldado. Gapuna, adu a demonio ti limmugan iti lalaki, ket maragragsakanda iti panagsagabana. Impakaasida ken Jesus a “saanna nga ibaon ida iti abut a mangliwengliweng.” Mabalin nga ammodan a dayta ti pagtungpalanda, ken ti liderda a ni Satanas.—Lucas 8:31.

Iti asideg, adda idi agarup 2,000 a baboy, narugit nga animal sigun iti Linteg ken saan a mabalin nga agtaraken dagiti Judio kadagitoy. Kinuna dagiti demonio: “Ibaonnakami a lumugan kadagiti baboy.” (Marcos 5:12) Imbaga ni Jesus kadakuada a lumuganda kadagiti baboy. Idi kuan, nagtataray a timpuak amin a 2,000 a baboy iti teppang ket nalmesda iti baybay.

Idi nakita daytoy dagiti agtartaraken kadagiti baboy, impadamagda a dagus iti siudad ken kadagiti probinsia. Immay dagiti tattao tapno kitaenda ti napasamak. Idi simmangpetda, nakitada ti lalaki a  naluganan idi kadagiti demonio a limpion ti panunotna. Nakabadon ken agtugtugaw iti sakaanan ni Jesus!

Nagbuteng dagiti tattao a nakadamag wenno nakakita iti lalaki ta mabalin a saanda a naawatan ti kaipapanan daytoy. Impakaasida ken Jesus a pumanaw iti lugarda. Idi pumanawen ni Jesus a naglugan iti bangka, kiniddaw ti lalaki a sumurot kenkuana. Ngem imbaga ni Jesus iti lalaki: “Agawidkan ken ipadamagmo kadagiti kabagiam ti amin nga inaramid kenka ni Jehova ken ti panangngaasina kenka.”—Marcos 5:19.

Gagangay nga ibilin ni Jesus kadagiti agasanna a saanda nga ipadpadamag iti asinoman ti inaramidna ta saanna a kayat a maammuan dagiti tattao ti maipapan kenkuana gapu iti nadamdamagda. Iti daytoy a pasamak, ti lalaki a naluganan idi iti demonio ket maysa a pammaneknek iti pannakabalin ni Jesus ken mabalin nga isu ti mangasaba kadagiti tattao a saan a personal a makasabaan ni Jesus. Ti napasamak kenkuana ti mangsungbat iti aniaman a di umiso a damag maipapan iti pannakalmes dagiti baboy. Gapuna, napan ti lalaki ket impakaammona iti intero a Decapolis ti inaramid ni Jesus kenkuana.