Amanyĩw’a nĩmesie kũvika ũtee wa ũkanga ĩtina wa kĩuutani kĩnene kĩla kyamakwatie me ĩsiwanĩ. Me vau ũtee wa ũkanga, nĩmoonie ũndũ wamatelemya. Moonie aũme elĩ maumĩte kũla kweethĩawa mbũa na masembete vala ve Yesũ! Aũme asu makĩawa mũno nũndũ maĩ na ndaimoni. Katĩ wa aũme asu elĩ, ve ũmwe ũeleetw’e mũnango, na no kwĩthĩwa no we waĩ mũng’endu mũno na walikĩtwe nĩ ndaimoni kwa ĩvinda yĩasanga.

Mũndũũme ũsu angangaa kũũ na kũũ e mũthei. Kĩla ĩvinda ũtukũ na mũthenya, “nĩwakayaa na wasya mũnene e kũu mbũanĩ na iĩmanĩ, na nĩweetemangaa na mavia.” (Maliko 5:5) Mũndũũme ũsu aĩ mũng’endu mũno nginya ũkethĩa andũ nĩmeũkĩa kwĩsĩla nzĩa ĩla yesĩle kũla kweethĩawa mbũa. Andũ amwe nĩmamwovaa na nyololo na mbĩngũ, ĩndĩ nĩwatusangaa mbĩngũ isu na kũtilanga nyololo ila syamwovete maaũ. Vai mũndũ waĩ atonya kũmũkwata akamũlũmya.

Yĩla mũndũũme ũsu wamũthengeeie Yesũ na atulya ndu mbee wake, ndaimoni ila syamũlikĩte nĩsyatumie aneena na wasya mũnene akyasya: “Nyie nĩ na ũndũ mwaũ naku Yesũ, Mwana wa Ngai Ũla wĩ Ĩũlũ wa Onthe? Nĩngũkũavĩthya ĩsyĩtwanĩ ya Ngai, ndũkanthĩny’e.” Kĩla Yesũ weekie nĩkyoonanisye kana e na ũkũmũ ĩũlũ wa ndaimoni. Eeĩaĩe ndaimoni isu kwa kũsyĩa: “Uma nthĩnĩ wake, we veva mũvuku.”—Maliko 5:7, 8.

Ũw’o nĩ kana mũndũũme ũsu alikĩtwe nĩ ndaimoni mbingĩ mũno. Yĩla Yesũ wakũlilye, “Wĩtawa ata?” Mũndũũme ũsu asũngĩie asya: “Nĩtawa Nguthu, nũndũ twĩ aingĩ.” (Maliko 5:9) Nguthu ya asikalĩ ma Lomi yeethĩawa na asikalĩ ngili mbingĩ; ũu wĩtũtetheesya kũmanya kana ndaimoni ila syalikĩte mũndũ ũsu syaĩ mbingĩ mũno na nĩsyatanĩaa kwona aithĩna. Ndaimoni isu nĩsyamwĩsũvie Yesũ “ndakasyĩaĩe ikalike ĩimanĩ yĩte kĩtulu.” Veoneka nĩsyeesĩ ũsilĩlo ũla syeteele kũkwata vamwe na mũtongoi wasyo, Satani.—Luka 8:31.

Vau ũtee vaĩ ngũlũe vakuvĩ 2,000. Kwosana na Mĩao, ngũlũe syaĩ nyamũ mbuku na Ayuti mayaaĩle kwĩthĩwa nasyo. Ndaimoni ila syalikĩte mũndũũme ũsu syeeie Yesũ atĩĩ: “Tũeke tũthi ĩĩthyanĩ ya ngũlũe, tũlike nthĩnĩ wasyo.” (Maliko 5:12) Yesũ eeie ndaimoni isu ithi, na syathi syalika ngũlũenĩ. Ndaimoni isu syalikile ngũlũenĩ isu syonthe,  na ĩĩthya yĩu ya ngũlũe yatheea kĩvaũũkonĩ yĩsembete, na yalika ũkanganĩ yakw’ĩĩa vo.

Yĩla andũ ala maĩthasya ngũlũe isu moonie ũndũ ũsu, nĩmasembie ndũanĩ na isionĩ ingĩ na matavya andũ kĩla kyeethĩwa. Andũ nĩmookie meyonee maũndũ ala meethĩwa. Yĩla mavikie, meethĩie ũla mũndũ eeĩ na ndaimoni avoie na ate na mathĩna ma kĩlĩko. Moonie ekĩĩte ngũa nesa na ekalĩte maaũnĩ ma Yesũ!

Andũ ala meewie maũndũ asu na moona mũndũ ũsu e mũseo nĩmakwatiwe nĩ wia nũndũ masũanĩaa kana ve maũndũ angĩ Yesũ ũtonya kwĩka kĩsionĩ kyoo mailyĩ ta asu na makamaetee wasyo. Andũ asu mamũkũlilye Yesũ aume kĩsionĩ kyoo. Yesũ ailika ĩsiwanĩ, mũndũũme ũla waĩ anaumw’a ndaimoni nĩwamwĩsũvie aendany’e nake. Ĩndĩ Yesũ amwĩie atĩĩ: “Ĩnũka kwa andũ maku ma mũsyĩ, na ũimatavya maũndũ onthe ala Yeova wakwĩka na tei ũla wakwony’a.”—Maliko 5:19.

Yesũ akothaa kũtavya ala wavosya maikawete ũla wamavosya. Eekaa ũu nũndũ ndendaa andũ mamũĩkĩĩe kumana na maũndũ ala matavw’a ĩũlũ wake nũndũ noĩthwa maũndũ asu mongeleelawa mautĩĩo. Ĩndĩ ĩvindanĩ yĩĩ Yesũ nĩweeie ũla mũndũ waumiw’e ndaimoni athi akawete maũndũ ala meethĩwa. Mũndũ ũsu aĩ ũĩkĩĩthyo mwĩanĩu wa kana Yesũ e vinya, na aĩ atonya kumya ũkũsĩ mũseo kwa ala Yesũ ũtonya kwĩthĩwa atesaa kũmavikĩa amatavye ũvoo. O na ĩngĩ, ũkũsĩ wake waĩ ũtonya kũtuma andũ ala meew’ĩte kana ngũlũe nilikile kĩw’ũnĩ syakw’a maeka kwĩthĩwa na mawoni mathũku. Kwoou mũndũũme ũsu nĩwaendie na ambĩĩa kũtavany’a maũndũ ala Yesũ wamwĩkie kĩsionĩ kyonthe kya Ndekavoli.