Arutwo macoka rũteere-inĩ thutha wa gĩcanjama kĩrĩa kiuma iria-inĩ, makeyonera ũndũ wa magegania. Arũme erĩ marĩ na ũũru mũno na marĩ na ndaimono, makoimĩra kuuma kaburi karĩ hau hakuhĩ na magateng’era kũrĩ Jesu. Ũmwe wao nĩwe warĩrĩirio mũno nĩ ũhoro ũyũ, tondũ kwahoteka arĩ na marũrũ maingĩ na akoretwo na ndaimono kwa ihinda inene.

Mũndũ ũyũ akoretwo agĩthiĩ arĩ njaga. Ũtukũ na mũthenya ‘atũũraga akayaga kũu mbĩrĩra-inĩ na irĩma-inĩ agĩĩtihangagia na mahiga.’ (Mariko 5:5) Nĩ mũru mũno ũũ atĩ andũ nĩ metigagĩra kũhĩtũkĩra njĩra ĩyo. Amwe manageria kũmuoha, ĩndĩ agatuanga nyororo na bĩngũ iria ohetwo magũrũ nacio. Gũtirĩ mũndũ ũngĩhota kũmũhoreria.

Mũndũ ũcio akuhĩrĩria Jesu na akagwa magũrũ-inĩ make, ndaimono iria irĩ thĩinĩ wake igakayũrũrũka ikoiga: “Tũrorania kĩĩ nawe, Jesu, Mũrũ wa Ngai Ũrĩa ũrĩ Igũrũ Mũno? Ndakwĩhĩtithia na rĩĩtwa rĩa Ngai ndũkanyarire.” Jesu akonania atĩ arĩ na hinya igũrũ rĩa ndaimono, agathana akoiga: “Uma thĩinĩ wa mũndũ ũyũ, wee ndaimono ĩno.”​—Mariko 5:​7, 8.

Ũrĩa kũrĩ nĩ atĩ, mũndũ ũcio arĩ na ndaimono nyingĩ mũno. Jesu amũũria, “Wĩtagwo atĩa?” akamũcokeria: “Njĩtagwo Legioni, tondũ tũrĩ aingĩ.” (Mariko 5:9) Legioni thĩinĩ wa Roma nĩ gĩkundi kĩa thigari ngiri nyingĩ; kwoguo mũndũ ũcio arĩ na ndaimono nyingĩ thĩinĩ wake, na irakena hĩndĩ ĩrĩa aranyamarĩka. Igathaitha Jesu “ndagaciathe ithiĩ thĩinĩ wa irima rĩrĩa rĩtarĩ gĩturi.” Hatarĩ nganja nĩ ciũĩ ũndũ ũrĩa ũrĩ mbere yacio hamwe na Shaitani mũnene wacio.​—Luka 8:31.

Hau hakuhĩ harĩ na rũũru rwa ngũrũe ta 2,000, nyamũ iria cionagwo itarĩ theru kũringana na Watho na iria Ayahudi matagĩrĩirũo nginya kũrĩithia. Ndaimono icio ikoiga: “Twĩtĩkĩrie tũthiĩ tũingĩre thĩinĩ wa ngũrũe iria.” (Mariko 5:12) Jesu agaciĩra ithiĩ, na ikaingĩra thĩinĩ wa ngũrũe. O hĩndĩ ĩyo, ngũrũe ciothe 2,000 igateng’era kĩharũrũka-inĩ na ikagwa iria-inĩ.

 Arĩa mararĩithia ngũrũe icio mona ũguo, magateng’era kũmenyithania ndeto icio itũũra-inĩ na mĩgũnda-inĩ. Andũ magoka kwĩyonera ũrĩa gwekĩka. Makinya magakora atĩ mũndũ ũrĩa ũrutirũo ndaimono rĩu nĩ mwega na akahorera. Arĩ na nguo, na aikarĩte hau magũrũ-inĩ ma Jesu.

Andũ arĩa maraigua ũhoro ũcio kana makona mũndũ ũcio makanyitwo nĩ guoya. Kũringana na mawoni mao, matiramenya ũndũ ũrĩa ũngĩ Jesu egũcoka eke. Makeera Jesu oime kũu. Jesu athiĩ kũhaica gatarũ, mũndũ ũrĩa ũrutirũo ndaimono akamũthaitha mathiĩ nake. No Jesu akamwĩra ũũ: “Inũka kũrĩ andũ anyu, na ũmeere maũndũ mothe marĩa Jehova agwĩkĩire na tha iria akuonetie.”​—Mariko 5:19.

Jesu kaingĩ eraga andũ arĩa ahonia matikeere mũndũ o wothe tondũ endaga andũ makorũo na mawoni mega mamwĩgiĩ mategũthikĩrĩria ndeto cia nginyanĩrio ciongereirũo cumbĩ. No ũhoro-inĩ ũyũ, mũndũ ũcio ũrutirũo ndaimono nĩ ũira atĩ Jesu arĩ na ũhoti, na no ahunjĩrie andũ arĩa Jesu atangĩhota kuonana nao we mwene. Ũira wake ningĩ no ũteithie kũngĩgĩa na mũndũ ũkũheana riboti njũru ĩgiĩ ngũrũe iria igũire maĩ-inĩ. Kwoguo mũndũ ũcio agathiĩ na akambĩrĩria kũhunjia kũndũ guothe thĩinĩ wa Dekapoli ũndũ ũrĩa Jesu amwĩkĩire.