Baana ba bwanga byo bafikile ku kitulu panyuma ya kupuluka pa kalunga ka mema, bamwene kintu kikwabo kilenga moyo. Bantu babiji bashinta bingi bajinga na bandemona bafuminenga ku bilende kabiji baishilenga lubilo kwi Yesu. Bino Yesu watele muchima pa umo, kampe na mambo a kuba’mba ye washinchile bingi kukila mukwabo kabiji bamukatazhanga ku bandemona pa kimye kyabaya.

Uno muntu waendangatu kwa kubula bivwalo. Kimye kyonse bufuku ne mute, “wabijikanga ku bilende ne mu mitumba ne kwichibaula na mabwe.” (Mako 5:5) Washinchile bingi kya kuba kafwako muntu nangwa umo wapitanga mu joja jishinda ne. Bamo baesekanga kumukasa minyololo ku maulu bino aye wiichibanga. Kafwako muntu nangwa umo wajinga na bulume bwa kumufwomona ne.

Uno muntu byo afikile kwi Yesu waponene panshi ku maulu anji, kabiji ndemona wamukatazhanga wamulengejile kubijika’mba: “Nanchi mubena kukeba ka kwi amiwa anweba Yesu, Mwana Lesa Mwine Wakila? Nemuchipisha kwi Lesa namba kange munkabishe ne.” Yesu wamwesheshe’mba uji na bulume pa bandemona byo amukambizhe’mba: “Obewa mupashi watama, fumamo mu uno muntu.”—Mako 5:7, 8.

Uno muntu wajinga na bandemona bavula bingi. Yesu byo amushikishe’mba: “Jizhina jobe wi ñanyi?” Aye wamukumbwile’mba: “Jizhina jami yami Nzhita, mambo twavula bingi.” (Mako 5:9) Nzhita ya bena Loma yaikalanga na biumbi bya bashilikale; onkao mambo, bandemona bavula bingi batwelele mu uno muntu. Bandemona bakwatankene mu kumanyika uno muntu kabiji baumvwanga bingi bulongo. Bamusashijile Yesu amba “kechi ebakambizhe kuya na kutwela mu kalengwa kabula kupela ne.” Kyamweka bayukile kikebamwekela kulutwe pamo na ntangi wabo aye Satana.—Luka 8:31.

Kwajinga bankumba nobe 2,000 bajiilenga pepi na ko bajinga. Kwesakana na byaambile Mizhilo, bankumba bajinga banyama ba muzhilo kabiji Bayudea kechi bafwainwe kwibalela ne. Onkao mambo, bandemona bamwambijile’mba: “Tutumai mu bankumba kuba’mba tutwele mwi abo.” (Mako 5:12) Yesu wibaswishishe kuya na kutwela mu bankumba. Bankumba bonse 2,000 bakunkulukile lubilo ne kuketaya mu kalunga ka mema.

 Aba bajishishenga bankumba byo bamwene kino, banyemene ne kuya na kubuula bajinga mu muzhi ne mu mapunzha akwabo. Kepo bantu baishile na kumona kino kyamwekele. Byo bafikile, bataaine muntu ye bapangilemo bandemona ujitu bulongo. Bakuminye bingi pa kumutaana wavwala bulongo kabiji waikala ku maulu a kwa Yesu.

Bantu baumvwine kino kyamwekele nangwa bamweneko baubile bingi moyo, mambo kechi bayukile byakonsheshe kwibamwekela ne. Onkao mambo, basashijile Yesu amba afumemo mu mpunzha yabo. Yesu byo akanjijilenga mu bwato, awa muntu ye apangilemo bandemona wamusashijile’mba aye nanji. Bino Yesu wamwambijile’mba: “Yanga ku nzubo ku balongo bobe, ukebabuule bintu byonse byakubila Yehoba ne lusa lo akumwesha.”—Mako 5:19.

Yesu javula wakambizhanga bantu bo abukanga kubula kubuulapo muntu nangwa umo ne, kuchina’mba bantu bakamwena mungi bintu byo aubilenga pa kumvwa masawakya abula kuyilamo. Pano bino, uno muntu ye bapangilemo bandemona waikele kishiino kyamwesheshenga bulume bwa kwa Yesu, kabiji aye wakonsheshe kusapwila bino bintu ku bantu bajinga ku mapunzha kwabujile kukonsha kufika Yesu. Kabiji inge bantu ke bashimikizhe bya bubela pa byafwile bankumba, uno muntu wakonsheshe kubuulañana bishinka. Onkao mambo, uno mwanamulume watatwile kusapwila monse mu Ndekapoli bintu byonse byamubijile Yesu.