Vava bavulukidi muna vonza kiampwena muna mbu, alongoki bavaikidi muna nzaza. I bosi, vavangamene diambu dibamwesese o wonga. Wantu wole bena ye nkuya, akwa nganzi zayingi, bavaikidi kuna ziami yo tikuna kwa Yesu. Mosi muna yau otuntidi e sungididi kia wantu awonso, nanga yandi osundidi nganzi, se mvu miayingi ketuminwanga kwa nkuya.

O muntu ndioyo nkonga kekangalanga. ‘Fuku yo mwini okazanga muna ziami ye muna miongo, yo kukilweka mu matadi.’ (Maku 5:5) Wau vo nkwa nganzi zayingi, wantu ke balendanga diaka viokela mu nzila yayi ko mu kuma kia wonga. Akaka bateza kala kunkanga, kansi wadanuna tuvambu yo wula e kû kasiwa muna malu. Ke muntu ko wakala ye ngolo za kunlembeka.

Ekolo muntu ndioyo kefinamanga Yesu yo fukama vana malu mandi, e nkuya mikunyalanga mimfididi mu kaza, oku vo: “Nkia diambu ngina diau yo ngeye, e Yesu wa Mwan’a Nzambi a Mpungu? Idisisi e ndofi muna nkumbu a Nzambi vo kumbangika ko.” Yesu muna songa vo osundidi e nkuya muna ngolo, ovovele vo: ‘Nge mwand’a usafu, vaika muna muntu.’—Maku 5:7, 8.

Kansi, nkuya miayingi mina muna muntu ndioyo. O Yesu vava kanyuvuidi vo, “Nkumbu aku nani? Umvutwidi vo: Nkumbu ame Mvengo; kadi ndonga twina.” (Maku 5:9) Kuna kwa esi Roma, muna mvengo mosi mwakalanga mafunda ye mafunda ma makesa. Muna kuma kiaki, ulolo wa nkuya ubangikanga muntu ndioyo yo yangalela mpasi zandi. E nkuya midodokele Yesu vo, “kabasindiki mu mbilu ko.” E nkuya miami mizeye o lufwasu lukubavingilanga kumosi mpe yo Satana wa mfumu au.—Luka 8:31. 

Vana batelamene, vena ye tezo kia 2.000 ma ngulu zidianga. Muna Nsiku, e ngulu bulu kia funzuka, i dianu Ayuda ke betwelelanga ngulu ko. E nkuya mivovele vo: “Utusindika twakota muna ngulu.” (Maku 5:12) Yesu ubasindikidi, bakotele muna ngulu. E ngulu zawonso tezo kia 2.000, zinengomokene yamuna mbu, zifwididi muna maza.

Vava avungudi a ngulu bamwene diambu diadi, bele ntinu kuna mbanza mu zayisa nsangu zazi. O nkangu wizidi tala dina divangamene. Vava balweke, bamwene o muntu ona ovaikisu nkuya una kiambote, ke sianga diaka mvuanga ko. Ovuete nkutu e mvuatu yo vuanda vana malu ma Yesu.

Awana bawidi e diambu diadi yovo awana bamwene muntu ndioyo, babakamene kwa wonga, kadi ke bazeye nsas’a diambu diadi ko. Badodokele Yesu kakatuka muna zunga kiau. Ekolo Yesu kakotele muna nzaza, o muntu ovaikisu nkuya ododokele Yesu kenda yandi. Kansi Yesu umvovese vo: “Wenda kuna nzo, kuna kwa yitu yaku, ubasamunwina mawonso Yave kavàngidi ye nkenda kasòngele.”—Maku 5:19.

Vava Yesu kewukanga mbevo, nkumbu miayingi okubakanikinanga balembi wo vova kwa ankaka, kadi kazolele ko vo wantu banzayila muna nsangu za masivi mandi. Kansi, o muntu ndioyo ovaikisu e nkuya, oveno lau dia sila umbangi kw’awana balembi wanana yo Yesu, kadi yandi kibeni i ziku kisonganga vo Yesu ovuidi nkuma. E kimbangi kiandi kilenda fokola konso ngindu zambi balenda kala zau o wantu mu kuma kia ngulu zifwidi. Dianu vo, muntu ndioyo oyantikidi samuna muna Dekapole yawonso dina Yesu kamvangidi.