Balutiwa habafita fa likamba hamulaho wa kubata kutibela mwa liwate, baiponela nto yekomokisa luli. Baana babasabisa bababeli, babakenwi ki madimona, bazwa kwa mabita ali bukaufi mi bamatela ku Jesu! Yomuñwi wa baana bao ki yena yabulezwi hahulu mwa likande le, mwendi bakeñisa kuli usabisa hahulu kufita yomuñwi, mi uzamaisizwe ki madimona ka nako yetelele.

Muuna yo uzamayanga mapunu. Busihu ni musihali, ‘uhuwakanga kwa mabita ni kwa malundu ni kuisehaka ka macwe.’ (Mareka 5:5) Usabisa hahulu kuli mane batu basaba kuitusisa nzila yefita bukaufi ni kwafumaneha. Babañwi bakile balika kumutama, kono upumakanga mawenge a kwa mazoho ni kulobaka mawenge a kwa mahutu. Hakuna yakona kumubita.

Muuna yo haatumela Jesu ni kuwela kwa mahutu ahae, madimona amuzamaisa, amuhuwisa kuli: “Ninani taba mañi ni wena, wena Jesu, Mwanaa Mulimu Yapahami ka Kufitisisa? Nikukonkisa ka Mulimu kuli usike wanitukufaza.” Jesu ubonisa kuli unani maata fahalimwaa madimona, ka kulaela kuli: “Zwa ku mutu yo, wena moya omasila.”—Mareka 5:7, 8.

Niti kikuli, muuna yo ukenwi ki madimona amañata. Jesu habuza kuli: “Ki wena mañi libizo?” ualabiwa kuli: “Libizo laka ki na Mpi, kakuli lu babañata.” (Mareka 5:9) Mpi ya Maroma ibanga ni masole babañata-ñata; kacwalo, madimona amañata akeni ku muuna yo ni kumutahiseza manyando. Madimona ao akupa Jesu kuli “asike aalaela kuya mwa mukoti.” Aziba katulo yaona ni yefilwe ku mueteleli waona, yena Satani.—Luka 8:31.

Mwa sibaka se, kufula mutapi wa likulube zebato eza 2,000, ili lifolofolo zesika kena ka kuya ka Mulao mi Majuda habalumelezwi nihaiba kuliluwa. Madimona ali: “Haku lulumele mwa likulube ze, kuli lukene ku zona.” (Mareka 5:12) Jesu uabulelela kuli aye, mi aya ni kukena mwa likulube. Honafo, likulube zebato eza 2,000, limatela fa liñope ni kushwela mwa liwate.

 Balisana ba likulube ze hababona cwalo, bamatela mwa muleneñi ni mwa mahae kuyo biha taba yeo. Batu bataha kuto bona zeezahezi. Habafita, balemuha kuli muuna yo madimona azwile ku yena kikale aiketa mwa munahano. Uapezi liapalo mi uinzi kwa mahutu a Jesu!

Batu babautwa za taba ye kamba bababona muuna yo bakenelwa ki sabo, mi babilaezwa ki lika zeñwi zakaeza Jesu. Bakupa Jesu kuli azwe mwa sibaka sabona. Jesu hakena mwa sisepe kuli afunduke, muuna yo yanaakenwi ki madimona ukupa Jesu kuli aye ni yena. Kono Jesu ubulelela muuna yo kuli: “Uye kwa ndu ku bahabo wena, mi uyo babihela lika kaufela zakuezelize Jehova ni mwakushemubezi.”—Mareka 5:19.

Jesu hañata ulaelanga batu bafolisa kuli basike babulelela mutu ufi kamba ufi ka zateñi bakeñisa kuli halati kuli batu balumele ku yena kabakala litaba zebautwa kwa batu babañwi. Mwa muinelo wo, muuna yanaakenwi ki madimona yo, ki bupaki bobubonisa maata a Jesu mi wakona kupaka kwa batu bao Jesu mwendi haana kubonana ni bona. Bupaki bwahae hape mwendi bukatusa kuyemela Jesu haiba kuba ni piho yefosahalile ka za kushwa kwa likulube. Kacwalo, muuna yo uya ni kukala kushaela mwa Dekapolisi kaufela zamuezelize Jesu.