Pavua bayidi bapingane ku muelelu kua mbuu panyima pa bobu bamane kutuilangana ne lutatu lukole pa mbuu eu, bakatuilangana ne bualu bua dikema. Bantu babidi ba luonji lukole, bakuate kudi bademon, bakapatuka mu nkita ivua pabuipi apu, baya lubilu batangile kudi Yezu! Ntema yabu idi iya kudi umue wa kudibu, pamuapa udi ne tshikisu tshia bungi ne bademon bavua bamukuate kukavua bidimu bia bungi.

Muntu uvua wenza luse eu uvua utambakana butaka. Butuku ne munya uvua ‘wela mbila mu nkita ne ku mikuna, uditapa ne mabue.’ (Mâko 5:5) Bu muvuaye ne luonji lukole, bantu bavua batshina bua kupitshila mu kajila aku. Bamue bantu bakateta bua kumusuika, kadi uvua ukosa shene ne nkanu ivuabu bamusuika ku makasa. Kakuena muntu uvua ne bukole bua kumutekesha to.

Padi muntu eu usemena kudi Yezu, ne udiela ku makasa ende, bademon bavua bamukuate bakamueleshisha lubila ne: “Ndi nebe tshilumbu kayi, Yezu, Muana wa Nzambi Mutambe Bunene? Ndi nkutshipisha mu dîna dia Nzambi bua kunkengeshi to.” Yezu udi uleja mudiye ne bukokeshi pa bademon, padiye utuma dîyi ne: “Patuka munda mua muntu eu, wewe nyuma wa bukoya.”​—Mâko 5:7, 8.

Mu bulelela, muntu eu mmukuata kudi bademon ba bungi. Padi Yezu webeja ne: “Dîna diebe nnganyi?,” diandamuna didi ne: “Dîna dianyi ndi Legona, bualu tudi ba bungi.” (Mâko 5:9, dim.) Legona wa bena Lomo mmuenza ne basalayi binunu bia bungi; nunku, bademon ba bungi mbadisangishe bua kuluisha muntu eu ne bavua basanka padiye ukenga. Badi basengelela Yezu bua “kabatuminyi dîyi bua kuya mu dijimba dile menemene to.” Bidi bimueneka ne: mbamanye tshivua tshibindile, bobu ne mfumuabu Satana.​—Luka 8:31.

Pabuipi apu pavua ngulube mitue ku 2 000 ivua yenda idia, bilondeshile Mikenji, nyama eyi mmikoya, ne bena Yuda kabavua nansha mua kuyimuna to. Bademon badi bamba ne: “Ututumaku mu ngulube bua tubuele munda muayi.” (Mâko 5:12) Yezu kubambila bua kuya, ne bakabuela mu ngulube. Padibu babuelamu, buonso buayi 2 000 idi ipueka lubilu tshipapu, ne idiela mu mbuu.

Padi bantu bavua balama ngulube bamona bualu ebu, badi baya lubilu bua kufikisha lumu elu mu  tshimenga ne mu misoko ya ku mpenga. Bantu bakalua bua kumona tshivua tshienzeke. Pakafikabu, bakamona ne: muntu uvua bademon bapatuke munda muende eu ukavua bimpe ne uvua wenza malu malulame. Bualu bua dikema buvua ne: uvua muvuale bilamba ne musombe ku makasa a Yezu!

Bantu bakumvua bualu ebu anyi bakamona muntu eu bakumvua buôwa, kabavua bajingulule tshivua bualu ebu mua kubapetesha to. Bakalomba Yezu bua umbuke mu buloba buabu. Pakabuela Yezu mu buatu bua kuya, muntu uvuabu bakuate kudi bademon eu wakamulomba bua baye nende. Kadi Yezu wakambila muntu au ne: “Ndaku kuenu kudi balela bebe, ubalondele malu onso adi Yehowa mukuenzele ne luse ludiye mukuleje.”​—Mâko 5:19.

Yezu uvua ukandika bantu bavuaye wondopa bua kabambidi muntu mukuabu tshivuaye muenze bualu kavua musue bua bantu bafike ku dijingulula tshivuaye bilondeshile malu avuabu balondelangana to. Mu nsombelu eu, muntu uvuabu mukuate kudi bademon eu udi tshijadiki tshilelela tshia bukole bua Yezu ne udi mua kuyisha bantu bavua Yezu kayi mua kufika muaba udibu. Bujadiki buende buvua kabidi mua kutuyisha lumu luonso lubi luvuabu batangalaje bua dijimina dia ngulube. Nunku, muntu eu wakaya ne kutuadija kuyisha mu Dekapoli mujima tshivua Yezu mumuenzele.