Omu tumbaji vahetele kungenge yakalungalwiji, vevwile woma chikuma havyuma vyasolokele. Malunga vavali vakutenuka chikuma vejile nakuhumangana Yesu kufuma kuvimbumbe. Malunga kana vapwile navandemone. Yesu ahakile muchima kuli lunga umwe wakutenuka chikuma kuhambakana mukwavo, uze nawa ayanjile hamyaka yayivulu navandemone.

Ou lunga kana apwile nakuhitangana uselesele. Ufuku namusana “apwilenga nakuteta kuvimbumbe nakujipili, nakulipulapula namalolwa.” (Mako 5:5) Atenukilenga chikuma, ngocho kakwapwile mutu ahashile kuhita mujila yize apwilengako. Vatu vamwe vesekele kumukasa malenge najikuli, oloze ambitwojwelenga aze malenge nakuhokwojola jikuli kumahinji enyi. Naumwe wauchi apwile nangolo jakumuhambakana.

Omu uze lunga apandamine kuli Yesu nakuholokela kumahinji enyi, vandemone vamulwezele atambakane ngwenyi: “Ove Yesu, MwanaKalunga ou Wakulitulaho Chikuma, vyuma muka uli nakusaka kuli ami? Ngunakushingisa Kalunga ngwami, kanda unguyanjisako.” Yesu asolwele nge atwama nangolo hali vandemone hakumulweza ngwenyi: “Ove shipilitu wamupi, lovoka muli ou mutu.”—Mako 5:7, 8.

Chapundu vene, ou mutu apwile navandemone vavavulu. Omu Yesu amuhulishile ngwenyi: “Lijina lyove yove iya?” Ikiye amukumbulwile ngwenyi: “Lijina lyami yami Liyongomena mwomwo tuvavavulu.” (Mako 5:9) Liyongomena lyavaLoma lyapwile namakombakaji amaswalale. Ngocho uze lunga hakwamba ngwenyi ikiye liyongomena chasolwele nge muli ikiye mwapwile vandemone vavavulu vaze vamuyanjishilenga. Kaha valembelelele Yesu ngwavo “kanda avalweza vayenga muwina wakuzeneka kukumako.” Ava vandemone vatachikijile vyuma navikavasolokela kulutwe hamwe natwamina yavo Satana.—Luka 8:31.

Jino kwakamwihi kwapwile vangulu 2,000 vaze vapwile nakulya. Kweseka naJishimbi, vangulu vapwile vamajilo, kaha vaYuleya kavatelele kuvahetako. Vaze vandemone vambile ngwavo: “Tutume kuvangulu mangana twingile muli vakiko.” (Mako  5:12) Yesu avetavishile vayenga, kaha vengilile muli vangulu. Ngocho vaze vangulu vosena 2,000 valondomanyine mukalungalwiji.

Omu tufunga vamwene chuma kana, valahile nakuya nakwambulula vyuma kana munganda namulifuchi lyosena. Vatu hakwivwa vyumevi, vejile nakumona vyuma vyasolokele. Hakuheta, vawanyine mutu uze vafumishile vandemone nayoyo. Avwalile nakutwama kumahinji aYesu.

Vatu vaze vevwile chuma kana navaze vamweneko, vevwile woma, kaha kavatachikijile omu chuma kana chalumbunukilileko. Ngocho valwezele Yesu afume mungalila yavo. Omu Yesu engilile muwato, mutu uze apwile navandemone amulembelelele ngwenyi ayenga nenyi hamwe. Oloze Yesu amulwezele ngwenyi: “Yakonga kwimbo lyove kuli vausoko wove, ukavambulile vyuma vyosena nakulingila Yehova nomu nawa nakutetela.”—Mako 5:19.

Kakavulu Yesu akanjilenga vaze okilenga ngwenyi kavatela kulweza mutu numba umweko kuchina vatu navamukavangiza mwomwo yakwivwa kaha mijimbu kana. Oloze Yesu asolwele ngolo atwama najo hakulovola vandemone muli uze mutu, ngocho mutu uze vafumishile vandemone atelele kwambulila vatu vaze pamo ahonene kumona Yesu. Kaha nawa unjiho kana nauhonesa jino kala mijimbu yayipi vahanjikilenga vatu hali vaze vangulu. Ngocho uze lunga aputukile kwambulula muNdekapole yosena havyuma amulingilile Yesu.