Bang’ jopuonjre chandore malich e nam, gigowo kae to girado gi wach moro ma bwogogi ahinya. Ji ariyo mager mokadho, ma nigi jochiende wuok e kar liete man machiegni kendo giringo ka gichomo ir Yesu! Achiel kuom jogo e ma ji oluoro ahinya. Nenore ni mano en nikech oger moloyo kendo osebedo gi jochiende kuom kinde mogwaro.

Ng’atno osegabedo ka wuotho duk. Odiechieng’ gotieno osiko ‘ka okok matek e kar liete gi gode, kendo ojang’adore owuon gi kite.’ (Mariko 5:5) Gerone miyo ji bedo maluor kalo kanyo. Jomoko osetemo tueye. Kata kamano, ojachodo nyoroche kendo turo rateke motuego tiendene. Onge ng’at ma nigi teko ma loye.

Sama ng’atno dhi ir Yesu kendo podho e tiend Yesu, jochiende miyo okok matek kama: “En wach mane ma in-go koda Yesu, Wuod Nyasaye Mamalo Chutho? Kuong’ri gi nying Nyasaye ni ok ibi sanda.” Yesu chiko ni: “Wuog ia kuom ng’atno, in jachien” konyisogo ni en gi teko e wi jochiende.​—Mariko 5:7, 8.

Adier en ni ng’atno nigi jochiende mang’eny. Sama Yesu penjo ni, “Nyingi ng’a?” jachiendno dwoko kama: “Nyinga en Lijion, nimar wang’eny.” (Mariko 5:9) Lijion en kidieny mar oganda lweny mar Rumi moting’o jolweny gana mang’eny. Kuom mano, jochiende mang’eny ni kuom ng’atni, kendo morgi en neno kaka ochandore malit. Gisayo Yesu ni “kik ochikgi mondo gidhi gidonj e abiso.” Nenore ni ging’eyo maber gima oritogi nyime kaachiel gi jatendgi ma en Satan.​—Luka 8:31.

Kueth mar anguche ma kwan-gi nyalo romo 2,000 kwayo machiegni kanyo. Anguche gin le ma ok ler ka luwore gi Chik ma ne omi Jo-Yahudi kendo ok onego gipidhgi. Jochiendego kwayo kama: “Yienwa wadhi ir angucheka mondo wadonj kuomgi.” (Mariko 5:12) Yesu chikogi mondo gidhi, kendo gidonjo e i anguchego. Gikanyono, anguche 2,000 duto ringo matek nyaka e geng nam kendo ginyumore e nam.

Sama jokwath neno gima otimoreno, gidhi mapiyo mondo giter wachno e taon kod gwenge  mokiewo kode. Ji biro mondo gine gima oa timoreno. Ka gichopo, gineno ng’at mogol jochiende kuomeno ka koro ngima kendo pache tiyo malong’o. Sechego orwako lewni kendo obet e tiend Yesu!

Luoro mako joma winjo wachno kata moneno ng’atno, nimar ok ging’eyo ni ang’o ma nyalo timorenegi. Gisayo Yesu mondo oa e gweng’gi. Sama Yesu idho yie mondo odhi, ng’at ma oa gol jochiende kuomeno saye mondo gidhi kode. Kata kamano, Yesu wacho ne ng’atno niya: “Dhi pacho ir wedeni kendo inyisgi gik moko duto ma Jehova osetimoni kod kaka osekechi.”​—Mariko 5:19.

Kinde mang’eny, Yesu wachonega joma osechango ni kik ginyis ng’ato ang’ata nimar ok odwar ni ji oyie kuome mana kokalo kuom weche mijimbo ajimba. Kata kamano, ng’at ma yande nigi jochiendeno biro bedo kaka ranyisi ma nyiso ni Yesu nigi teko maduong’, kendo obiro chiwo neno ne joma Yesu ok bi chopo irgi owuon. Weche ma ng’atno biro wacho ne ji bende biro chiwo neno madier e wi miriambo ma ji nyalo wacho kuom anguche ma ne otho e pi. Omiyo, ng’atno wuok kendo ochako lando e Dekapoli duto gima Yesu otimone.