A Zeezi sẽn tãs sobgã t’a yõk tɩ karen-biisã paam n põsã, b sẽn ta rʋʋndã b yãnda bũmb a to sẽn sek rabeem. Rap a yiib n yi yaadẽ n zoet n segd a Zeezi. Zĩn-dãmb n tar-b hal tɩ nebã zoet-b wʋsgo. Biiblã gomda b nin-yend yell n yɩɩda. Tõe tɩ yaa zĩn-dãmbã sẽn kẽ yẽ hal sẽn kaoose, t’a wẽnemã yɩɩd a to wã yĩnga.

Raoã ra maanda nimbãanega. A ra tolg n kẽnda a zaala. Wĩndg la yʋngo, a “bee yaadẽ wã la tãmsã zut n kelemdẽ, la a pogend a meng ne kuga.” (Mark 5:5) Ra yaa gãeen-toaaga, tɩ ned ra pa saagd n pɩʋʋg a sẽn beẽ wã ye. Neb n mak n na n sẽb-a ne bãens la b balg a naoã ne kutu, la a kaoo fãa. Ned baa a ye ra pa tõe-a ye.

Raoã sẽn kolg a Zeezi n yĩgimd a taoorã, zĩn-dãmbã kɩtame t’a kelem n yeel yaa: “Zeezi! Saasẽ-saasẽ Wẽnnaam bi-ribla, yãmb data maam ne bõe? Mam kota yãmb ne Wẽnnaam yʋʋr tɩ y ra nams maam ye.” Sẽn na yɩl n wilg tɩ yẽ tara tõog zĩn-dãmbã zugu, a Zeezi yeela woto: “Zĩn-dẽgdã! Yi n bas raoã.”—Mark 5:7, 8.

Pa zĩn a yembr n da kẽ raoã ye. Bala a Zeezi sẽn sok-a a yʋʋrã, a leokame yaa: “Mam yʋʋr la a Tusa wã, bala, tõnd yaa wʋsgo.” (Mark 5:9) Dẽnd yaa zĩn-dãmb tusa n sũ taab n kẽ raoã, n kɩt t’a namsd wʋsgo. Zĩn-dãmbã kosa a Zeezi t’a “ra rig-b tɩ b kẽng zĩ-zulungẽ wã ye.” Wõnda b ra mii bãmb ne b taoor soab a Sʋɩtãan baasg sẽn na n yɩ bũmb ningã.—Luk 8:31.

Kurkuy sẽn na maan 2000 n da be be sẽnẽ n wãbdẽ. Sã n yaa ne a Moyiiz tõogã, kurkur yaa rũng sẽn yaa rẽgdo, tɩ zʋɩf-rãmbã pa segd meng n gʋʋl-b ye. Zĩn-dãmbã yeela a Zeezi yaa: “Tʋm-y tõnd kurkuyẽ wã tɩ d tɩ kẽ-ba.” (Mark 5:12) A Zeezi yeelame tɩ b kẽnge, la b sɩd yi n kẽe kurkuyã. Kurkuyã na maan 2000 fãa yii tãngã zug n bõr mogrã pʋgẽ.

Kurkuyã gũudb sẽn yã rẽ wã, b zoeeme n kẽng tẽngã pʋgẽ la tẽn-kɩremsã, n tɩ togs bũmb ning sẽn maanã. Nebã yiime n wa n na n gese. B sẽn ta wã, b mikame tɩ zĩn-dãmbã sẽn yi n bas-a soabã sɩd tar laafɩ, n mi a nenga. A yera futu, n zĩ a Zeezi taoore.

Rabeem yõka sẽn yã-b raoã la sẽn wʋm-b kibarã, bala b ra yɛɛsda a Zeezi na n wa maan-b yelle. Rẽ n so tɩ b bõos a Zeezi t’a yi b tẽngẽ wã tao-tao. A Zeezi sɩd lebg n kẽe koom-koglgã n na n looge. La rao ning sẽn paam a meng ne zĩn-dãmbã yeela a Zeezi t’a rat n tũ-a lame. A Zeezi leok-a-la woto: “Lebg n kuil f nebẽ wã n tɩ wilg bũmb nins fãa Zu-soabã sẽn maan n kõ foomã, la b sẽn zoe fo nimbãaneg to-to.”—Mark 5:19.

Naoor wʋsgo, a Zeezi sã n sãoog neda, a yeta a soab t’a ra togs ned ye. Yaa a sẽn pa rat tɩ nebã tẽ yẽ b sẽn wʋm kibay goalmã yĩnga. La so-kãngã wã, raoã sẽn paam a meng ne zĩn-dãmbã zoe n yaa bũmb sẽn wilgd vẽeneg t’a Zeezi tara tõogo. Sẽn paase, a na n tɩ goma ne neb a Zeezi sẽn pa na n paam n gom ne. Raoã sẽn na n kõ kasetã leb n tõe n sõngame tɩ nebã ra wa yelg goam sẽn pa sɩd kurkuyã kũum wɛɛngẽ ye. Dẽnd a sɩd kẽngame, n moon bũmb ning fãa a Zeezi sẽn maan n kõ yẽnda wã Dekapoll tẽnsã pʋsẽ.