Pa kupera kusongana no mugariro unonesa mu jombe, vajiji vobuda mujombe zve vosurufara ngo zvainga zveciitika. Vanarume vaviri vanothyisa, vano dhimoni, vanobuda ngo mu makuva ainga pamutundhupo, vogogoma vakasota kuna Jesu. Umwe wavo ndiyena ari kunasa kunangwa maningi, kangaije ngo kuti ndiyena ari kunyanya kuvathyisa, dangani ndiyena ari kupengereka maningi kangaije indava yo kuti ndiyena waanomukuvo wakareba akafukwa ngo dhimoni.

Mundhu anosuruvarisa uwu, waifamba mitu. Usiku no masikati “waifamba-famba mu makuva no pa mathundu ecindomima no kujikhuvaza ngo mapuwe.” (Marco 5:5) Iyena waithyisa zvokuti vandhu avacaipindepi ngo ghwanja raidarika ngo pandharaundhepo. Vamweni vanoeja kumusunga mukono no makumbo, asi anodajura zvese. Apana anosimba ro kumunyisa.

Paanokwederera Jesu wowa pamberi po makumbo ake, madhimoni akamufukaya omuitisa kuti akhuwe eciti: “Panenyi pakati penyu no pangu, Jesu, Mwana [wa Mwari] Mukuru-kuru? Ndinomupotesesa mu zina ra Mwari kuti mucanditambuja.” Jesu wovonesa kuti anosimba rinonyisa ro dhimoni eciti: “Budai mu mundhu uu, bjoka rakan’gora!”—Marco 5:7, 8.

Mwanarume uwu wainga akafukwa ngo madhimoni akawanda. Jesu wobvunjisa kuti: “Zina rako ndiwe ani?” Mupinguro ngo wokuti: ‘Zina rangu ndiri Njama, ngokuti tiri vazinji.’ (Marco 5:9) Njama yo vaRoma cainga cikwata co zviuru zvo masoca. Ngo kudaro madhimoni mazinji ari kuhwisana no mwanarume uwu, ecidakara ngo matambujiko ake. Iwona anodeketerera Jesu kuti “atame kumaendesa ku ujiki.” Ngo kuti zvinoita inga kuti ari kuziva zvaari kuda kuithwa no mutungamiriri wao Sathana.—Luka 8:31.

Ku mahavo ari ngo phedopo kuno mutungwa wo nghumba jinokhwedera mutengo wo 2.000. Mutemo wainanga kuti nghumba yakapsipiswa zvokuti apana muJudha waidikana kujirera. Madhimoni akati: “Titumenyi, tinghwine mu nghumba.” (Marco 5:12) Jesu anomabvunja kuti aendeyo, zve iwona akawira nghumba. Ngo kudaro, nghumba jese jinokwana kuita 2.000, jakatanga kugogoma-gogoma,  jecimbhuka mu magomokomo joenda kofira mu jombe.

Vandhu vainga vecihavisa nghumba iji pavakazvivona, vakagogoma vecienda ku dhorobha no kundharaundha jimweni koverengera zvainga zvaitika, zve vandhu vanoenda kovona. Pavanoguma vanovona kuti mundhu wiyani waingaya no madhimoni waamundhu kwaye kamare. Wari wakatosimira wogara pamberi po soka ja Jesu.

Vayani vanovona mwanarume uwu kana kuti vanozwa ngo zvake basi, vanokahamara vacikazwisisi zvazvinoreva kwavari. Ngo kudaro vanokumbira kuti Jesu abude mu mutundhumo. Jesu paanopakira ngarava, mwanarume waingaya no madhimoni, wodeketera kuti aendevo na Jesu. Asi Jesu anomubvunja kuti: “Endai kanyi, ku vandhu vako. Vabvunjei bzese bzaakuitira Tenji [Jehovha], no kuti wakakuitira unyaxa.”—Marco 5:19.

Kazinji Jesu anokumbira vandhu vaanorapa kuti vatame kubvunja vamweni. Ngo kuti aadi kuti vandhu vazive ngo zvake ngo kuzwa ngo vamweni vanonga veciengejera zvigarau. Asi pa ciitiko ici, mwanarume wabviswari dhimoni i citatijo co simba ra Jesu zve angava ucapupu ku vandhu vacizivi kubhuya na Jesu kamare. Zvinozobhuya mwanarume uwu zvingazopeja manyepo angazovepo ngo pamusoro po kuruzika ko 2.000 zvo nghumba. Ngo kudaro mwanarume uwu anotanga kunanga zvaaitihwa ndi Jesu mu Dhekapori mwese.