Vaavaa amuhuserya anaphiyaaya okhopela emanle okumanano yaweeha mu ephareya, awo annahoolela echu yawoopiha. Achu eeli aphariwe ti masololo, annakhuma orweela mmahiyeni awaacamela nave annamuthikirerya Yesu! Saweereya sinamuthokororya xaxaxa mulopwana mmoha, akhweya aari awoopiha nave aalamuleliwa ni masololo mu ilukuluku sincipale.

Mulopwana ola ooluwa onneeceeca moorukurerya ahiwanreechu. Ohiyu ni othana, owo “ànetxetxa mahiye ni miyako, akhuwelaka ni isataka ni maluku.” (Marko 5:5) Owo ootepa oluwa ophiyerya wi achu annoova ovira mu rampha ori makupa yaawo. Akina anneererya ommaka, nyenya onnaphurumula ni okwata mikoi mmeconi mwawe. Haavo muchu onawerya omutalaverya.

Vaavaa mulopwana onamwaacameleiye Yesu ni uuwela vameconi vawe, masololo anamuhoosa annamweeriha okhuwela: “T’evi erivo weyo ni miyo, Yesu, Mwana a Muluku mutokwenesa? Kinnophara metxo, ohikihose!” Yesu onnooniherya wi ookhalano owerya wa othoriha masololo, mu oloca: “Khumamo mwa mutxhu ola, weyano munepa wonanara!”—Marko 5:7, 8.

Mweeparipai, masololo mancipale ari mwa mulopwana yoola. Vaavaa Yesu onamukoheiye, “Nsina ná wáni?” owo onnaakhula “Nsina naka ká Legio; ntakhara n’ri anchipale.” (Marko 5:9, Nlakano Nahihano) Lexio o Roma anakhala macikhwi a anakhoco; mwawiihiiha, masololo mancipale athukumanne mwa mulopwana yoola, epuhaka ohooseya wawe. Awo annamveka “Yesu wi ehikareliwe munikhwatxini nawisa.” Awo akhweya annasuwela yeeyo anahaalaaya weereliwa vamoha ni muhooleli aya, Satana.—Luka 8:31.

Makupa awaacamela sinalyihiwa ikupa waacamela macikhwi meeli, seiyo sinooniwa okhala soothanyeya mwawiiwanana ni Nlamulo nave wi Ayuta hiyaaphwanela okhalano. Masololo annaloca: “Onrume mu nikhùruni na ikupa, wi nivolowe mwemmo!” (Marko 5:12) Yesu onnaruma  nave awo annavolowa mu ikupa. Va weereya yeela, ikupa waacamela macikhwi meeli sinnuuwela mu nikhwacini nave sinnaneela mphareya.

Vaavaa alipa ookukhula ikupa anoonaaya yeela, annaakuvela omwaramwaxa echu ene yeeyo, mmuceche ni epooma yoothene. Achu annarwa wi yoone yeeyo yeeren’ye. Vaavaa anaphiyaaya, awo annoona wi mulopwana yoowo akhummemo masololo vano taphaama ni oomaaleleya. Owo oowara ikuwo nave okiraanthe mukhoveni wa Yesu!

Achu yaawo yiiwale naari aamonne mulopwana yoola annasareya woova. Mmoonelo aya, akhweya anoova vooloca sa ichu seiyo Yesu onahaaleiye opaka. Awo annamveka Yesu wi akhume mmuceche aya. Vaavaa Yesu onaweleiye mmwaaceyani wi apwahe, mulopwana aaphariwe ti masololo onnaveka wi okhala vamoha ni Yesu. Nyenya Yesu onnamuleela ariki: “Hawè owannyà ni walèle ahima-à itxhu sothene Apwiya [Yehova] awerenlaya ni ikharari saya.”—Marko 5:19.

Ikwaha ikina Yesu aanaalamulela yaale aapenuseiye wi ehimuleele muchu nthowa nawi haachuna wi achu ekhalekeno moonelo aya vooloca sa yene orweela mwa ichu soolociwa. Mu yaweereya ela, mulopwana aaphariwe ti masololo yawooniherya yeeparipari ya owerya wa Yesu nave onanwerya ovaha onamoona wa achu yaawo Yesu eereiye ahaaphwanye. Onamoona awe onanwerya tho ovaanya yooloca vyakala vooloca sa orimeela wa ikupa. Mwawiihiiha mulopwana onnapwaha nave onnapacerya ovuwiha o Tekapoli woothene yeeyo Yesu omweerenleiye.