Yachakorqanchej jina, Jesuspa yachachisqasnenqa mancharisqa kasharqanku Galilea qochapi sinchʼi wayra kasqanrayku. Chantá qochata chimpaytawan watejmanta mancharikullarqankutaj. ¿Imataj karqa? Iskay runas panteonmanta llojsimuspa Jesusman correrqanku. Chay runasqa supayniyoj karqanku, manchay phiñastaj. Jinapis ujnin runaqa, ichá aswan phiña karqa chayri ichá aswan unaytaña supayniyoj karqa. Bibliamanta Marcos, Lucas librostajrí, chay runasmanta parlaspa ujnillanmanta willawanchej.

Chay runaqa llakiyta qʼalalla purikoj. Payqa “tuta pʼunchay panteonpi, orqospipis qhaparispallapuni purej, rumiswantaj qʼallurakoj” (Marcos 5:5). Maypichus chay phiña runa kasharqa chaynintaqa, ni pipis pasayta munajchu. Chay runa phiña kasqanrayku, wakin runasqa chakisninta, makisnintapis cadenaswan wataj kanku. Paytajrí cadenasta pʼitiraj. Paytaqa nipuni pipis japʼiyta atejchu.

Chay runaqa, Jesusman qayllaykuytawan qonqoriykukorqa. Supaykunataj chay runata sinchʼita qhaparicherqanku: “Jesús, Aswan Patapi kaj Diospa Wawan, ¿ima ruwanay tiyan qanwan? Diospa sutinpi juraway, ama ñakʼarichinawaykita”, nispa. Chantá Jesús nerqa: “Supay, llojsiy chay runamanta”, nispa (Marcos 5:7, 8). Ajinamanta Jesusqa rikucherqa supaykunamanta aswan atiyniyoj kasqanta.

Chay supayniyoj runamanqa ashkha supaykuna yaykusqanku. ¿Imaraykutaj chayta ninchej? Imaraykuchus Jesusqa chay runata taporqa: “¿Ima sutiyki?”, nispa. Paytaj kuticherqa: “Suteyqa Tropa, ashkha kasqaykurayku”, nispa (Marcos 5:9). Arí, chay runataqa ashkha supaykuna ñakʼarichisharqanku. Chantá chay supaykunaqa, Jesusmanta mayta mañakorqanku “ama paykunata chinkay ukhuman kachananta”. Paykunaqa ichapis cuentata qokorqanku, Satanaswan khuska chinkay ukhuman wijchʼusqa kanankumanta (Lucas 8:31).

Jesús kasharqa chay qayllapeqa, casi 2.000 khuchista michisharqanku. Diospa Leyninman jinataj khucheqa chʼichipaj qhawasqa karqa. Chayraykutaj judiosqa mana khuchista uywanankuchu karqa. Supaykunatajrí Jesusman nerqanku: “Saqewayku khuchisman yaykojta”,  nispa (Marcos 5:12). Jesustaj saqerqa yaykunankuta. Entero khuchistaj qaqanta qochaman wijchʼuykukorqanku.

Khuchista michej runasqa, chayta usqhayllata willaramorqanku llajtapi, llajtaj jawanpipis. Runastaj imachus kasqanta qhawaj rerqanku. Jesusta taripaytawanqa, supayniyoj karqa chay runata sanitota, ropayojtataj rikorqanku. Chay runaqa yuyayninpi kasharqa, Jesuswan khuska tiyasqataj.

Supayniyoj karqa chay runamanta parlajta uyarejkuna, chay runata rikojkunapis mancharisqas kasharqanku. Paykunaqa sonqonkupi nisharqanku: “¿Imataj kayri?”, nispa. Chantá Jesusta rogakorqanku jallpʼankumanta ripunanta. Jesustaj uj barquitoman wicharerqa ripunanpaj. Supayniyoj karqa chay runaqa, Jesusmanta mañakorqa paywan rejta saqenanta. Jesustajrí nerqa: “Ripullay wasiykiman. Familiasniykiman willamuy imastachus Jehová Dios qanrayku ruwasqanta, khuyakususqantapis”, nispa (Marcos 5:19).

Chantá chay runaqa tukuynin Decapolispi willarqa imatachus Jesús paypaj ruwasqanmanta. Jesusqa pikunatachus sanoyacherqa, chay runasman nerqa: “Amapuni pimanpis kaytaqa willankichu”, nispa. Payqa mana munarqachu cuentonejllata paymanta yachanankuta. Jinapis supayniyoj karqa chay runaman mana imatapis kamacherqachu. Imajtinchus chay runaqa niyta atinman karqa: “Noqataqa Jesús sanoyachiwarqa, payqa atiyniyoj, tʼukuna imastataj ruwan”, nispa. Chantapis payqa, willayta aterqa imaynapichus khuchis wañusqankuta.