Jesuspa qatiqninkunaqa lamar quchapi sasachakusqankumantam patanmanña chayaruspanku aswanraq mancharikurqaku. ¿Imanasqa? Demonioyuq piñasqallaña iskay runakuna panteonmanta lluqsiramuspa Jesusman asuykusqanraykum. Marcoswan Lucasñataqmi huk kaqnillanmanta willakunku. Ichapas huk kaqnillanmantaqa willakuqku aswan piñasqallaña hinaspa aswan unayña demonioyuq chay runa kasqanrayku.

Chay runaqa qalallam puriq. “Tuta-punchawmi panteonkunapipas urqukunapipas qaparkacharqa hinaspa rumikunawan kuchukurqa” (Marcos 5:5). Llumpay piñallaña kaptinmi runakunapas manchakuspanku paypa kasqan lawnintaqa mana puriqkuchu. Chaymi wakinqa fierromanta ruwasqa chaqnanakunawan hinaspa cadenakunawan wataruqku, ichaqa tipiparuqmi. Chayraykum manaña ima ruwaytapas atiqkuchu.

Chayna runam Jesusman asuykuspan ñawpaqninpi kumuykurqa. Hinaptinmi demoniokuna kallpawan qaparichiptin nirqa: “¿Imatam ñuqawan munanki hanaq pacha Diospa churin Jesus? Diosrayku juramentay ama ñakarichiwanaykipaq”, nispa. Jesusñataqmi demoniokunamantapas aswan atiyniyuq kasqanta qawachispan nirqa: “¡Yaw mana allin espiritu, kay runamanta lluqsiy!”, nispa (Marcos 5:7, 8).

Chay runaqa achka demonioyuqmi karqa, chaymi sutinmanta Jesus tapuptin nirqa: “Sutiyqa Tropam, achkallaña kasqaykurayku”, nispa (Marcos 5:9). Imaynam Roma nacionpa huknin tropanpiqa waranqantin soldadokuna karqaku, chaynam demoniokunapas chay runapiqa achkallaña karqaku. Chay runachata ñakarichispa kusikuq demoniokunaqa Jesustam ruegakurqaku “uku-uku uchkuman” paykunata ama wischuykunanpaq. Paykunawan satanasqa yachakunkum chinkachisqa kanankuta (Lucas 8:31).

Chay kasqanku lawpim yaqa 2.000 kuchikuna mikuchkarqaku, chaytaqa Diospa kamachikuyninman hinam judio runakunaqa mana uywaqkuchu. Chaymi demoniokunaqa Jesusta nirqaku: “Achkallaña kuchikunaman yaykunaykupaqyá kamachiwayku”, nispa (Marcos 5:12). Hinaspam demoniokunaqa Jesus kachaykuptin  runamanta lluqsispanku kuchikunamanña yaykururqaku. Chaynapim lliw kuchikuna lamar quchaman qaqanta pawaykuspa wañururqaku.

Chayta qawaspankum kuchi michiqkunaqa llaqtaman ayqikuspanku tukuy chaykunamanta willakurqaku. Hinaptinmi runakunaqa qawaq rirqaku, hinaspam chay demonioyuq runataqa pachasqata, yuyayninman kutisqata hinaspa Jesuspa ñawpaqninpi tiyachkaqta tarirurqaku.

Runakunañataqmi Jesusmanta mancharikurqaku imatapas ruwarunanta piensaspanku. Chaymi llaqtankumanta pasakunanpaq nirqaku. Chaynapim boteman Jesus qispiruptin chay demoniopa saqisqan runañataq qatikuyta munarqa. Jesusñataqmi nirqa: “Ripukuy wasikiman hinaspa willakamuy aylluykikunaman Jehova Dios qampaq tukuy ima ruwasqanmanta hinaspa llakipayasusqaykimanta”, nispa (Marcos 5:19).

Lliw hampisqan runakunatam Jesusqa niq ama pimanpas willakunankupaq, payqa manam munaqchu imapas ruwasqanmanta uyarisqankuraykulla runakuna payta qatinankutaqa. Chay demoniopa saqisqan runatam ichaqa imayna yanapasqanmanta llaqtamasinkunaman willakunanpaq nirqa, chay llaqtamasinkunaqa manam kikin Jesusmantaqa imatapas uyarirqakuchu. Chaynata willakuptinqa imaynanpi kuchikuna wañusqanmantapas imam kaqtam yachananku karqa. Chaymi chay runaqa kutikuspan lliw Decapolis lawpi Jesuspa ruwasqanmanta willakurqa.