Pidamala iwo kuthimbana na condzi m’bara, anyakupfundza abuluka m’mwadiya, mbaona cinthu cinango cakudzumisa. Amuna awiri akugopswa, pontho akhali na madimonyo abuluka nakuthamanga m’masiye akhali cifupi na penepo mbaenda kuna Yezu! Maevanjelyu asalonga pidacitikira m’bodzi wa iwo, panango thangwi akhali wakugopswa kakamwe, pontho thangwi yakutongwa na madimonyo mu ndzidzi uzinji.

Mamuna unoyu akhali m’makhaliro akutsukwalisa, pontho akhafamba cipezipezi. Masiku na masikati ‘akhakhuwa m’masiye na m’mapiri mbatemeka-temeka ekhene na miyala.’ (Marko 5:5) Iye akhali wakugopswa kakamwe kwakuti anthu akhagopa kupita na njira ineyi. Anango akhayesera kun’manga, mbwenye iye akhathumula maunyolo m’mikono na m’miyendo. Nkhabe munthu akhakwanisa kum’phata.

Pidafika mamuna unoyu dhuzi na Yezu, agwa pa miyendo yace. Madimonyo akhadamphata ancitisa kukhuwa: ‘Musafunanji na ine, Yezu, Mwana wa Mulungu Wankulu Kakamwe? Ndinakuphembani toera mudumbire mu dzina ya Mulungu kuti nee munandithabusa.’ Buluka penepo Yezu apangiza kuti ali na mphambvu kakamwe kupiringana madimonyo mbalonga: ‘Iwe dimonyo, buluka muna mamuna uyu.’—Marko 5:7, 8.

Mwandimomwene mamuna unoyu akhali na madimonyo mazinji. Yezu abvundza: “Dzina yako, ndiwe ani?” Iye atawira: ‘Ndine Nsoka, thangwi ndife azinji.’ (Marko 5:9) Nsoka ubodzi Waciroma ukhali na anyankhondo azinji. Natenepa, madimonyo mazinji athabusa mamuna unoyu mbakomerwa na kuthabuka kwace. Iwo adembetera Yezu toera ‘akhonde kuaendesa mu djenje.’ Pisaoneka kuti iwo akhadziwa pinafuna kudzaacitikira pabodzi na ntongi wawo Sathani.—Luka 8:31.

Dhuzi na penepo, pakhali na nkhumba cifupi na 2.000. Mwakubverana na Mwambo, nkhumba zikhali zakukhonda cena, pontho Ayuda nee akhafunika kuzifuya. Madimonyo alonga: ‘Titumizeni pyathu muna nkhumba.’ (Marko 5:12) Yezu aatawirisa toera kupita mu nkumbi wa nkhumba. Buluka penepo, nkhumba zonsene pikwi piwiri zatoma kuthamanga mbizienda kagwera m’bara mbizifa.

 Ale akhatsalakana nkhumba pidaona iwo pyenepi, athamanga mbaenda kapanga anthu mu nzinda na pisa pya cifupi. Natenepa anthu aendambo kaona pyenepi. Pidafika iwo kweneko, aona kuti mamuna ule akhali na madimonyo ali mwadidi, pontho akucita pinthu mwandzeru. Kusiyapo pyenepi, iye akhadabvala nguwo mbakhala cifupi na Yezu!

Anthu adaona na adabva pidacitikira mamuna unoyu adzumatirwa, thangwi nee akhadziwa kuti pyenepi pikhabvekanji kwa iwo. Na thangwi ineyi iwo aphemba Yezu toera abuluke mu cisa cawo. Pikhakwira iye m’mwadiya, mamuna unoyu wakuti nee akhalibve na madimonyo adembetera toera aendembo na Yezu. Mbwenye Yezu ampanga: ‘Ndoko kunyumba kuna abale ako, ukaapange pinthu pyonsene pidakucitira Yahova, na ntsisi zidapangiza iye kuna iwe.’—Marko 5:19.

Kazinji kene Yezu akhapanga anthu akhawangisa iye toera akhonde kulonga kuna anango kuti iye awangiswa thangwi nee akhafuna kuti anthu andziwe kubulukira ku pinthu pyakudzumisa pikhacita iye. Mbwenye cakucitika ceneci cakubuluswa madimonyo ndi cipangizo camphambvu ya Yezu, pontho mamuna unoyu akhafunika kupereka umboni mbuto zakuti Yezu nee mbadazifika. Pontho pikhafuna kulonga mamuna unoyu mbipidacitisambo kuti anthu akhonde kulonga pinthu pyakuipa thangwi yakuluza nkhumba zawo. Na thangwi ineyi, mamuna unoyu atoma kupanga anthu onsene a ku Dhekapoli pidancitira Yezu.