I te taimi ne toe ‵foki atu ei a soko mai tua o te fakalavelave ne tupu i te tai, ne fe‵paki latou mo se mea fakapoi. Ne ‵tele atu ki a Iesu se avā tāgata fakama‵taku, mai i se koga tanu tino ‵mate telā e pili atu, kae e ulufia ne temoni! Ne fakasino malosi atu ki te tagata e tokotasi mai i a lāua konei, kāti me e sili atu tena amio fakasaua kae ne puapuaga a ia i temoni i se taimi leva ‵ki.

Ne fano fuafua sāle te tagata fakaalofa tenei. I ao mo po “e pakalaga faeloa a ia i tanuga mo mauga kae selesele tena foitino ki fatu.” (Maleko 5:5) Ne uiga fakasaua malosi tou tagata, telā e ma‵taku a tino ke olo atu i te auala tenā. Ne taumafai a nisi tino ke saisai a ia, kae ne motumotu faeloa ne ia a seni kae ofa foki ne ia a pikifao i ana vae. E seai eiloa se tino e lava tena malosi ke taofi aka tou tagata.

I te fanatuga o te tagata tenā ki a Iesu kae ne fakasiga i ona mua, ne fai ne temoni i loto i a ia tou tagata ke pakalaga atu: “Ne a aku mea ne fai ki a koe, e Iesu, te Tama a te Atua Tafasili i te Maluga? Tauto mai i te igoa o te Atua me ka se fakapuapuaga ne koe au.” Ne fakaasi atu ne Iesu tena pulega ki luga i temoni, mai te—fakatonu atu: “Vau ki tua mo te tagata tenā, a koe te agaga masei.”—Maleko 5:7, 8.

A te ‵tonuga loa, ne ulufia a te tagata tenā ne temoni e tokouke. I te taimi ne fesili atu ei a Iesu: “Ko oi tou igoa?” tenei te tali: “A toku igoa ko Lekeono, me e tokouke matou.” (Maleko 5:9) Ne aofia eiloa a te fia afe o sotia i te lekeono Loma; tela la, ne ‵kau fakatasi eiloa a temoni ke fakamasei atu ki te tagata tenei, kae fia‵fia ki ana logo‵maega. Ne fakamolemole atu latou ki a Iesu “ke se afuli latou ki te lua ‵poko.” E foliga mai me ko iloa ne latou a mea kolā e faka‵tali mai mō latou katoa fakatasi mo te lotou takitaki, ko Satani.—Luka 8:31.

Ne kai‵kai se lafu puaka e nofo ki se 2,000 i se koga pili mai, ne manu kolā e se ‵ma e ‵tusa mo te Tulafono kae e se ‵tau o isi ne manu penā a te kau Iutaia. Ne fai atu te kau temoni: “Uga atu matou ki puaka, ko te mea ke ulu atu matou ki loto i a latou.” (Maleko 5:12) Ne fai atu a Iesu ki a latou ke olo kae ne ulu atu latou ki puaka konā. Ne fakatau‵tele ifo ei a puaka katoa konā e 2,000 ki te kaugutu o te mauga kae ne ma‵lemu i te tai mai lalo.

I te laveaga ne tino tausi puaka a te mea tenā, ne ‵tele fakavave atu ei latou o faka‵pa atu te tala tenā ki  te fa‵kai mo koga i tafa i ei. Ne ua‵lolo atu a tino ke onoono ki te mea ne tupu. I te okoatuga o latou ki konā, ne lavea atu ei ne latou te tagata telā ne o‵mai ki tua a temoni mai i a ia, ko ‵lei nei. Ko pei ana gatu kae sagasaga atu tou tagata i mua o Iesu!

Ne ma‵taku ‵ki a tino kolā ne lagona ne latou te mea tenei io me ne lavea ne latou te tagata tenei, kae ne seki malamalama latou i te uiga o mea konei. Ne fakamolemole malosi atu latou ki a Iesu ke fano kea‵tea mai i te lotou fenua. I te taimi ne sopo atu a Iesu ki te poti, ne fakamolemole atu te tagata telā ne ulufia muamua ne temoni, ke fanatu foki a ia. Kae ne fai atu a Iesu ki te tagata: “Fano ki ou kāiga kae fakailoa atu ki a latou a mea katoa kolā ko oti ne fai ne Ieova mō koe mo te alofa fakamagalo ne fakaasi atu ne ia ki a koe.”—Maleko 5:19.

Ne masani o fakatonu atu a Iesu ki a latou kolā ne faka‵lei ne ia ke mo a ma fakamatala atu a mea konā ki nisi tino, me e se manako a ia ke fakaiku aka ne tino olotou manatu e uiga ki a ia ona fua ko tala fakaofoofogia ne lagona ne latou. I konei, ne fai a te tino telā ne ulufia muamua ne temoni, mo fai se fakamaoniga ola e uiga ki te ‵mana o Iesu kae e mafai foki o talai atu a ia ki tino kolā kāti ka se mafai o oko atu a Iesu ki ei. Ka fai foki a ia mo fai se fakamaoniga ki te tala sē ‵lei e uiga ki te ‵mate o puaka konā. Tela la, ne fanatu eiloa te tagata telā ne ulufia muamua ne temoni kae kamata o folafola atu i Tekapoli kātoa a mea ne fai ne Iesu mō ia.