A tapae ai te mau pǐpǐ i uta i muri iho i to ratou faaûraa i te vero, ua horuhoru roa ratou. Haere maira e piti tane taehae ua uruhia e te demoni na roto mai i te vahi hunaraa i pihai iho noa mai, e horo tia maira ia Iesu ra! Hoê noa o raua tei faahitihia, peneiaˈe mea ino aˈe o ˈna e mea maoro aˈe to ˈna ururaahia e te demoni.

I haere hanoa na teie tane mea aroha hoi ma te ahu ore. I te po e te ao, “na te vahi hunaraa e te mau mouˈa, i tutuô noa na oia, o tei mutumutu hanoa ia ˈna iho i te ofai.” (Mareko 5:5) No to ˈna taehae, i riaria na te taata i te haere na taua eˈa ra. Ua tamata vetahi i te taamu ia ˈna, ua mutu râ te fifi ia ˈna e ua huˈahuˈa roa te auri i nia i to ˈna avae. Aita i mau i te taata ia tapea ia ˈna.

A tapiri mai ai teie tane ia Iesu e a tuturi ai i to ˈna pae avae, rave aˈera te mau demoni i roto ia ˈna e ia tuô oia: “Eaha ta oe ohipa i ǒ nei, Iesu, Tamaiti a te Atua Teitei? Ia horeo mai oe i te iˈoa o te Atua e e ore oe e haamauiui ia ˈu.” Faaite ihora Iesu e e mana to ˈna i nia i te mau demoni, a faaue ai: “Haere i rapae i tera taata, oe te varua viivii.”—Mareko 5:7, 8.

Mea rahi hoi te demoni i roto i teie tane. I to Iesu uiraa, “O vai to oe iˈoa?” pahono maira te demoni: “O Nuu, mea rahi hoi matou.” (Mareko 5:9) Hoê nuu Roma, ua tausani ïa faehau. Mea rahi ïa te demoni i roto i teie tane e ua au roa ratou e haamauiui ia ˈna. Taparu maira ratou ia Iesu “eiaha e faaue ia ratou ia haere i roto i te abuso.” E au ra e ua taa ia ratou eaha te tiai mai ra ia ratou e to ratou aratai o Satani.—Luka 8:31.

Piri i te 2 000 puaa te amu ra i te maa na pihai iho mai. E animara viivii teie ia au i te ture a Mose e eiaha roa ˈtu te ati Iuda e faaamu. Na ô maira te mau demoni: “A tuu ia matou i roto i te mau puaa.” (Mareko 5:12) Parau atura Iesu ia ratou ia haere, e tomo aˈera ratou i roto i te mau puaa. Horo atura na 2 000 puaa, topa ˈtura i roto i te miti na nia mai i te pari e paremo aˈera.

A ite ai te mau tiai puaa i te reira, horo aˈera  ratou e faatia na te oire e na te mataeinaa i te ohipa i tupu, e haere maira te taata e hiˈo. A tae mai ai ratou, ite aˈera ratou i te tane ua haere te mau demoni i rapae, mea maitai e ua afaro te feruriraa. E ahu to ˈna e te parahi ra oia i te pae avae o Iesu!

Mǎtaˈu roa ihora te feia tei faaroo i te ohipa i tupu aore ra tei ite i taua tane ra. Aita ratou e taa ra eaha te tupu i nia ia ratou. Parau onoono maira ratou ia Iesu ia faarue mai i to ratou fenua. A haere ai Iesu i nia i te poti e fatata ra i te reva, taparu maira te tane tei uruhia na i te demoni ia pee oia ia ˈna. Parau atura râ Iesu: “A hoˈi i to oe fare, i to oe mau fetii, e a faatia ˈtu i te mau mea atoa ta Iehova i rave no oe e i to ˈna aroharaa ia oe.”—Mareko 5:19.

I faaue na Iesu i te feia ta ˈna i faaora te maˈi eiaha e faaite i te reira. Aita hoi oia i hinaaro ia ite te taata o vai o ˈna na nia noa i te mau mea faahiahia roa ta ratou i faaroo. No te tane râ tei uruhia na i te demoni, o ˈna te haapapuraa ora o to Iesu mana, a faaite haere atu ai oia i ta Iesu i rave i te feia eita Iesu e farerei roa ˈtu. E nehenehe atoa ta ˈna haapapuraa e faahapa i te mau parau tano ore no nia i te mau puaa tei paremo. Haere atura ïa te tane e faaite ati aˈe Dekapoli i ta Iesu i rave no ˈna.