Pagduong han mga disipulo ha baybayon katapos han ira makaharadlok nga eksperyensya ha dagat, natigdaan hira ha ira nakita. May duha nga magpintas hinduro nga lalaki, nga ginsaniban hin mga demonyo, nga ginawas tikang ha hirani nga sementeryo ngan dinalagan ngadto kan Jesus! Usa ha ira an nagin sentro han atensyon, posible tungod kay mas bayolente hiya ngan mas maiha na nga ginkukontrol han mga demonyo.

Ini nga makalolooy nga tawo naglilinakat-lakat nga hubo. Adlaw ngan gab-i, “naggiginuliat hiya ha mga lubnganan ngan ha kabukiran ngan ginsasamad niya hin bato an iya kalugaringon.” (Marcos 5:5) Mapintas hiya hinduro salit an mga tawo nahahadlok pag-agi hito nga dalan. May mga nagsari paggapos hin kadena ha iya mga tiil ngan kamot pero nauutod niya ito. Waray gud nakakapugong ha iya.

Dumaop an tawo kan Jesus ngan yumukbo ha iya tiilan, katapos ginpaguliat hiya han mga demonyo nga nagkukontrol ha iya: “Ano an imo tuyo ha akon, Jesus, Anak han Gihitaasi nga Dios? Pagsumpa ha Dios nga diri mo ako pasasakitan.” Iginpakita ni Jesus nga may awtoridad hiya ha mga demonyo, hiya nagsugo: “Gawas tikang hito nga tawo, ikaw nga maraot nga espiritu.”—Marcos 5:7, 8.

Ha pagkamatuod, an tawo ginsaniban hin damu nga demonyo. Han nagpakiana hi Jesus, “Ano an imo ngaran?” binaton hiya: “Lehiyon an akon ngaran, kay damu kami.” (Marcos 5:9) An lehiyon ha Roma ginkukompwesto hin yinukot nga kasundalohan; salit, damu nga demonyo an nagsanib hini nga tawo ngan nalilipay nga pasakitan hiya. Nakimalooy hira kan Jesus nga “diri hira pakadtoon ha kahiladman.” Posible nga maaram hira han mahitatabo ha ira ngan ha ira lider nga hi Satanas.—Lucas 8:31.

Ha unhan may nangangaon nga mga 2,000 nga baboy, mga hayop nga mahugaw sumala ha Balaud ngan diri ngani angay atamanon han mga Judio. An mga demonyo nagsiring: “Pakadtoa kami ha mga baboy basi makasulod kami ha ira.” (Marcos 5:12) Ginsidngan hira ni Jesus nga sumulod ha mga baboy, ngan ito an ira ginbuhat. Tungod hito, ngatanan nga 2,000 nga baboy nagkalayog ha pangpang ngan nagkalulumos ha dagat.

Han makita ini han mga nag-aataman han baboy, nagdagmit hira pagsumat hito ha mga tawo ha syudad ngan mga baryo. Kumadto an mga tawo basi makita an nahitabo. Pag-abot nira, nakita nira nga nag-opay na an tawo nga ginsaniban hadto, ngan normal na an iya panggios. May bado na hiya ngan nalingkod ha tiilan ni Jesus!

An mga nakabati ngan nakakita hini nahadlok gud. Nababaraka hira kon ano pa an iba nga bubuhaton ni Jesus. Ginsagda nira hi Jesus nga bumaya ha ira lugar. Han sinakay na hi Jesus ha baluto, an ginsaniban hadto nga tawo nakimalooy nga paupdon hiya. Pero ginsidngan hiya ni Jesus: “Uli ha imo mga paryente, ngan isumat ha ira an ngatanan nga ginbuhat ni Jehova para ha imo ngan an kalooy niya ha imo.”—Marcos 5:19.

Kasagaran na nga gintutugon ni Jesus an iya mga gintambal nga diri magsumat ha bisan hin-o tungod kay diri niya karuyag nga an huhunahunaon han mga tawo mahitungod ha iya iginbasar ha ginpasobrahan nga mga sumat. Pero hini nga kahimtang, an tawo nga ginsaniban hadto usa nga ebidensya han gahum ni Jesus ngan makakagpamatuod ha mga tawo nga diri personal nga makakaistorya ni Jesus. An iya mga isusumat mahimo liwat magin baton kon may-ada diri maopay nga sumat mahitungod ha kamatay han mga baboy. Salit an tawo linakat ngan nagtikang pagpasamwak ha bug-os nga Decapolis mahitungod ha ginbuhat ni Jesus ha iya.