KAPITE 45
Neʼe Ina Maʼu Te Pule Ki Te ʼu Temonio ʼe Tokolahi
MATEO 8:28-34 MALEKO 5:1-20 LUKA 8:26-39
-
ʼE INA KAPU HE ʼU TEMONIO KE NATOU ULU KI HE FAGA PUAKA
ʼI te tau mai ʼa te kau tisipulo ki te matatai hili ia te aluʼaga fakamataku ʼae neʼe hoko kia natou ʼi te tai, neʼe natou sisio ai ki he meʼa fakapunamaʼuli. Neʼe ʼi ai he ʼu tagata ʼe toko lua neʼe nā ʼomai mai te tanuma pea neʼe nā feleleʼi kia Sesu. Neʼe agamalohi te ʼu tagata ʼaia pea neʼe ulu sino ia naua he ʼu temonio. Kaʼe neʼe talanoa tafito leva ʼi te ʼu evaselio ʼa Maleko mo Luka ki te tagata ʼe tahi, lagi he neʼe agamalohi age ia pea neʼe kua fualoa ia tona puleʼi e te kau temonio.
Ko te tagata fakaʼofaʼofa ʼaia neʼe fealuʼaki telefua. “Neʼe pakalaga tuʼumaʼu, ʼi te ʼaho mo te po, ʼi te tanuma mo te ʼu moʼuga pea neʼe ina hifi tona sino ʼaki ni foʼi maka.” (Maleko 5:5) ʼI te agamalohi ʼa te tagata ʼaia neʼe matataku ai te hahaʼi ʼi te fakalaka ʼo ovi ki ai. Neʼe faigaʼi e ʼihi ke natou haʼi ia ia, kaʼe neʼe ina maumauʼi te ʼu seini, ʼo feia mo te ʼu haʼi ʼi ʼona vaʼe. Neʼe mole feala ki he tahi ke ina puke ia ia.
Neʼe fakaovi mai te tagata kia Sesu pea neʼe tuʼutuli ifo ʼi ʼona muʼa. Pea ko te ʼu temonio ʼae neʼe natou puleʼi ia ia, neʼe natou uga ia ia ke kalaga fenei: “Kotea ʼae ʼe ke fai ʼi heni, Sesu, ʼAlo ʼo te ʼAtua Maʼoluga? Ke ke fakamoʼoni mai ia muʼa ʼo te ʼAtua ʼe mole ke fakamamahiʼi anai au.” Neʼe fakaha leva e Sesu ʼe ina maʼu te pule ki te kau temonio, ʼo ina fakatotonu fenei: “Laumalie kovi, mavae mai te tagata ʼaena.”—Maleko 5:7, 8.
ʼI tona fakahagatonu, neʼe kaugā malie ia te kau temonio ʼae neʼe ulu sino ʼi te tagata ʼaia. ʼI te fehuʼi fenei age e Sesu “Ko ai tou higoa?” neʼe ina tali fenei age: “Ko toku higoa ko Lesio, he ʼe matou kaugā malie.” (Maleko 5:9) Ko he lesio neʼe ko he foʼi kautau ʼo te kau Loma, pea neʼe natou toko lauʼi afe. Koia neʼe tokolahi te kau temonio ʼae neʼe fakatahitahi moʼo fakamamahiʼi te tagata ʼaia pea neʼe natou fiafia ai. Neʼe natou kole mamahi age kia Sesu “ke ʼaua naʼa ina fakatotonu age ke natou olo ki te vanu.” ʼE mahino ia neʼe natou iloʼi ia te aluʼaga ʼae ka hoko kia natou pea mo tonatou pule ia Satana.—Luka 8:31.
Pea neʼe ʼi ai te ʼu puaka ʼe teitei 2 000 neʼe taka kai ʼi te koga meʼa ʼaia. Neʼe ui ʼi te Lao neʼe ko he manu ʼe heʼe maʼa pea neʼe mole tonu ke ʼi ai he manu feia ʼa he tagata Sutea. Neʼe ui fenei e te kau temonio: “Fakagafua mai ke matou ulu ki te faga puaka.” (Maleko 5:12) Neʼe ui age e Sesu ke natou olo ʼo ulu ki te faga puaka. Pea neʼe feleleʼi te faga puaka ʼo fetoki ʼi te mata mato ki te tai ʼo natou malelemo fuli ai.
ʼI te sisio ʼa te ʼu tagata fagai puaka ki te faʼahi ʼaia, neʼe natou foimo olo atu aipe ʼo fakaha te logo ʼi te kolo pea mo ʼona tafaʼaki. Neʼe ʼomai ai ia te hahaʼi ʼo sisio ki te meʼa ʼae neʼe hoko. ʼI tanatou tau mai, neʼe natou tokagaʼi ko te tagata ʼae neʼe mavae ai ia te kau temonio, kua lelei pea kua toe maʼu tona ʼatamai. Kua tui ʼona teu pea ʼe nofo ia vaʼe ʼo Sesu.
Ko te hahaʼi ʼae neʼe logo ki te palalauʼi ʼo te faʼahi ʼaia mo natou ʼae neʼe sisio ki te tagata ʼaia neʼe natou matataku. Neʼe natou tuʼania te ʼu meʼa ʼae ka fai e Sesu. Koia neʼe natou kole ai kia Sesu ke mavae ʼi tonatou koga fenua. ʼI te temi ʼae neʼe heka ai Sesu ki te vaka ke alu, ko te tagata ʼae neʼe mavae ai te ʼu temonio neʼe ina kole age ke nā olo. Kaʼe neʼe ui fenei age e Sesu ki te tagata: “Alu ki tou ʼapi, ki tou famili, ʼo fakamatala age kia natou ia meʼa fuli neʼe fai e Sehova maʼa koe pea mo te manavaʼofa ʼae neʼe ina fakaha atu.”—Maleko 5:19.
ʼI te agamahani, neʼe fakatotonu e Sesu kia natou ʼae neʼe ina fakamalolo ke ʼaua naʼa natou fakaha ki he tahi, koteʼuhi neʼe mole ina loto ke tui te hahaʼi kia te ia ʼuhi pe ko te ʼu fakamatala fakaofoofo ʼae neʼe natou logo ki ai. Kaʼe ʼi te aluʼaga leva ʼaeni, ko te meʼa ʼae neʼe hoko ki te tagata ʼae neʼe mavae ai te ʼu temonio, neʼe ha ai te malohi ʼo Sesu pea neʼe feala ke ina fakamatala kia natou ʼae neʼe lagi mole kaku ki ai ia Sesu. ʼAki tana fakamatala ʼaia neʼe toe feala foki ke fakagata ai te ʼu valoki ʼa te hahaʼi ʼuhi ko te mamate ʼo te faga puaka. Koia, neʼe alu leva te tagata ʼo kamata fakamatala ʼi Tekapole katoa ia meʼa fuli ʼae neʼe fai e Sesu maʼa ia.