Despué de ni bizaaca ca discípulo que lu nisadóʼ, yendacaʼ sti ladu nisadóʼ ne raqué bizaacacaʼ sti cosa ni guizáʼ bichibi laacaʼ. Biree chupa hombre ni nuu demonio lu xcuerpu lade ca baʼ que ne ziguxooñecaʼ ra nuu Jesús. Peru jma bizeeteʼ Marcos ne Lucas ti hombre si que. ¿Xiñee yaʼ? Purtiʼ jma nahuati ique ne jma xadxí nuu demonio lu xcuerpu.

Xieeladi hombre riʼ. Guidubi dxi ne guidubi gueelaʼ, maʼ canazabe «lade baʼ ne lade dani, canayúnibe ridxi ne ruchuugube ládibe né guié» (Marcos 5:5). Guizáʼ nahuati ique hombre riʼ, nga runi qué riná binni tidiʼ neza ra nuube. Maʼ stale biaje bindiibicabe laabe né cadena ne grillete, peru runidebe ni. Guirutiʼ qué gapa stipa para gucueeza laabe.

Bidxiñaʼ hombre que Jesús ne biaba nezalube. Ne bicaa ca demonio que laabe gucaabe ti ridxi reciu: «¿Xi napaniaʼ lii, Jesús, Xiiñiʼ Dios ni nuu guibáʼ? Cayabeʼ lii guni jurarluʼ pur Dios qué zuninaluʼ naa». Óraque, bisihuinni Jesús napa autoridad luguiáʼ ca espíritu malu ora guníʼ: «Lii, espíritu malu, biree de lu xcuerpu hombre ca» (Marcos 5:7, 8).

Dxandíʼ peʼ, nuu stale demonio lu xcuerpu hombre riʼ. Purtiʼ ora gunabadiidxaʼ Jesús laabe tu labe la? bicábibe: «Naa laʼyaʼ Legión, purtiʼ stáledu» (Marcos 5:9). Ti mil soldadu romanu nga ti legión, nga rusihuinni nuu stale demonio lu xcuerpu hombre riʼ pur lá ca. Ca espíritu malu ca, ni riuuladxiʼ guniná hombre riʼ, cayuni rogarcaʼ Jesús cadi gulaabe laacaʼ «ndaaniʼ abismo». Nga rusihuinni nanna ca demonio ne Binidxabaʼ, xaíque sticaʼ, xi cabeza laacaʼ (Lucas 8:31).

Gaxha de raqué nuu biaʼ 2,000 bihui. Ley que ná cadi naquiiñeʼ gapa ca judíu ca maniʼ riʼ purtiʼ nabiidicame. Ngue runi gunabaʼ ca demonio que Jesús: «Biseendaʼ laadu ra nuu ca bihui ca para chuʼdu luguiacaʼ» (Marcos 5:12). Cumu bidii Jesús lugar ca demonio la? bireecaʼ luguiáʼ hombre que ne biuucaʼ luguiáʼ ca bihui que. Oraqueca,  biaba 2,000 bihui que dede ra dxíʼbacame ne gúticame lu nisadóʼ.

Ora biʼyaʼ ca ni cayapa ca bihui que ni bizaaca riʼ la? biree guxooñecaʼ ne biuucaʼ ndaaniʼ guidxi que ne guniʼcaʼ guiráʼ ni guca que. Ngue runi yeguuya binni xi bizaaca. Ora yendacaʼ raqué biiyacaʼ maʼ nazaaca nuu hombre que ne maʼ beeda xpiaaniʼ. Maʼ nacu lari ne zuba xañee Jesús.

Guizáʼ bidxibi ca binni ni gunna ni bizaaca riʼ o ca ni biʼyaʼ hombre que. Purtiʼ guyuucabe xizaa xi zándaruʼ guni Jesús despué. Ngue runi, gunabaʼ ca binni de guidxi que Jesús guiree de región que. Ora gudxiʼbaʼ Jesús ndaaniʼ canuá, gunabaʼ hombre ni guyuu demonio lu cuerpu stiʼ que Jesús chiné laabe. Peru gudxi Jesús laabe: «Guyé ra liʼdxuʼ. Biguetaʼ ra nuu ca pariente stiluʼ ne gudxi laacaʼ xi guiráʼ maʼ biʼniʼ Jehová pur lii ne modo maʼ bisihuinni riá lii» (Marcos 5:19).

Cada gusianda Jesús binni rábibe laacaʼ cadi gábicaʼ guirutiʼ ximodo biándacaʼ purtiʼ qué racalaʼdxiʼ Jesús guni cré binni laa pur ni guiníʼ xcaadxi de ni cayuni. Ra bianda hombre ni guyuu demonio lu xcuerpu que bihuinni pabiáʼ poder napa Jesús ne zudii hombre riʼ testimonio xcaadxi binni ni qué ñapa oportunidad para nucaadiaga Jesús. Pur testimonio stiʼ hombre riʼ guirutiʼ tu zaníʼ xiñee guti ca bihui que. Nga runi, biree hombre que zeʼ ne bizulú guníʼ ndaaniʼ ca guidxi stiʼ Decápolis xi biʼniʼ Jesús pur laa.