Ditaba tša gore Jesu o boile Dekapoli di phatlalala gare ga Bajuda bao ba dulago lebopong la ka leboabodikela la Lewatle la Galilea. Go ka direga gore ba bantši ba kwele gore Jesu o ile a homotša phefo le meetse ledimong leo le sa tšwago go feta, gomme ba bangwe ba ka ba ba tseba gore o fodišitše monna yo a bego a na le batemona. Ka baka leo, “lešaba le legolo” le kgobokana lewatleng, mohlomongwe tikologong ya Kaperenaume, gore le tlo amogela Jesu. (Mareka 5:21) Ge a theoga lebopong, lešaba le mo fagahletše e bile le mo letile.

Yo mongwe wa bao ba fagahletšego go bona Jesu ke Jairo, e lego molaodi yo a okamelago wa sinagoge, mohlomongwe ya kua Kaperenaume. O wela dinaong tša Jesu gomme a mo kgopela gantši a re: “Morwedi wa ka yo monyenyane o babja o šoro. Anke o tle hle o mmee diatla gore a fole gomme a phele.” (Mareka 5:23) Jesu o tla arabela bjang kgopelong e matla ya Jairo ya gore a thuše morwedi wa gagwe a nnoši, yo a nago le nywaga e 12 feela le yo a bilego a le bohlokwa kudu go yena?—Luka 8:42.

Jesu ge a le tseleng ya go ya ntlong ya Jairo, o kopana le boemo bjo bongwe bjo bo huduago maikwelo. Batho ba bantši bao ba sepelago le Jesu ba thabile, ba ipotšiša ge e ba ba tla ka ba mmona a dira mohlolo o mongwe. Lega go le bjalo, mosadi yo mongwe lešabeng o tshwenyegile ka bothata bja gagwe bjo šoro bja tša maphelo.

Mosadi yo wa Mojuda o tšere nywaga e metelele e 12 a tlaišwa ke bolwetši bja ngope. O tsomile thušo go dingaka ka go latelelana ga tšona, a diriša tšhelete ya gagwe ka moka mekgweng ya kalafo yeo di bego di mo kgothaleditše go e diriša. Eupša ga se a thušega. Ge e le gabotse, bothata bja gagwe “bo befetše pele.”—Mareka 5:26.

Mohlomongwe o ka lemoga gore bolwetši bja gagwe, ka ntle le go fokolela ga gagwe pele, bo leša dihlong e bile bo a tlontlolla. Ka tlwaelo motho ga a fo bolela ka bolokologi ka boemo bjo bjalo. Go oketša moo, ka tlase ga Molao wa Moshe, ge mosadi a tšwa madi go mo dira gore a se ke a hlweka. Motho le ge e le ofe yo a mo kgwathago goba a kgwathago diaparo tša gagwe tše di rothetšwego ke madi o swanetše go hlapa gomme e be yo a sa hlwekago go fihlela mantšiboa.—Lefitiko 15:25-27.

Mosadi yo o kwele “dipego tše di lego mabapi le Jesu” gomme bjale o a mo tsoma. Ka baka la go se hlweke ga gagwe, o phatša lešaba a leka ka mo a ka kgonago gore a se bonwe, a ipotša gore: “Ge nka kgwatha feela diaparo tša gagwe tša ka ntle ke tla fola.” Ge a kgwatha morumo wa seaparo sa Jesu, gateetee o lemoga gore madi ga a sa ela! O “fodile bolwetši bjoo bjo bohloko.”—Mareka 5:27-29.

Ke moka Jesu o re: “Ke mang yo a nkgwathilego?” O nagana gore mosadi yoo o ikwa bjang ge a ekwa mantšu ao? Petro o ganetša a kwagala eka o sola Jesu, o re: “Mašaba a go dikaneditše gomme a go kgobokanetše.” Ka gona ke ka baka la’ng Jesu a botšiša ka gore: “Ke mang yo a nkgwathilego?” Jesu o a hlalosa o re: “Yo mongwe o nkgwathile, gobane ke a tseba gore matla a tšwile go nna.” (Luka 8:45, 46) Ee, go dirišitšwe matla a Jesu ge mosadi yo a fodišwa.

Ge mosadi yoo a lemoga gore o bonwe, o wela pele ga Jesu, a tšhogile e bile a thothomela. O bolela therešo pele ga bohle mabapi le bolwetši bja gagwe le gore o sa tšwa go fola. Jesu o mo homotša ka botho o re: “Morwedi wa ka, tumelo ya gago e go fodišitše. Sepela ka khutšo gomme o fole bolwetšing bja gago bjo bohloko.”—Mareka 5:34.

Go molaleng gore Yo Modimo a mo kgethilego gore a buše lefase ke motho yo borutho le yo a kwelago bohloko, yo a sa tshwenyegego feela ka batho eupša a bile a na le matla a go ba thuša!