Yairô a ntehe kiki Yésu a mbuubaha muda a bak a mpam matjél. Ibabé pééna, Yésu a nla toi hôla ngond yé, to hala kiki ha ngéda i, ‘ngond yé i nlama ba nwok.’ (Matéô 9:18) Baa a nla ki kôhna mahôla?

Kiki Yésu a yé pot ni muda a ntip mélés, ngim bôt i nlôl i mbai Yairô inyu kal nye le: “Ngond yoñ i nwo!” Ba nkônde le: “Inyuki u ntééñga ki Malét?”​—Markô 5:35.

Kinje nwin mbe! I mut nunu ba nti lipém ngandak a yé nhelek kiyaga. Pom yé ngond i nwo. Ndi Yésu a nok nwin, a hielba, a lédés Yairô, a kal le: “U kon bañ woñi, unda ndik le u gwé hémle.”​—Markô 5:36.

Yésu a nke ni Yairô i mbai yé. Kiki ba mbol, ba ñada liyôgbe likeñi. I bet ba yé ha ba yé ee, ba tjeelak, ba siidaga. Yésu a njôp, a kal jam li hélha: “Mañge a nwo bé, a yé ke ilo.” (Markô 5:39) Kiki bôt ba nok hala, ba nol Yésu hiol. Ba nyi le hingonda hi nwo toi. Ni ngui Djob a nti nye, Yésu a’ unda le bôt ba nla témb i niñ nlélém kiki ba nla tôdôl mut a yé ndip ’ilo.

Nano, Yésu a mpémés bôt bobasôna i mbégdé, a nwas Pétrô, Yakôbô, Yôhanes ni bagwal ba hingonda. A nyoñ bôt bana bo ba-tan, a kee het mañge a niñne, a yoñ moo ma mañge a kal le: “‘Tal’i·ta ku’mi,’ hala a nkobla le: ‘A hingongonda, me nkal we le: “Telep!”’” (Markô 5:41) Kunda yada mañge a telep, a bôdôl ke. Di nhégda maséé Yairô bo nwaa ba nôgda. Inyu unda le hingonda hi ntuge toi, Yésu a kal le ba ti nye yom je.

I bisu bi ngéda, Yésu a bé kal i bet a bé mbuubaha le ba añal bañ jam a bé bôñôl bo. A mboñ nlélém ni bagwal bana. Ndi maséé ma bagwal ba mañge ni bôt bape ma mboñ le ngan i jam li i  ntjama “ni mbok i yosôna.” (Matéô 9:26) Ibale u ntehe mut woñ wada a ntémb i niñ, baa w’a añal bé jam li ni makénd? Hala a yé bitugne bi nyônôs iba bi Yésu.