Yairo alimweneko uko Yesu aundepe umwanakashi uwalefuma umulopa. Kanshi alishibe ukuti Yesu kuti ayafwa no mwana wakwe, nangu ca kuti alemona kwati nalimo ‘pali iyi inshita umwana wakwe ninshi no kufwa nafwa.’ (Mateo 9:18) Lelo, bushe Yesu ali no kumubuusha?

Ilyo Yesu alelanda no mwanakashi uo aundepe, abaume bamo bafumine ku ng’anda ya kwa Yairo no kweba Yairo abati: “Umwana wenu nafwa!” Bamwebele no kuti: “Cinshi ico mucili mulepamfisha Kasambilisha?”—Marko 5:35.

Ala ici icintu calibipile sana! Uyu mwaume uo abantu bacindike sana, taishibe ica kucita. Umwana wakwe umwanakashi umo fye mpo alifwile. Lelo Yesu alyumfwile ifyo abantu baebele Yairo. E ico amukoseleshe ati: “Witiina, tetekela fye.”—Marko 5:36.

Awe Yesu aile na Yairo ku ng’anda ku mwakwe. Ilyo bafikile pa ng’anda, basangile pali icongo sana. Abantu abalongene pa ng’anda balelila no kuloosha no kuitutaula pa mulandu wa bulanda. Yesu aingile mu ng’anda no kulanda amashiwi ayapapwishe bonse. Atile: “Umwana tafwile, aleele fye utulo.” (Marko 5:39) Ilyo abantu baumfwile ifyo alandile, balimusekele pantu balishibe ukuti umwana nafwa. Lelo, Yesu alibomfeshe amaka ayo Lesa amupeele, pa kubalanga ukutila abantu kuti babuuka ku bafwa nga filya fine bengabuuka nga bali mu tulo utukalamba.

Yesu aebele abantu bonse ukufumina pa nse ukufumyako fye Petro, Yakobo, Yohane, e lyo na bafyashi bamwana uwafwile. Yesu aingile na aba 5 umwali umwana. Amwikete ku kuboko no kumweba ati: “‘Talita kumi,’ icalola mu kuti: ‘We mukashana, ndekweba nati, “Ima!”’” (Marko 5:41) Ilyo line fye, alimine atendeka no kwenda. Elenganyeni ifyo Yairo no mwina mwakwe baumfwile ilyo bamwene umwana wabo abuuka! Pa kubalanga ukuti ca cine umukashana aali no mweo na kabili, Yesu abebele ukuti bamupeele ifya kulya.

Mu nshita ya ku numa, Yesu nga aundapa abantu alebeba ukukanaebako nangu umo, kabili ifi fine e fyo aebele na Yairo no mwina mwakwe. Na lyo line, aba abafyashi pamo na bantu bambi abatemenwe pa fyacitike, balisalangenye ilyashi “muli cilya citungu conse.” (Mateo 9:26) Bushe na imwe te kuti mutemwe ukwebako abantu bambi nga mwalimwene lupwa wenu nelyo cibusa wenu bamubuusha ku bafwa? Uyu e muku walenga bubili uo Baibolo yalandapo ukuti Yesu alibuushishe umuntu ku bafwa.