Yailu nĩwoonie ũla mũndũ mũka waumawa nĩ nthakame avow’a nĩ Yesũ. Kwoou, nĩwamanyie vyũ kana Yesũ nũtonya kũvosya mwĩĩtu wake, o na kau oonaa kana kũvikĩa saa isu ‘no nginya mwĩĩtu wake ethĩwe e mũkw’ũ.’ (Mathayo 9:18) Yo ve ũndũ waĩ wĩkwa mwĩĩtu ũsu akatetheew’a?

Yesũ aendeee kũneena na ũla mũndũ mũka wavoisye, ve aũme mookie kuma mũsyĩ kwa Yailu. Aũme asu meeie Yailu atĩĩ: “Kelĩtu kaku nĩkakw’a!” Ĩtina wa kũmwĩa ũu, masyokie mamũkũlya-ĩ, “Ve vata mwaũ wa kũendeea kũmũthĩny’a Mũmanyĩsya?”—Maliko 5:35.

Ũvoo ũsu waĩ wa kũmakya mũno! Yailu, ũla wanengetwe ndaĩa mũno kĩsionĩ kyake, ndaĩ na ũndũ o na ũmwe ũtonya kwĩka ĩtina wa kũkw’ĩĩwa nĩ mwĩĩtu wake. Ĩndĩ yĩla Yesũ weewie ndeto ila Yailu wataviw’e, nĩwamũvĩndũkĩie na amũtavya ndeto sya kũmwĩkĩa vinya. Amwĩie atĩĩ: “Ndũkethĩwe na wia, ĩndĩ ĩthĩwa na mũĩkĩĩo.”—Maliko 5:36.

Ĩtina wa ũu, Yesũ nĩwaendanisye na Yailu mũsyĩ kwake. Yĩla mavikie, meethĩie andũ me na kyeva na kĩĩo kingĩ mũno. Ala moombanĩe mũsyĩ kwa Yailu makwete kũĩa na kua mbu, na kwĩkũnanga me na kyeva. Yesũ nĩwalikile nyũmba na aneena ndeto ii sya kũsengy’a mũno: “Kana ti kakw’ũ ĩndĩ kekĩte kũkoma.” (Maliko 5:39) Yĩla andũ meewie ndeto isu, nĩmamũthekeeie Yesũ. Mathekie nĩkwĩthĩwa nĩmeesĩ nesa ki kana kelĩtu nĩ kakw’ũ. Ĩndĩ Yesũ nĩwavangĩte kũtũmĩa vinya ũla wanengetwe nĩ Ngai kwonany’a kana nĩ ũndũ ũtonyeka andũ kũthayũũka o tondũ mũndũ ũtonya kũamũka kuma toonĩ mũito.

Yesũ nĩweeie andũ ala maĩ vau nyũmba maumaale nza ateo Vetelo, Yakovo, Yoana, na asyai ma kelĩtu kau kaĩ kakw’ũ. Na ĩndĩ athi na andũ asu atano vala kelĩtu kau kakometw’e. Avika vau, akakwatie kw’oko na asya: “‘Talitha kumi,’ ĩla ũalyũlo wayo nĩ, ‘Kelĩtu, nĩkwĩa, “ũkĩla!”’” (Maliko 5:41) O mĩtũkĩ kelĩtu kau kookĩla na kambĩĩa kũthi. Kwasũanĩa ũndũ Yailu na kĩveti kyake meewie mũyo wingĩvĩte yĩla moonie ũndũ ũsu! Nĩ kana Yesũ aĩkĩĩthye andũ kana kelĩtu kau nĩkathayũũka, aisye nĩkanengwe kĩndũ kaye.

Yesũ nĩwakothaa kũvosya andũ na aimea maikawete maũndũ ala weeka, na ũu now’o watavisye asyai ma kelĩtu kau. Ĩndĩ asyai asu na andũ angĩ nĩmanyaĩĩkisye ũvoo ũsu “kĩsionĩ kĩu kyonthe.” (Mathayo 9:26) O naku ũkona mũndũ wendete athayũũkw’a, mwa ndũlea kũweta ũndũ ũsu wĩ na ũtanu mwingĩ! Kĩu nĩkyo kyaĩ kyama kya kelĩ kĩla Yesũ weekie kya kũthayũũkya andũ.