Yailu amwene uze pwevo apwile namusongo wakuhita manyinga ngwenyi vanamuhindula kuli Yesu. Ngocho afwelelele ngwenyi Yesu nahase kuhindula namwanenyi nawa, numba tuhu ashinganyekele ngwenyi ‘halwola kana mwanenyi nafu lyehi.’ (Mateu 9:18) Kaha nge uze mwana nafu lyehi, kutala Yesu nahase kumukafwa nyi?

Shimbu Yesu apwile nakuhanjika nauze pwevo okile, vatu vamwe vejile kufuma kwimbo lyaYailu, kaha valwezele Yailu ngwavo: “Mwanove nafu lyehi.” Vamwambile ngwavo: “Nyi ikaze uli nakuyanjishila Muka-kunangula?”—Mako 5:35.

Mujimbu kana wapihile chikuma. Ou lunga vavumbikilenga chikuma muchitungilo halwola kana azeyele chikuma, mwomwo mwanenyi umwe kaha lyamunwe afwile. Oloze Yesu evwile mujimbu kana, kaha alwezele Yailu ngwenyi: “Kanda nawivwa womako, ijiva kufwelela kaha.”—Mako 5:36.

Yesu jino ayile hamwe naYailu kuzuvo yenyi. Omu vahetele kuzuvo yaYailu, vawanyine vatu vali nakuneha liuya chikuma. Vatu vaze valikungulwilile kuze vapwile nakulila jimbimbi nakulishona. Yesu engilile mukachi nakuvaholesa ngwenyi: “Ou mwana kafwileko, nasavala kaha tulo.” (Mako 5:39) Vatu omu vevwile mazu aYesu, vamusehele. Vatachikijile ngwavo chikupu vene uze mwana nafu. Oloze Yesu azachishile ngolo jenyi jize vamuhana kuli Kalunga mangana asolole nge chapwa chachashi kusangula vatu kukufwa, ngana muze navahindula mutu ali mutulo.

Yesu alowele vatu vosena haweluka, kaha muzuvo mwasalile kaha Petulu, naYakova, naYowano, navisemi jauze mwana. Yesu ayile navaze vatu vatanu kuze vasavalikile uze mwana. Kaha akwachile uze mwana kulivoko nakwamba ngwenyi: “‘Talita kumi,’ kulumbununa ngwavo: ‘Ove mwanapwevo, nangwamba kuli ove ngwami, Katuka!’” (Mako 5:41) Hahaze vene, akatukile nakuputuka kutambuka. Achishinganyekenu ocho kuwahilila kana vevwile vaYailu napuwenyi hakumona mwanavo ali nakutambuka. Hakusaka vatu vamone unjiho ukwavo wakusolola nge chikupu vene ou mwana nayoyo, Yesu avalwezele vamuhane vyakulya alyenga.

Hakavanga Yesu alwezele vatu vaze okilenga ngwenyi kavatela kulweza vatu vyuma navalingilako, kahomu mukiko alwezele navisemi jayou mwana. Oloze mwomwo yakuwahilila, ava visemi navatu veka vapwileko vatanjishile chihande kanechi “mungalila yize yosena.” (Mateu 9:26) Kachi nge yenu mwafwisanga kausoko kenu, kaha vanamusangula, kutala kamweshi kuwahilila nakwambulula chihande kanechi tahi? Ou wapwile himujimbu wamuchivali vasonekele wavatu asangwile Yesu halwola kana.