Zair inn trouv Zezi geri sa fam ki ti ena lemorazi la. Pena dout ki Zezi kapav ed tifi Zair osi, mem si li panse ki kitfwa so ‘tifi inn fini mor asterla.’ (Matie 9:18) Eski ankor ena lespwar?

Pandan ki Zezi pe koz avek sa fam ki li’nn fek geri la, bann zom ki sorti kot Zair arive ek dir li: “To tifi finn mor; pou kifer bizin kontigne deranz Met la?”​—Mark 5:35.

Se enn nouvel bien tris! Zair, se enn zom ki bien respekte dan landrwa, ek ki ena boukou linflians. Me dan sa sitiasion-la, li pa kapav fer nanye. So sel tifi inn mor. Selman, Zezi osi inn tann sa nouvel-la. Li ankouraz Zair ek li dir li: “Pa trakase, nek krwar [“ena lafwa,” NW].”​—Mark 5:36.

Lerla, Zezi al avek Zair kot li. Kan zot arive, ena boukou tapaz. Bann dimounn ki la pe plore, pe plengne, ek pe tap zot lestoma akoz zot lapenn. Zezi rant dan lakaz ek dir kitsoz ki sok tou dimounn: “Zanfan la pa finn mor, li pe dormi.” (Mark 5:39) Kan bann dimounn tann sa, zot riy Zezi. Zot kone ki tifi-la inn vremem mor. Me selman, kan Zezi pou servi pouvwar ki li’nn gagne avek Bondie, li pou montre ki bann dimounn ki’nn mor kapav reviv, parey kouma enn dimounn ki dan enn gran somey, kapav leve.

Zezi fer tou dimounn sorti deor, sof Pier, Zak, Zan, ek bann paran tifi-la. Li fer zot vinn ansam avek li kot tifi-la pe alonze. Zezi pran lame tifi-la, ek li dir “Talitha qoumi” ki vedir: “Zennfi, mo dir twa, leve.” (Mark 5:41) Deswit, tifi-la leve ek li koumans marse. Mazine ki kantite Zair ek so madam extra kontan kan zot trouv sa! Zezi donn enn lot prev ki tifi-la vremem vivan kan li demande ki donn tifi-la kitsoz pou manze.

Dan lezot lokazion, Zezi inn donn lord bann dimounn ki li finn geri pou pa fer piblisite lor seki li’nn fer pou zot. Ek li dir Zair ek so madam mem zafer. Selman, bann paran-la ek lezot dimounn fann sa nouvel-la partou ‘dan landrwa.’ (Matie 9:26) Nou kapav konpran zot, pa vre? Si enn dimounn ki ou kontan ek ki’nn mor, li resisite, eski ou osi ou pa ti pou kontan rakont sa? Dan bann Levanzil, se deziem rezireksion ki Zezi fer.