Jairo o a bona gore mosadi yo a bego a na le bolwetši bja ngope o fodišitšwe ke Jesu. Ga go pelaelo gore Jesu a ka thuša le morwedi wa gagwe, le ge a nagana gore ‘ga bjale morwedi wa gagwe o swanetše go ba a hwile.’ (Mateo 9:18) Na e ka ba e le gore o sa dutše a ka thušwa?

Ge Jesu a le gare a bolela le mosadi yo a mo fodišitšego, go goroga banna ba bangwe bao ba tšwago legaeng la Jairo gomme ba mmotša ba re: “Morwedi wa gago o hwile!” Ba oketša ka gore: “Ke ka baka la’ng o sa tshwenya Morutiši?”—Mareka 5:35.

Ruri tšeo ke ditaba tše di nyamišago! Monna yo, yo a hlomphegago kudu setšhabeng, ga bjale ga a na seo a ka se dirago. Morwedi wa gagwe a nnoši o hwile. Lega go le bjalo, Jesu o tšea ka tsebe pego yeo, gomme ge a retologela go Jairo, o a mo kgothatša o re: “O se ke wa boifa; wena bontšha tumelo feela.”—Mareka 5:36.

Ke moka Jesu o boela le Jairo legaeng la gagwe. Ge ba fihla, ba hwetša khuduego e kgolo. Bao ba kgobokanego moo ba a lla, ba a golola e bile ba itshetla dihuba ba nyamile. Jesu o a tsena gomme a bolela mantšu a makatšago a rego: “Ngwana yo monyenyane ga se a hwa eupša o robetše.” (Mareka 5:39) Ge batho ba ekwa se, ba sega Jesu. Ba a tseba gore ngwanenyana o hwile e le ka kgonthe. Lega go le bjalo, a diriša matla a gagwe ao a a filwego ke Modimo, Jesu o tla bontšha gore go a kgonega gore batho ba tsošwe bahung go fo swana le ge ba tsošwa borokong bjo bogolo.

Jesu bjale o ntšhetša bohle ka ntle, a šia Petro, Jakobo, Johane le batswadi ba ngwanenyana yo a hwilego. Jesu o tšea ba bahlano ba o tsena le bona moo ngwanenyana a robetšego gona. Ge a mo swara ka seatla, o re go yena: “‘Talitha kumi,’ yeo e bolelago gore: ‘Mosetsana, ke re go wena: “Tsoga!”’” (Mareka 5:41) Gateetee ngwanenyana o a tsoga gomme a thoma go sepela. Akanya lethabo leo Jairo le mosadi wa gagwe ba bago le lona ge ba bona se! E le go nea bohlatse bjo bongwe bja go bontšha gore ngwanenyana o phela e le ka kgonthe, Jesu o laela gore a fiwe sa go ja.

Mabakeng a pejana, Jesu o be a laela bao a bego a ba fodišitše gore ba se ke ba phatlalatša seo a ba diretšego sona, gomme o dira bjalo gape le ka batswadi ba. Lega go le bjalo, batswadi bao ba thabilego gotee le ba bangwe ba phatlalatša taba ye “tikologong yeo ka moka.” (Mateo 9:26) Na o be o ka se bolele seo ka lethabo ge e ba o be o bone yo mongwe wa baratiwa ba gago a tsošwa bahung? Ye ke tsogo ya bobedi yeo go ngwadilwego ka yona yeo Jesu a e dirago.