Sailu wamona okuti Sesusi wavelula omukai ankho uvela konohanyi otyo tyihatalama. Pahe una onthumbi yokuti Sesusi tupu upondola okukuatesako omona wae, namphila ankho etyii okuti ‘omona wae wanyima-le.’ (Mateusi 9:18) Okuti ankho nkhele upondola okumukuatesako?

Putyina nkhele Sesusi apopia nomukai una avelula, ovalume vamwe vatunda keumbo lya Sailu aveya, avemupopila okuti: “Omona wove wanyima-le!” Avayawisako okuti: “Oityi usatiyalela vali Omulongesi?” — Maluku 5:35.

Onondaka ombo mbeihamene unene ngatyi! Omulume oo wokuahumbwa unene potyilongo, pahe ankho utupu vali ekevelelo. Omona wae wike vala omukainthu wanyima. Mahi Sesusi, eivi etyi ankho vekahi nokupopia, aleuka ku Sailu, emupameka, ati: “Uhalinge otyiho, kala vala nekolelo.” — Maluku 5:36.

Sesusi aende na Sailu keumbo liae. Etyi vehika-mo avavasi ovanthu vekahi nokulila unene. Ovanthu ankho vekahi nokulila, nokuliyavela, nokuliveta mononthulo. Sesusi anyingila meumbo apopi onondaka mbahuvisile, ati: “Omona kankhile, ulele.” (Maluku 5:39) Etyi ovanthu veiva onondaka ombo, avayolo Sesusi. Mokonda ankho vetyii okuti omona wanyima umwe. Mahi, Sesusi nepondolo apewa na Huku malekesa okuti tyitavela okukondola komuenyo omunthu wanyima, ngetyi tyihepuiya okupindula-po omunthu ulele.

Sesusi atumu ovanthu aveho valupuke-mo, esala-mo vala na Petulu na Tiaku na Suau no vohe yomona. Sesusi aende novanthu ovo vetano apa ankho omona ekahi. Emukuate mokuvoko, ati: “‘Talita kumi,’ tyihangununa okuti: ‘Mukainthu, ndyikupopila okuti, “Pinduka-po!”’” (Maluku 5:41) Liwa-liwa, omukainthu apinduka-po, ahimbika okueenda. Nkhele soka ehambu enene Sailu nomukai wae vakalele nalio! Opo Sesusi alekese okuti omukainthu tyotyili una omuenyo, evetumu opo vemuavele okulia.

Ngetyi Sesusi ankho ehole okupopila vana avelula opo vehetyipopie kovanthu, tupu apopila ovohe yomona omukainthu vahapopile nawike etyi alinga. Mahi, mokonda ovohe novanthu vakuavo ankho vahambukwa unene, avetyiyandyanesa “motyilongo atyiho.” (Mateusi 9:26) Okuti inkha omunthu umwe uhole ututiliswa, otyipuka otyo tyihambukiswa kumetyipopi? Olio etutilo lya vali Sesusi alinga.