Jaïrus kue abâ tongana nyen la Jésus asava wali so mênë ayeke ga na tere ti lo so. Tongaso, Jésus apeut ti sava molenge ti lo, atâa so ti lo, ‘ti si na l’heure so, âmanke molenge ti lo ti wali ni akui awe.’ (Matthieu 9:18). Eskê a peut ti sara nga mbeni ye encore ndali ti molenge ni la?

Na ngoi so Jésus angbâ ti sara tënë na wali so lo sava fade lo so, ambeni koli alondo na yanga-da ti Jaïrus aga. Ala tene na Jaïrus ni atene: “Molenge ti mo ti wali akui awe. Mo ngbâ ti son li ti Maître ngbanga ti nyen?”—Marc 5:35.

So sioni tokua! Koli so, so azo ayeke mû nengo na lo mingi so, lo la fadeso ye ahon ngangu ti lo so! Oko molenge ti lo ti wali la akui so. Me, teti so Jésus amä nga tokua ni so, lo tourné na mbage ti Jaïrus, na lo dë bê ti lo, lo tene: “Sara mbeto ape. Duti gi na mabe awe.”—Marc 5:36.

Na pekoni, Jésus na Jaïrus ague na da ti lo. Tongana ala si kâ, ala wara gbâ ti azo. Azo ni ayeke toto, ala yeke dema na ala yeke pika ndo ti kate ti ala na vundu. Jésus angbâ fadeso alï na yâ ti da ni, na lo sara mbeni tënë so azo ni agi li ti ala na ni gbä. Lo tene: “Molenge ni akui ape, me lo lango langongo.” (Marc 5:39). Na mango tënë ni so, azo ni ahe Jésus na ngia. Ala hinga so molenge ni akui awe. Ye oko, na sarango kua na ngangu so Nzapa amû na lo, Jésus ayeke fa ande na ala so a peut ti zingo azo na kuâ, legeoko tongana ti so a yeke zingo ka mbeni zo na yâ ti kota lango.

Jésus atene na azo kue ti sigi, a ngbâ gi Pierre, Jacques, Jean nga na babâ na mama ti molenge-wali ni. Jésus na azo oku so ague na place so a zia molenge-wali ni dä. Jésus agbu maboko ti molenge-wali ni na lo tene: “‘Talitha kumi,’ so nda ni aye ti tene ‘Maseka-wali, mbi tene na mo: Londo!’” (Marc 5:41). Gi na lê ni lê ni, maseka-wali ni alondo na lo komanse ti tambela. Tara ti bâ tongana nyen la tere ti Jaïrus na wali ti lo anzere mingi. Ti fa na azo so molenge-wali ni ayeke biani na fini, Jésus ahunda ti tene a ga na ye ti tengo na molenge ni.

Tongana ti so lo tene lani na azo so lo sava ala, Jésus atene na babâ na mama ti molenge ni ti tene ala sara tënë ti ye ni so na zo oko ape. Me, teti so tere ti ala nzere mingi, babâ na mama ni nga na ambeni zo nde asara si tënë ni amû “yâ ti ndo ni kue.” (Matthieu 9:26). Ka mo, tongana a yeke fade mo la a zingo mbeni zo so mo ye lo mingi tongaso, tere ti mo ayeke nzere ti sara tënë ti ye ni so na azo ape? Molenge-wali so ayeke use zo so Bible atene Jésus a zingo lo na kuâ.