Yayiluse bamwene shi mwana mukashi badi na mukumbo wa mase abadi bamupashe kwi Yesu. Eyendo, Yesu mulombeene kupaasha mpa na mwan’aye mukashi, sunga mbibadi amono shi ‘mwan’aye mukashi afu binobino.’ (Mateo 9:18) Kwi bya kupasha winyi mwan’aye mukashi su?

Pabadi Yesu ky’akula na yawa mukashi abapashiishe, bangi bantu ba kwa Yayiluse abafikile na kulungula Yayiluse shi: “Mwan’obe mukashi bafu!” Abo nkukumbasha dingi shi: “Okalakasha dimo Mulambukishi bwakinyi?”—Maako 5:35.

Ubadi mukandu wibubi! Uno muntu, abanemekaa bikata kwi bantu booso, badi mutshokokye mbidi yoso. Uno mwana bafwile, nyi nka penda uno umune eeleka abadi naye. Kadi, Yesu bapushishe yaaya nkumo, na aye nkwialuula kwi Yayiluse, amunyingisha na bino bishima: “Topushanga moo, ikala na lukumiino.”—Maako 5:36.

Nka paapa Yesu nkwenda ku nshibo ya Yayiluse. Nsaa ibabafikile, abapetele bantu booso abapampakana. Baba abadi baule paapa abadi abadidi, na kwiyambiila na kinyongwa kikata. Yesu bende dya ku lupese na bakula bino bishima bya kukaanya shi: “Mwana ta mufwe mmulaale.” (Maako 5:39) P’abo kupusha bino, bantu ababanga kusepa Yesu. Abadi abauku shi mwana mmufwe binyibinyi. Pano dingi, ku bukwashi bwa bukome bubabadi bamupe kwi Efile Mukulu, Yesu akyebe kuleesha shi kwi bya kusaangula bantu ku bafwe anka bu bantu b’ababuusha ku tulo twi bukopo.

Yesu nkutuusha bantu booso paasha kukaasha penda Mpyeele, Shaake, Yowano, na baledi ba mwana mufwe. Yesu nkwisesela na bano bantu batano mbalo ibabadi baladishe kano ka nsongwakashi. P’aye kwikakwata mwiyasa, bambile shi: “‘Talita kum,’ kupatula nkwamba shi: ‘Nsongwakashi mukinga, nakulungula binobino shi: “Buuka!”’” (Maako 5:41) Musango umune, Babuukile na aye nkubanga kutambuka. Banda kunangusheena muloo ubadi nawo Yayiluse na mukashi aaye p’abo kumona bino! Bwa kushinkamisha shi mwana e na muwa binyibinyi, Yesu bebalungwile shi e na nsala bamupe ka kudya.

Anka bu bibadi atosha bantu booso babadi mupaashe kumpala, Yesu badi mutoshe baledi ba kano kansongwakashi bwashi tabakumanga kulungula bantu bino bibebakitshina. Kadi, bano baledi basha muloo ukile abadi bapalakashe nkumo “mu kipindji kyooso kya nsenga.” (Mateo 9:26) Twe mulombeene kupalakasha uno mwanda na muloo ooso su bomono mukwenu a kifulo abamusaangula ku lufu su? Luno nyi lusangukilo lwa kabidi lubadi Yesu mulombashe.