Biiyaʼ Jairo ximodo bisianda Jesús ti gunaa caxii rini, nga runi guyuube seguru zanda gacané Jesús xiiñibe, neca nánnabe maʼ guti (Mateo 9:18). ¿Ñee zanda guni Jesús xiixa pur dxaapahuiiniʼ riʼ la?

Laga caniʼné Jesús gunaa ni bisianda que, beeda caadxi hombre ni nuu ra lidxi Jairo ne gúdxicaʼ laabe: «Maʼ guti dxaapahuiiniʼ stiluʼ. ¿Xi para guchiichirouʼ Maestru?» (Marcos 5:35).

Guizáʼ bininá noticia que ladxidóʼ Jairo, hombre ni nabé runi respetar binni ndaaniʼ guidxi riʼ. Biʼniʼ sentir Jairo maʼ qué zanda gaca xiixa. ¡Guti tobi lucha xiiñibe! Peru cumu binadiaga Jesús xi caníʼcabe la? biiyadxí laabe ne guluu gana laabe: «Cadi guidxíbiluʼ, gupa si fe» (Marcos 5:36).

Óraque yené Jesús laabe ra lídxibe. Ora yendá Jesús raqué, biiyaʼ nuu stale binni, cayúnicaʼ stale ruidu, cayuunacaʼ ne cucaacaʼ ridxi dede cagápacaʼ ladxidoʼcaʼ de tantu nuucaʼ triste. Guyuu si Jesús ndaaniʼ yoo que, gúdxibe ca binni que: «¿Xiñee cayuunatu ne cayúnitu stale ruidu pue? Cadi guti diʼ dxaapahuiiniʼ riʼ, sínuque nisiaasibe» (Marcos 5:39). Ora binadiágacaʼ ni guniʼbe que bizulú biʼniʼ búrlacaʼ laabe purtiʼ nánnacaʼ maʼ guti dxaapahuiiniʼ que. Peru chiguluíʼ Jesús laacabe zanda guindisaʼ tuuxa ni maʼ guti pur poder stiʼ Dios, casi ora nucuaanicabe tuuxa ni nisiaasiʼ.

Óraque gulee Jesús ca binni que fuera ne biaananebe Pedro, Santiago, Juan ne bixhoze ne jñaa dxaapahuiiniʼ que. Ne yenebe laacaʼ ra nexheʼ dxaapahuiiniʼ que, gunazebe náʼ dxaapahuiini que ne gúdxibe laa: «Tálitha cúmi», ni raca traducir casi «dxaapahuiiniʼ, cayabeʼ lii “¡Biasa!”» (Marcos 5:41). Oraqueca biasa dxaapahuiiniʼ que ne guzá. ¡Bixuiʼlú pabiáʼ nayecheʼ guyuu Jairo ne xheelaʼ! Ne gudxi Jesús laacaʼ gudiicaʼ ni gó dxaapahuiiniʼ que para guluiʼbe maʼ nabani.

Guyuu biaje gudxi Jesús ca binni ni bisianda cadi gábicaʼ guirutiʼ xi bíʼnibe pur laacaʼ ne ngaca nga ni gúdxibe bixhoze ne jñaa dxaapahuiiniʼ que. Peru bireeche noticia que «guidubi región que» (Mateo 9:26). ¿Cadi dxandíʼ pa nibani ti familia stinu o ti xhamígunu, nitídxinu ni binni la? Ndiʼ nga guiropa biaje riete lu ca Evangeliu bisibani Jesús binni ni maʼ guti.