Jesus amat kisuk sepemanjai hari. Pengudah pejalai Jesus ari Dekapolis, iya ngeraika siku indu ke sakit balat datai kain enggau ngidupka baru anak indu Jairus. Tang pengawa Jesus ba hari nya bedau abis. Pengudah iya ninggalka rumah Jairus, dua iku orang ke buta nitihka iya lalu ngangau: “Anak David, kasih meh ke kami!”—Matthew 9:27.

Seduai iya ngangauka Jesus “Anak David.” Tu nunjukka sida arapka Jesus nya waris David sereta Messiah ke Disemaya. Jesus enda terus nyaut sida, engka ketegal iya deka meda sida deka terus minta tulung iya tauka enda. Lebuh Jesus tama ngagai sebuah rumah, seduai iya terus nitihka Jesus. Jesus nanya seduai iya: “Kati seduai arapka aku ulih ngeraika seduai?” Seduai iya nyaut enggau penuh pengandal: “Au, Tuan! Kami arap.” Nya alai, Jesus negu mata seduai iya lalu bejaku: “Ketegal seduai arap, utai nya deka nyadi.”—Matthew 9:28, 29.

Tekala nya, seduai iya ulih meda! Jesus enda ngasuh seduai iya madahka utai ke nyadi nya ngagai orang bukai. Tang seduai iya amat gaga ati, nyentukka seduai iya nusui pasal Jesus ba serata menua nya.

Lebuh dua iku lelaki nya mupuk, orang mayuh mai siku lelaki ke bisu ketegal dirasuk melikat ti jai ngagai Jesus. Jesus muru melikat ti jai ari lelaki nya. Tekala nya, iya pan ulih bejaku. Semua orang balat alit ati. Sida madahka: “Kami nadai kala meda utai ke baka tu nyadi ba Israel.” Maya nya, bisi orang Parisi ba dia. Sida empu meda Jesus ngereja pengawa ti luar biasa nya. Nya alai, sida mega enda ulih nyangkal utai ke digaga Jesus. Nyadi sida nuduh Jesus. Ku sida: “Iya muru melikat ti jai ketegal iya bisi kuasa ari ketuai melikat ti jai.”—Matthew 9:33, 34.

Enda lama pengudah nya, Jesus pulai baru ngagai endur asal iya ba Nasaret. Kali tu, bala murid iya bisi enggau iya. Kira-kira setaun sebedau tu, iya ngajar orang ba balai gempuru ba dia. Terubah iya, orang mayuh alit ati enggau utai ke disebut Jesus. Tang pengudah nya, sida balat ringat enggau utai ke diajar iya lalu nguji deka munuh iya. Tang kali tu, Jesus deka nguji nulung sida baru.

Ba Hari Sabat, Jesus ngagai balai gempuru laban iya deka ngajar orang. Sida ba dia alit ati, lalu ku sida bejaku: “Dini alai orang tu bulih penemu-dalam enggau kuasa kena ngereja pengawa ajih baka tu? Ukai enda iya tu anak tukang kayu? Ukai enda indai iya benama Maria? Lalu ukai enda iya tu menyadi James, Josep, Simon, enggau Judas? Ukai enda semua menyadi indu iya diau ditu sama enggau kitai? Nyadi dini alai iya bulih semua utai tu?”—Matthew 13:54-56.

Orang ba dia ngasaika Jesus nya semina orang biasa aja. Sida engka berunding: ‘Kitai meda iya ari mit. Nyadi kati iya tau nyadi Messiah?’ Sida udah meda penemu-dalam sereta pengawa ti luar biasa ke udah digaga Jesus. Taja pia, sida agi enggai nerima iya. Mayuh orang ba Nasaret ngelala Jesus ari mit. Indah kaban belayan iya enggai arapka iya. Nyadi, Jesus madahka: “Nabi endang dibasa orang ba dini-dini endur, tang ukai ba menua enggau ba ruang bilik iya empu.”—Matthew 13:57.

Ketegal nya, Jesus balat alit ati laban sida enda arap. Nya alai, iya enda mayuh ngereja pengawa ajih ba dia. Tang iya “semina ngengkahka jari iya ba atas sekeda orang ke sakit, lalu ngeraika sida.”—Mark 6:5, 6.