Jesu watakatira ecishanda. Naabva ku madhorobha o Dhekapori, iyena anorapa mwanakaji waisvasvama ngazi no kumusa mwana wokaji wa Jairosi. Asi basa riciripo. Jesu paanobva pamuzi wa Jairosi, mapofu maviri anomutevera ngo sure kwake ecikhuwa eciti: “Mwana wa Davidi tiitirenyi unyaxa!”—Mateu 9:27.

Ngo kudaninja Jesu kuti “Mwana wa Davidi,” vanarume ava vanodavira kuti Jesu ndiyena anozogara utaka hwo dendemaro ra Dhavhidhi, zve kuti ndiyena Mesiya. Jesu anoita inga aciripi kuvazwa kuti avone dengani vanonyarara, asi ivona avanyarari. Jesu paanonghwina mu nyumba, vanarume vaviri ava vanomutevera mbhera vonghwinavo mumbemo. Jesu anovabvunjisa kuti: “Munotenda kuti ndinokwanisa kumuitira ibzo?” Ivona vakadavira no kuthemba kwese veciti: “Tinotenda, Tenji.” Ngokudaro Jesu wakapsasa meso avo perepo woti: “Ngabziitike komuri kudari ngo kutenda kwenyu.”—Mateu 9:28, 29.

Ciriporipoco vakatanga kuvona! Jesu wovabvunja kuti vatame kuzvibvunja vamweni, inga zvaaindobvunjaya vamweni. Manji zvecivoneka kuti ivona vakazara ngo mudakaro, vanozofamba vecizvibhuya kuri kwese.

Vanarume vaviri ava pavanonga vecipinda, vandhu vanoviisa mwanarume acikavereketi ngo kuti wakafukwa ngo dhimoni. Jesu wakagogomera dhimoniro zve panguva yondhoyo kamare mwanarume wakatanga kuvereketa. Mbungano inokahamara yeciti: “Cipo, abzito bzikavoneka bzakadari mu nyika yo vaIsraeli.” Asi vaFarisi vainga varipovo. Ivona avana manera o kuramba mushamaiso ja Jesu, waro vanotangazve kumupumbha, vecinangira ngo simba raanoshandisa pa kuita mushamaiso veciti: “Anombhirimbija mabjoka ngo simba ro mutungamiriri wo [madhimoni].”—Mateu 9:33, 34.

Tevere Jesu anohwirira ku Nazareta, dhorobha rake. Wari ano vajiji vake. Sure ko gore rimwe iyena wainga akajijisa musinagoga yo dhorobha iri. Pakutanga vandhu vakashamaisika ngo zvaainanga, asi vakazopejisira vonyangajwa ndizvona. Zve vakaeja kuuraya Jesu. Wari ari kuejazve kubesera vandhu vaaigara navo kare.

Ngo mu Sabudu, iyena anohwirira musinagoga kojijisa. Vazinji vari kushamaisika vecibvunjisa kuti: “Hwakabva kwapi uzivi hwake uhu, no mixamaiso yakadaro? Andiepi, kani, mwana wo muvezi? Mai wake asipi Maria, kani; no hama jake Jakobe, Jasefa, Simoni na Juda? Majiyaya ake aaripi ese pakati pedu? Bzinobva kwapi bzese ibzi kwaari?”—Mateu 13:54-56.

Ivona vanorangarira kuti Jesu i mundhu wakatojana na ivona, veciti: ‘Takamuvona ecikura, waro angaitisa kudini Mesia?’ Ngo pamusoro pazvo ivona vanomuramba pikija no zvitatijo zvese, kubatanija no uzivi hwa Jesu no mabasa aaiita anovonesa kukura ko simba rake. Pikija ukama hwake hwecitonasa kumuziva kubvira aciri mwana mutete, asi ivona vari kutonesekavo ngo ndava yazvo. Ngo kudaro iyena anoti: “Muporofeti anonyenywa mu nyika yake basi, no pa muzi pake.”—Mateu 13:57.

Jesu anokahamara ngo kutama kwavo rutendo. Ngo kudaro aaiti nee mushamaiso umwe hawo pondhopo. Asi wakarapa basi “vatenda vaxoma ecivacanjikira nyara.”—Marco 6:5, 6.