Sesusi wakala novilinga ovinyingi monthiki oyo. Etyi vatunda kepunda-umbo lyo Dekapoli, avelula omukai ankho uvela konohanyi tyihatalama, tupu atutilisa omona wa Sailu. Mahi onthiki oyo nkhele kainepwe. Putyina Sesusi atunda meumbo lya Sailu, ovalume vevali ovamphoki avemulandula, otyo vemulaveleya okuti: “Mona wa Daviti, kala-vo nokankhenda no onthue.” — Mateusi 9:27.

Ovalume ovo vaihana Sesusi okuti: “Mona wa Daviti” mokonda ankho vetyinoñgonoka okuti Sesusi omphinga yotyipundi tya Daviti, oe o Mesiya. Ankho tyimoneka ngatyina Sesusi kahandele okuvekumbulula, tyafuile opo atale inkha mavatualako, iya avatualako umwe. Etyi Sesusi anyingila meumbo, ovalume ovo vevali navo avanyingila. Sesusi evepulu okuti: “Onwe muna onthumbi yokuti ame ndyipondola okumuhakula?” Avakumbulula nonthumbi okuti: “Enga Tatekulu.” Moluotyo, Sesusi evekuate komaiho, ati: “Mokonda muna ekolelo, omaiho enyi maapatuka.” — Mateusi 9:28, 29.

Liwa-liwa, avahimbika okumona-po! Ngetyi ankho apopila-le vakuavo, Sesusi evepopila opo etyi alinga vehetyipopie. Mahi mokonda ankho vahambukwa, aveketyiyandyanesa kononthele ambuho.

Etyi ovalume ovo vevali ankho vekahi nokuenda, ovanthu avaeta omulume otyihita-mulungu mokonda ankho una otyilulu. Sesusi emupolo otyilulu iya liwa-liwa omulume oo ahimbika okupopia. Ovanthu avahuvu notyipuka otyo, avati: “Katunemone otyipuka ngetyi mo Isilayeli.” Ova Faliseu navo ankho opo vekahi. Ankho kavapondola okuanya omahuviso Sesusi alinga, ngotyo avahimbika vali okumuhunga okuti: “Utaata ovilulu menyina liomutumini wovilulu.” — Mateusi 9:33, 34.

Etyi pakala katutu, Sesusi aende kotyilongo tyae, ko Nasalee kumwe novalongwa vae. Palamba-le enima tunde etyi Sesusi alongesila mondyuo yokufendela mo Nasalee. Ponthyimbi, ovanthu vahuvile netyi apopia, mahi konyima avanumana netyi alongesa, avahande okumuipaa. Pahe Sesusi ankho uhanda vali okukuatesako ovomunthele yae.

Motyasapalo akondoka mondyuo yokufendela na akalongese. Ovanyingi avahuvu unene, alo umwe avapulu okuti: “Opi omulume ou apola ounongo ou? Olie wemupa epondolo liokulinga omahuviso aa?” Tupu avapulu okuti: “Ou hamona wokalupindelu? Me yae ha Maliya, kavelikuai na Tiaku na Suse na Simau na Sunda? Iya onomphange mbae katuna-vo mepunda-umbo lietu? Opi apola ounongo wovipuka ovio aviho?” — Mateusi 13:54-56.

Ovanthu vasoka okuti Sesusi omunthu ukahi vala nga vakuavo. Ankho vasoka okuti: ‘Onthue tuemumona etyi ekula, oñgeni apondola okukala o Mesiya?’ Moluotyo, namphila vamona ovipuka Sesusi alinga, nounongo wae, nomahuviso alinga, kavemutavelele. Mokonda vatyiliya-le Sesusi, alo umwe ombunga yae kavemutavelele, iya Sesusi evepopila okuti: “Omuuli ukala nomunkhima ponomphangu ambuho, mahi potyilongo tyae no meumbo liae muene kakala nomunkhima.” — Mateusi 13:57.

Tyotyili, Sesusi ahuvu mokonda ankho vetupu ekolelo. Mokonda yotyo, ahalingi ehuviso nalike potyilongo opo, “wapaka vala omavoko ae kovavei vehehi evehakula.” — Maluku 6:5, 6.