Sanagew ya dakel so ginawa nen Jesus. Kayarin nambiahe manlapud Decapolis, pinaabig toy sakey ya biin manpaparala tan pinaoli toy anak nen Jairo. Balet agni asumpal so sanagew. Nen paalis lad abung nen Jairo, walay duaran lalakin bulag ya tinmumbok ed sikato tan iyeeyag da: “Anak nen David, kasian mo kami.”​—Mateo 9:27.

Diad impanawag dad si Jesus ya “Anak nen David,” imbalikas day pananisia da ya si Jesus so tomatawir na trono nen David kanian sikato so Mesias. Singa ag-iimanoen nen Jesus so itatawag da, posiblin pian nanengneng to no kasin maseet ira. Tan onman so agawa. Nen linmoob si Jesus ed abung, linmoob met so duaran laki. Tinepetan ira nen Jesus: “Manisia kayo a nayarian kon gawaen iya?” Matalek dan inyebat: “On, Katawan.” Diad saman et diniwit nen Jesus iray mata da tan inkuan to: “Unong ed pananisia yo et nagawa itan ed sikayo.”​—Mateo 9:28, 29.

Tampol ya makanengneng la ra! Tan binagaan met ira nen Jesus ya agda iyiistoryay ginawa to. Balet lapud malikeliket ira, impaamta da lanlamang ed totoo so ginawa nen Jesus.

Nen paalis la so duaran lalaki, inawit ed sikato na totoo so sakey ya lakin agmakasalita lapud aselepay demonyo. Pinapaway nen Jesus so demonyo, tan tampol ya akapansalita may laki. Mankelaw iray totoo ya kuan da: “Anggapo nin balot so anengneng ed Israel a singa onia.” Wadman met iray Fariseo. Agda nakontra iray milagron ginawa to, kanian inulit da lamet imay ibabaga dan panlalapuay pakayari nen Jesus: “Papapawayen to ray demonyo diad pakayari na samay manuley ed saray demonyo.”​—Mateo 9:33, 34.

Ag-abayag kayari na satan, pinmawil si Jesus ed baley ton Nazaret, tan kaiba to la ray disipulo to. Manga sakey taon antis na satan, nambangat ed sinagoga ra. Diad unaan et mankelaw iray totoo ed imbaga to, balet diad saginonor et agda agustoay ibabangat to kanian sinali dan pateyen. Natan et labay lamet nen Jesus ya tulongan iray kabaleyan to.

Legan na Sabaton, sikatoy pinmawil ed sinagoga pian manbangat. Dakel so mankelaw, tan intepet da: “Iner so angalaan na sayan too ed onian karunongan tan sarayan makapanyarin gawa? Agta saya imay anak na karpentero? Agta say ina to et manngaray Maria, tan agagi to ra di Santiago tan Jose tan Simon tan Judas? Tan agta kaiba tayo so amin ya agagi ton bibii? Iner sirin so angalaan to na sarayan amin?”​—Mateo 13:54-56.

Parad sikara et ordinaryon too labat si Jesus. ‘Naobserbaan mi imbaleg to,’ so naisip da, ‘kanian panon ya magmaliw a Mesias?’ Kanian anggano amayamay so ebidensya​—kaiba lay agnaparaan ya karunongan tan saray makapanyarin ginawa to​—impulisay da nin siansiay Jesus. Lapud kabkabat da, agmet anisia iray kakanayon to, kanian imbaga to: “Say sakey a propeta et napagalangan ed anggan iner nilikud ed mismon baley to tan ed mismon abung to.”​—Mateo 13:57.

Seguradon pankelawan nen Jesus no akin ya anggapoy pananisia ra. Kanian agla nanggawa na milagro diman “nilikud ed impangitapew to na saray lima to ed pigaran mansasakit tan pinaabig to ra.”​—Marcos 6:5, 6.