Hesus tabatin un dia hopi drùk. Despues ku el a bini for di Dekápolis, el a kura un señora ku tabatin sangramentu i a lanta e yu muhé di Yairo for di morto. Pero ainda e dia no a kaba. Ora e tabata bai for di kas di Yairo, dos hòmber siegu a siguié. Nan tabata grita: “Tene miserikòrdia di nos, Yu di David!”—Mateo 9:27.

E hòmbernan akí a yama Hesus “Yu di David” pasobra nan tabata kere ku Hesus ta heredero di e trono di David, pues ku Hesus tabata e Mesías. Na promé instante, a parse ku Hesus no tabata hasi kaso di nan, kisas pa wak si nan lo a perseverá. I nan a perseverá! Ora ku Hesus a drenta un kas, nan tambe a drenta su tras. Hesus a puntra nan: “Boso tin fe ku mi por habri boso wowo?” Ku konvikshon nan a kontest’é: “Sí, Señor.” E ora ei Hesus a mishi ku nan wowo i a bisa nan: “Laga sosodé ku boso konforme boso fe.”—Mateo 9:28, 29.

Mesora nan a haña nan bista. Anto, meskos ku Hesus tabata bisa otro hende, el a bisa nan pa nan no konta niun hende loke a pasa. Pero nan tabata asina kontentu ku nan a bai papia tokante Hesus den henter e region.

Ora e dos hòmbernan a bai, algun hende a trese un hòmber ku tabata muda debí ku e tabata poseí pa demoño. Hesus a saka e demoño i mesora e hòmber a kuminsá papia. E multitut a keda asombrá i a bisa: “Nunka hende a yega di mira un kos asina na Israel.” Tabatin algun fariseo tambe presente. Komo ku nan no por a nenga ku ta un milager a tuma lugá, nan a kuminsá akusá Hesus atrobe. Nan a bisa: “E ta saka demoño pa medio di e gobernante di demoño.”—Mateo 9:33, 34.

Djis despues, Hesus a bai Názarèt, kaminda el a lanta. Su disipelnan tambe a bai kuné. Kasi un aña a pasa desde ku Hesus a siña e hendenan den snoa na Názarèt. Na promé instante, e hendenan a keda masha impreshoná ku loke e tabata siña nan. Pero, despues, nan tabata busk’é pa mata pasobra su siñansanan no tabata agradá nan mas. Awor, Hesus a bolbe purba di yuda su bisiñanan di ántes.

Riba sabat, el a bai snoa pa siña e hendenan. Hopi hende a keda asombrá i tabata puntra: “Di unda e hòmber akí a sali ku e sabiduria akí i e poder pa hasi e obranan poderoso akí?” Nan a bisa: “No ta yu di e karpinté esaki ta? Su mama no yama Maria i su rumannan, Santiago, Hose, Simon i Hudas? I no ta serka nos tur su ruman muhénan ta? Di unda e hòmber akí a sali ku tur e kosnan akí?”—Mateo 13:54-56.

Pa nan, Hesus tabata un simpel hòmber ku a lanta na Názarèt. Nan lo tabata pensa: ‘Nos a mir’é krese, pues kon e por ta e Mesías?’ P’esei, apesar di tur evidensia ku tabatin, inkluso Hesus su sabiduria i obranan poderoso, nan a rechas’é. Asta su famianan, kendenan tabata konos’é bon, a nenga di kere den dje. P’esei, Hesus a bisa: “Un profeta ta risibí onor tur kaminda, ménos den su mes teritorio i den su mes kas.”—Mateo 13:57.

Hesus a keda masha strañá debí na e hendenan su falta di fe. P’esei, e no a hasi hopi milager einan; “úniko kos ku el a hasi ta pone man riba algun hende malu i kura nan.”—Marko 6:5, 6.