Yezu akhali wakuphatika kakamwe ntsiku yonsene. Pidabwerera iye ku cisa ca ku Dhekapoli, iye awangisa nkazi wakuti akhabuluka ciropa mbalamusa muli akufa mwana wankazi wa Jairo. Mbwenye iye mbadapitiriza kukhala wakuphatika. Pidabuluka Yezu panyumba ya Jairo, amuna awiri akuti akhali maboliboli antowerera mbakhuwa: ‘Mwana wa Dhavidhi, tibverenimbo ntsisi.’—Mateu 9:27.

Pidakhuwa iwo kuti ‘Mwana wa Dhavidhi,’ amuna anewa apangiza kuti akhakhulupira kuti Yezu ndiye akhafuna kukhala pa mpando wa Dhavidhi, pontho mbadakhalambo Mesiya. Pikhaoneka ninga Yezu akupwaza nkhuwo wawo, panango toera kuona khala iwo mbadapitiriza kucita pyenepi, mbwenye iwo nee asiya kukhuwa. Pidapita Yezu n’nyumba, amuna anewa awiri apitambo. Natenepa Yezu aabvundza: ‘Musakhulupira kuti ine ndinakwanisa kucita pyenepi?’ Iwo atawira na cinyindiro: ‘Inde Mbuya.’ Penepo pene Yezu akhuya maso awo mbalonga: ‘Mbapicitike kuna imwe mwakubverana na cikhulupiro canu.’—Mateu 9:28, 29.

Mwakukhonda dembuka iwo atoma kuona! Ninga pidalonga iye pa ulendo unango kuna anango, Yezu aapangambo toera aleke kulonga kuna anthu pyenepi. Mbwenye nakuti akhali akutsandzaya kakamwe, iwo alonga pyenepi mu cisa consene.

Pikhaenda amuna anewa awiri, anthu abweresa mamuna m’bodzi wakuti nee akhakwanisa kulonga thangwi akhali na dimonyo. Yezu abulusa dimonyo, penepo pene mamuna atoma kulonga. Anthu azinji adzumatirwa mbalonga: ‘Pinthu pyenepi cipo pyacitika kale mu Izraeli.’ Afarisi akhalimbo penepo. Iwo nkhabe kwanisa kukhonda pirengo pya Yezu, natenepa ampambizira pontho mukulonga kuti ‘iye asabulusa madimonyo na mphambvu za nkulu wa madimonyo.’—Mateu 9:33, 34.

Mwakukhonda dembuka, Yezu abwerera kwawo ku Nazareti pabodzi na anyakupfundzace. Cifupi na caka cibodzi, iye apfundzisa mu sinagoga ya kweneko. Pakutoma anthu akhadzumatirwa na pinthu pikhalonga iye, mbwenye mukupita kwa ndzidzi aipirwa na pipfundziso pyace mbayesera kumupha. Natenepa Yezu ayesera pontho kuphedza anthu a cisa cikakhala iye kale.

Pa ntsiku ya Sabudu, iye abwerera ku sinagoga toera kupfundzisa. Anthu azinji adzumatirwa mbalonga: ‘Kodi munthu uyu augumana kupi udziwisi unoyu, pontho mbani adampasa mphambvu toera kucita pirengo pyenepi?’ Iwo alonga: ‘Kodi iye si mwana wa mesiri wakupala matabwa tayu? Kodi mai wace nee asacemerwa Mariya, abale ace nee ndi Tiyago, Zuze, Simau na Yuda? Kodi anakazi ace onsene, nee ali na ife? Mphapo agumana kupi udziwisi na mphambvu yakucita pirengo?’—Mateu 13:54-56.

Anthu akhanyerezera kuti Yezu ndi sawasawa na iwo. Iwo anyerezera: ‘Ife taona kukula kwace, mphapo iye anakhala tani Mesiya?’ Natenepa mwakukhonda tsalakana pidzindikiro pyonsene, kuphatanizambo udziwisi ukulu wa Yezu na mabasace akudzumatirisa, iwo ankhonda. Nakuti akhala na Yezu kubulukira mu uwana wace, acibale ace nee ankhulupirambo, natenepa Yezu alonga: ‘Mprofeta asalemedzwa m’mbuto zonsene. Mbwenye nkhabe kulemedzwa ku dziko kwace na panyumba pace.’—Mateu 13:57.

Mwakukhonda penula, Yezu adzumatirwa kakamwe na kusowa kwawo cikhulupiro. Na thangwi ineyi, nee acita pirengo pizinji pyamphambvu kweneko, ‘basi ene asandzika manjace kuna anthu akucepa akuti akhabva kupha mbaawangisa.’—Marko 6:5, 6.