Bwali buzuba bwamilimo kuli Jesu. Naazwa mulweendo lwamumaanzi kuzwa kucooko ca Dekapole, waponya mukaintu wali kuciswa kalobola alimwi wabusya mwana musimbi wa Jairo. Pele buzuba tabunamana pe. Jesu naazwa kuŋanda ya Jairo, ibaalumi boofwu bobilo bamutobela, kaboongolola kuti: “Tufwide luse, O Mwana wa Davida.”—Matayo 9:27.

Kwiinda mukwiita Jesu kuti “O Mwana wa Davida,” aaba baalumi batondezya lusyomo ndobajisi lwakuti Jesu ngosimulyazina wacuuno cabwami ca Davida akuti ngonguwe Mesiya. Kuboneka kuti Jesu tanaakubikkila maano kapati kulomba kwabo, ambweni kutegwa abone naa balazumanana, pele bazumanana ncobeni. Ciindi Jesu naanjila muŋanda, baalumi aaba bamutobela mukati. Jesu wababuzya kuti: “Sena mulaalusyomo lwakuti ndilakonzya kucicita eeci?” Baingula calusyomo ategwa: “Inzya Mwami.” Mpoonya Jesu wajata meso aabo akwaamba kuti: “Kweelana alusyomo lwanu, acicitike kulindinywe.”—Matayo 9:28, 29.

Mpoonya aawo bacikonzya kubona! Mbubonya mbwaali kulailila bamwi musyule, Jesu wabaambila kuti bataambili muntu uuli woonse eeci ncaacita. Pele akaambo kakubotelwa, kuzwa waawo batalika kwaamba kujatikizya nguwe koonse-koonse.

Baalumi aaba nobaunka, bantu baleta mwaalumi umwi uutakonzyi kwaambaula akaambo kakuti unjidwe daimona. Jesu walitanda daimona, eelyo mpoonya aawo mwaalumi ooyo watalika kwaambaula. Makamu aabantu agambwa akaambo kamaleele aaya, balaamba: “Takunabwenwe cintu cili boobu mu Israyeli.” Abalo ba Farisi nkobali. Tabakonzyi kukazya kuti maleele aaya acitika, aboobo baile kwiinduluka kwaamba ncobakaambide musyule kujatikizya nkwajana nguzu Jesu nzyabelesya kucita maleele balaamba: “Utanda madaimona kwiinda munguzu zyamweendelezi wamadaimona.”—Matayo 9:33, 34.

Nokwainda buyo ciindi cisyoonto, Jesu wajokela kumunzi ookwabo wa Nazareta, lino ulaantoomwe abasikwiiya bakwe. Mwaka omwe iwainda, wakaliyiisyide mucikombelo cankuko. Kumatalikilo bantu bakazikkomanina nzyaakali kubaambila, pele kabe kaindi bakanyema akaambo kanzyaakali kuyiisya alimwi bakali kuyanda kumujaya. Lino Jesu wasoleka alimwi kugwasya basimunzi mbocakali kukkala limwi.

Mu Sabata, waunka kucikombelo alimwi kuti akayiisye. Bantu banji bagambwa, akubuzya kuti: “Ino muntu ooyu wakabujana kuli busongo oobu amilimo mipati eeyi?” Alimwi bati: “Sena ooyu tali mwana wamubezi? Sena banyina tali Mariya abanabokwabo sena tabali ba Jakobo, Josefa, Simoni a Judasi? Abacizyi bakwe boonse, sena tatuli limwi? Ino wakazijana kuli eezyi zyoonse?”—Matayo 13:54-56.

Bantu bayeeya kuti Jesu muntu-muntu buyo wamumunzi. Balaamba cakunyansya kuti, ‘Maccu! Nakomena ooyu tulimubwene, ino inga waba buti Mesiya?’ Aboobo nokuba kuti kuli bumboni bunji—kubikkilizya abusongo bwa Jesu alimwi amilimo mipati njacita—bamukaka. Akaambo kakumuzyibila Jesu, nobaba babbululu bakwe bamukaka, calo icamupa kwaamba kuti: “Musinsimi ulalemekwa koonse ccita buyo mumunzi okwabo naa kuli bamuŋanda yakwe.”—Matayo 13:57.

Masimpe Jesu wagambwa kubona mbobatajisi lusyomo. Aboobo kunyina naacita maleele aali oonse ooko “ccita buyo kubikka maanza aakwe abalwazi basyoonto akubaponya.”—Marko 6:5, 6.