Nuumala Yesu ovara miteko sinceene nihiku nne, aahikhuma oDekaapoli weiwo anvoninha awe muthiyana aayiiheya ephome, ni aamuhihimunxe awe mwaana mwaamuthiyana a Jairo. Nlelo viira vahiilale. Vaavo Yesu aakhuma awe vatthokoni va Jairo, aahitthariwa ni atthu anli yahoona, yaawo yaakhuwela ariki: “Mwana a Davidi, munimorele ikharari!”​—Matheyo 9:27.

Mwaha woomuhimya Yesu okhala “Mwana a Davidi”, alopwana ale yaahooniherya wira yaanikupali wira Yesu ookhalana ehakhi ya okilaathi ehice ya Davidi ni wira aari Mesiya. Vaakhala ntoko wira Yesu khaacalela okhuwela waya, woonasa wene aaphavela woona akhala wira yammuthipelela. Nto vaavo Yesu aakenle awe mpaani, alopwana ale anli yaahimutthara mpakha mpaani mme. Nuumala-vo, Yesu aahaakoha wira: “Munnamini wira kokhalana ikuru so wovonihani?” Awo yaahaakhula ariki: “Ayo, Pwiya!” Vano Yesu aahivara maitho aya khuhimya wira: “Mwireliwe ntoko sinaminanyu”.​—Matheyo 9:28, 29.

Tthiri moowaakuveya alopwana ale yaahipacerya woona! Yesu aahaavekela wira ahimuleele mutthu etthu ele. Masi okhala wira khiyaareere ohakalala, awo yaanimulaleya mittetthe sotheene.

Nuumala alopwana ale okhuma, atthu akina yaahimuruuha mulopwana ahaalavula mwaha woovariwa ni nlaikha nootakhala. Nuumala Yesu woomola nlaikha nne nootakhala, mulopwana ole aahipacerya olavula. Muttitthi waahitikinihiwa onahimya wira: “Khantonko wona etthu sisa mwIsarayeli!” Masi aFarisi yaari opuro yoole. Okhala wira khiyaawerya okhootta miiriirya iye, awo yaamakela ohimya wira Yesu aapaka okhaliheriwaka ni “malaikha òtakhala n’ikuru sa mulupale a malaikh’awo”.​—Matheyo 9:33, 34.

Moohipisa, Yesu aahirowa ni awiixutti awe elapo annuwa awe, oNazarethi. Waahivira mwaakha okhuma vaavale Yesu iixuttinha awe esinagoga ele. Wanipacerya atthu yaahitikinihiwa ni miteko sawe, masi ohoolo waya yaahinyoonyiwa ni soowiixuttiha sawe anaphavela omwiiva. Nto Yesu aaheererya waakhaliherya anamwaattamanani awe.

Nihiku na Saabadu, Yesu aahirowa osinagoga wira iixuttihe. Atthu anceene yaahitikinihiwa, anakohana wira: “Osuwela nno onimukhuma vai? Onwerya sai opaka mitikiniho iya?” Awo yaahihimya wira: “Ola khahiyó mwana a kalapintero? Mai awe khahiyó Maria? Nave axinn’awe khahiyó Yakobo ni Yosefe ni Simoni ni Yuda? Khi axirokor’awe khanikhala othene aya eriyari ahu? Vano, sinimukhumelela vai sothene iya?”​—Matheyo 13:54-56.

Atthu ale yoona wira Yesu aari mutthu pure. Maana ‘yahinweha innuwaka’, nto ‘vaakhala sai ohimmwaka okhala Mesiya?’ Nnaamwi yaaweha itthu iye sotheene aavara awe, ohela muhina miruku ni miiriirya, awo yaahimukhootta. Okhala wira yaanimusuwela Yesu oratteene, hata amusi awe yaahikhumuwa. Yesu aahaaleela wira: “Khavo profeta onthanyiwa, muhikhanle mulaponi mwawe ni vatthokoni vawe”.​—Matheyo 13:57.

Mwekeekhai, Yesu aahitikinihiwa mwaha wa ohaamini waya. Tivonto, khaapanke mwiiriirya mukina, masi “avoninhe aretta vakhani pahi, awixatheryaka matata”.​—Marko 6:5, 6.