Yesu fiɛɛ wawɛɛ jeha enyɔ. Anɛ e sa kaa Yesu nɛ gbɔjɔ kã nɛ e kɛ ngɛ fiɛɛe ɔ mi nɛ e jɔɔ e he lo? Dɛbi, e pee we jã kulaa. Mohu ɔ, e kpa “ma amɛ kɛ [Galilea] kɔpe ɔmɛ tsuo a nɔ. E tsɔɔ ní ngɛ kpe he ɔmɛ; e fiɛɛ sane kpakpa a nɛ kɔɔ Matsɛ Yemi ɔ he ɔ, nɛ e tsa hiɔ slɔɔtohi tsuo.” (Mateo 9:35) Níhi nɛ e ya na a ha nɛ e na kaa ni ɔmɛ a hia yemi kɛ buami. Se mɛni blɔ nɔ e maa gu kɛ ye bua mɛ?

Benɛ Yesu ngɛ fiɛɛe ɔ, e na kaa nihi fuu li anɔkuale ɔ, nɛ e sa kaa a ye bua mɛ. A ngɛ kaa jijɔhi nɛ a gbɛ fia nɛ a be hyɛli. E mi mi sã lɛ ngɛ a he nɛ e de e kaseli ɔmɛ ke: “Ngmɔ ɔ ba ní saminya; se mohu apaatsɛmɛ ɔmɛ lɛ a he pi. Lɔ ɔ he ɔ, nyɛ kpa ngmɔtsɛ ɔ pɛɛ, konɛ e wo apaatsɛmɛ blɔ kɛ ba bua ní nya.”​​—Mateo 9:37, 38.

Yesu le blɔ nɔ nɛ e maa gu kɛ ye bua mɛ. E tsɛ e bɔfo 12 ɔmɛ nɛ e gba mɛ enyɔɔnyɔ konɛ a ya fiɛɛ. E de mɛ ke: “Nyɛ ko ya ma je li a zugba ko nɔ, nɛ nyɛ ko sɛ Samaria ma ko mi hulɔ. Mohu ɔ, nyɛɛ ya Israel bi nɛ a ngɛ kaa tohi nɛ laa a ngɔ. Nyɛ ya fiɛɛ ke, ‘Hiɔwe matsɛ yemi ɔ su si ta!’”​​—Mateo 10:5-7.

Matsɛ Yemi nɛ Yesu tu he munyu ngɛ sɔlemi nɛ e tsɔɔ e kaseli ɔmɛ ngɛ e yoku ɔ nɔ fiɛɛmi ɔ mi ɔ lɛ e de mɛ ke a ya fiɛɛ ɔ nɛ. ‘Matsɛ yemi ɔ su si ta’ ejakaa Yesu Kristo, nɛ e ji Matsɛ nɛ Mawu hla a ngɛ a kpɛti. Se mɛni lɛ maa tsɔɔ kaa Matsɛ Yemi ɔ nɛ kaseli ɔmɛ ngɛ fiɛɛe ɔ nya  Matsɛ ɔ lɛ tsɔ mɛ? Yesu ha mɛ he wami kaa a tsa hiɔtsɛmɛ nɛ a tle gbogboehi si nɛ a kó he sika. Se kɛ kaseli 12 ɔmɛ ma plɛ kɛ hyɛ a he kɛɛ, nɛ jije a maa na sika ngɛ kɛ ye ní?

Yesu de e kaseli ɔmɛ kaa a kó hɛɛ he lo nya níhi kɛ ya hehi nɛ a ma ya fiɛɛ ngɛ ɔ. E de mɛ ke a kó hɛɛ sika. E he hia we nɛ a hɛɛ niye ní, tokota, loo tade. Mɛni he je? Yesu wo mɛ si ke: “Apaatsɛ ɔ, e nya ngma sa lɛ.” (Mateo 10:10) Nihi nɛ a bua maa jɔ munyu ɔ he ɔ maa hyɛ kaseli ɔmɛ a nɔ. Yesu de mɛ ke: “We tsuaa we mi nɛ nyɛ maa ya a, nyɛɛ hi lejɛ ɔ kɛ yaa si nyɛ maa je.”​​—Marko 6:10.

Yesu tsɔɔ mɛ bɔ nɛ a ma plɛ kɛ fiɛɛ Matsɛ Yemi sɛ gbi ɔ ha ngɛ wehi a mi. E de mɛ ke: “Ke nyɛ sɛ we ko mi ɔ, nyɛ nga ni ɔmɛ! Ke nihi nɛ ngɛ jamɛ a we ɔ mi he nyɛ atuu ɔ, nyɛɛ ba Mawu gbaami ha mɛ. Se ke a ha we nyɛ hɛ mi ɔ, lɛɛ nyɛɛ kpale nyɛ nya se. Ke we, loo ma ko mi bi he we nyɛ atuu, nɛ nyɛ sɛ gbi ɔ hu a bui tue ɔ, nyɛ blɛ nyɛ nane si zu ngɔ pue lejɛ ɔ, nɛ nyɛɛ je.”​​—Mateo 10:12-14.

E ma nyɛ maa ba po kaa nɔ ko nɔ ko be mɛ tue bue ngɛ ma loo kɔpe ko mi. Mɛni lɛ maa ba ma loo kɔpe kaa jã a nɔ? Yesu tsɔɔ kaa tue gblami nɛ nya wa maa ba a nɔ. E de ke: “Niinɛ, i ngɛ nyɛ dee ke, kojomi ligbi ɔ, Mawu maa gbla jamɛ a ma a tue kulaa pe Sodom kɛ Gomora tete.”​​—Mateo 10:15.