Jesus esịn idem ọkwọrọ ikọ n̄kpọ nte isua iba idahaemi. Ndi edi se enye ọduọkde odudu esisịt ndien? Ihih, utu ke oro enye “asan̄a akanade kpukpru obio ye mme obio-in̄wan̄ [Galilee], ekpep n̄kpọ ke mme synagogue mmọ onyụn̄ ọkwọrọ eti mbụk obio ubọn̄ onyụn̄ ọkọk kpukpru orụk udọn̄ọ ye kpukpru orụk ndiọkidem.” (Matthew 9:35) Se enye okụtde do anam enye ọdiọn̄ọ ke ana ẹkwọrọ ikọ ke mme obio en̄wen. Edi enye edinam emi didie?

Nte Jesus osụk asan̄ade ọkwọrọ ikọ, enye okụt mbon emi ẹkpedade Ikọ Abasi ẹn̄wam ẹnyụn̄ ẹdọn̄ esịt. Ẹma ẹfiomo mmọ, mmọ ẹnyụn̄ ẹsuana nte erọn̄ emi mînyeneke andikpeme. Mbọm mmọ anam enye, ndien enye ọdọhọ mbet esie ete: “Ke akpanikọ, idọk okpon, edi mme anamutom iwakke. Mmọdo, ẹben̄e Enyene-idọk ẹte enye osio mme anamutom ọnọ ẹdi ke idọk esie.”—Matthew 9:37, 38.

Jesus ọdiọn̄ọ se anade ẹnam. Enye okot mme apostle 12 ẹdi onyụn̄ adian mmọ iba iba, ọdọn̄ otu mbitiokiet oro ẹkekwọrọ ikọ. Enye ndien eteme mmọ se ẹdinamde ete: “Ẹkûdụk usụn̄ mme idụt, ẹkûnyụn̄ ẹdụk obio Samaria; edi, utu ke oro, ẹkam ẹka ẹbịne mme erọn̄ ufọk Israel emi ẹsopde usụn̄. Nte mbufo ẹkade, ẹkwọrọ ẹte, ‘Obio ubọn̄ heaven ke asan̄a ekpere.’”—Matthew 10:5-7.

Obio Ubọn̄ emi mmọ ẹdikwọrọde iban̄a ke Jesus akasiak ke Akam Ọbọn̄. ‘Obio Ubọn̄ oro ekpere’ sia Jesus Christ emi Abasi emekde ete akara odu do ye mmọ. Edi nso ke ẹdida  idiọn̄ọ ke mme mbet emi ke ẹdọn̄ ẹkekwọrọ ẹban̄a Obio Ubọn̄? Jesus ọnọ mmọ odudu ndinam idem ọsọn̄ mbon udọn̄ọ nnyụn̄ nnam mme akpan̄kpa ẹset. Mmọ ẹdinam kpukpru emi ke mfọn. Edi mmọ ẹdinam didie idia udia inyụn̄ ise iban̄a idemmọ?

Ke isan̄ ukwọrọikọ enye emi, Jesus ọdọhọ mbet esie ẹkûkama gold, silver, m̀mê okpoho ke ekpat okụk mmọ, ẹkukama ekpat udia, ukpụhọ ọfọn̄ m̀mê ikpaukot. Ntak-a? Jesus ọdọhọ mmọ ke “anamutom odot udia esie.” (Matthew 10:10) Mbon emi mmọ ẹdikade ikokụt, emi ẹdinyụn̄ imade etop mmọ ẹyese ẹban̄a mmọ. Jesus ọdọhọ mmọ n̄ko ete: “Ebiet ekededi eke mbufo ẹdụkde ufọk, ẹdu do tutu mbufo ẹwọn̄ọ ke ebiet oro.”—Mark 6:10.

Jesus onyụn̄ eteme mmọ nte ẹkpetọn̄ọde nneme ye owo emi mmọ ẹyomde ndikwọrọ etop Obio Ubọn̄ nnọ. Enye ọdọhọ ete: “Ke ini mbufo ẹdụkde ufọk, ẹkọm mbonufọk oro; ndien edieke ufọk oro odotde, yak emem emi mbufo ẹben̄ede ẹnọ enye odu ye enye; edi edieke ufọk oro mîdotke, yak emem mbufo afiak etiene mbufo. Ke ebiet ekededi eke owo mîdarake mbufo mînyụn̄ ikpan̄ke utọn̄ ikop ikọ mbufo, nte mbufo ẹwọn̄ọde ke ufọk m̀mê ke obio oro ẹken̄ ntan ikpat mbufo ẹbon.”—Matthew 10:12-14.

Edieke ofụri obio ẹsịnde ndikpan̄ utọn̄ n̄kop se mmọ ẹdide ndikwọrọ, nso iditịbe inọ utọ obio oro? Jesus ọdọhọ ke ẹyebiom mmọ ikpe. Kop se enye etịn̄de mi: “Ke akpanikọ ke ndọhọ mbufo nte, n̄kpọ ọyọfọn ye isọn̄ Sodom ye Gomorrah ke Usen Ikpe akan obio oro.”—Matthew 10:15.