Yesu kɛ aaafee afii enyɔ eshiɛ waa. Ani amrɔ nɛɛ, esa akɛ ekutɔ mli ní ejɔɔ ehe fioo? Dabi, Yesu efeee nakai, shi moŋ eyakpa Galilea “maji kɛ akrowai lɛ fɛɛ nɔ, ni etsɔɔ nii yɛ amɛkpeehei lɛ, ni eshiɛ Maŋtsɛyeli lɛ he sane kpakpa lɛ, ni etsa helai srɔtoi fɛɛ kɛ gbɔmɔtsoŋ gbɔjɔmɔi srɔtoi fɛɛ,” ni ekɛlɛɛ eshiɛmɔ nitsumɔ lɛ mli. (Mateo 9:35) Nɔ ni ena lɛ hã ena akɛ, esa akɛ alɛɛ shiɛmɔ nitsumɔ lɛ mli. Shi te eeefee tɛŋŋ etsu enɛ he nii lɛ?

Be ni Yesu kpaa maji lɛ anɔ lɛ, ena mɛi ni esa akɛ akɛ anɔkwale lɛ aye abua amɛ, ní ashɛje amɛmii. Amɛtamɔ gwantɛŋi ni bɛ kwɛlɔ ní afee amɛ niseniianii, ní akpoo amɛ. Emusuŋ tsɔ lɛ yɛ amɛhewɔ, ni ekɛɛ ekaselɔi lɛ akɛ: “Hɛɛ, nikpamɔ lɛ fa, shi nitsulɔi lɛ faaa. No hewɔ lɛ, nyɛkpaa nikpamɔ Nuŋtsɔ lɛ fai koni etsu nitsulɔi kɛba enikpamɔ lɛ mli.”​—Mateo 9:37, 38.

Yesu le nɔ ni baaye abua kɛtsu enɛ he nii. Etsɛ bɔfoi 12 lɛ ni ejara amɛ enyɔnyɔɔnyɔ, ni amɛfee shiɛlɔi akui ekpaa. Kɛkɛ ni ekɛ gbɛtsɔɔmɔi ni mli kã shi faŋŋ hã amɛ akɛ: “Nyɛkagbaa kɛyaa jeŋmaji lɛ agbɛ lɛ nɔ, ni nyɛkabotea Samariabii amaŋ ko mli; shi moŋ, nyɛkãa he nyɛyaa Israel we gwantɛŋi ni elaaje lɛ aŋɔɔ. Be ni nyɛyaa lɛ, nyɛshiɛa akɛ: ‘Ŋwɛi Maŋtsɛyeli lɛ ebɛŋkɛ nyɛ.’”​—Mateo 10:5-7.

Maŋtsɛyeli ni esa akɛ amɛshiɛ he sane lɛ ji nɔ ni Yesu wie he yɛ esɔlemɔ he nɔkwɛmɔnɔ lɛ mli lɛ. Nɔ hewɔ ni Yesu kɛɛ amɛshiɛ akɛ “Maŋtsɛyeli lɛ ebɛŋkɛ nyɛ” lɛ ji akɛ, no mli lɛ Yesu Kristo, mɔ ni Nyɔŋmɔ ehala akɛ ebaaye Maŋtsɛ lɛ  yɛ shikpɔŋ lɛ nɔ. Shi mɛni baatsɔɔ akɛ ekaselɔi lɛ ji Maŋtsɛyeli nɛɛ najiaŋdamɔlɔi lɛɛlɛŋ? Yesu hã amɛ hewalɛ ní amɛkɛtsa helai, ní amɛkɛtee gbohii po ashi, ni amɛbaafee enɛɛmɛi fɛɛ yaka. Belɛ, te bɔfoi lɛ aaafee tɛŋŋ amɛná amɛhiamɔ nii, tamɔ niyenii ni amɛbaaye daa gbi lɛ?

Yesu kɛɛ ekaselɔi lɛ akɛ, amɛ diɛŋtsɛ amɛkatao heloonaa nibii kɛhã shiɛmɔ ni amɛbaayashiɛ nɛɛ. Esaaa akɛ amɛŋɔɔ shika tsuru, jwiɛtɛi, loo akɔɔble amɛwoɔ amɛshika kotokui amli. Ehe ehiaaa ni amɛŋɔɔ niyenii kotoku po kɛhã gbɛfãa lɛ, ni asaŋ esaaa akɛ amɛŋɔɔ tokota loo atade kroko kɛfataa nɔ ni amɛwo lɛ he. Mɛni hewɔ? Yesu hã amɛle akɛ: “Nitsulɔ lɛ, eniyenii sa lɛ.” (Mateo 10:10) Mɛi ni kaselɔi lɛ kɛbaakpe ni baaná amɛwiemɔ lɛ he miishɛɛ lɛ baahã amɛ amɛhiamɔ nii. Yesu kɛɛ akɛ: “He fɛɛ he ni nyɛbaabote shĩa ko mli yɛ lɛ, nyɛhia jɛmɛ kɛyashi nyɛbaashi nakai he lɛ.”​—Marko 6:10.

Agbɛnɛ hu, Yesu tsɔɔ amɛ bɔ ni amɛbaafee amɛkɛ Maŋtsɛyeli sane lɛ ahã shĩatsɛmɛi lɛ. Ekɛɛ akɛ: “Kɛ́ nyɛbote shĩa lɛ, nyɛŋaa shĩabii lɛ. Kɛ́ shĩa lɛ sa lɛ, nyɛhãa toiŋjɔlɛ ni nyɛtaoɔ akɛ ená lɛ abaa enɔ; shi kɛ́ esaaa lɛ, nyɛhãa nyɛtoiŋjɔlɛ lɛ akpalea kɛbaa nyɛŋɔɔ. He fɛɛ he ni mɔ ko hereee nyɛ, loo ebooo nyɛwiemɔi lɛ atoi yɛ lɛ, kɛ́ nyɛmiishi nakai shĩa lɛ loo nakai maŋ lɛ mli lɛ, nyɛkpokpoa nyɛnaji ahe mulu lɛ nyɛshwiea.”​—Mateo 10:12-14.

Ebaanyɛ eba lɛ akɛ, maŋ muu fɛɛ loo akrowa ko baakpoo amɛsane lɛ. Kɛ́ eba lɛ nakai lɛ, te no baasa mɛi ni yɔɔ jɛmɛ lɛ ahe ehã tɛŋŋ? Yesu hã ale akɛ, fɔbuu kojomɔ ni naa wa baaba amɛnɔ. Ewie akɛ: “Lɛɛlɛŋ, miikɛɛ nyɛ akɛ, Kojomɔ Gbi lɛ nɔ lɛ, ebaafee mlɛo ehã Sodom kɛ Gomora shikpɔŋ lɛ fe nakai maŋ lɛ.”​—Mateo 10:15.