Jesus udah bebendar nginjil kira-kira dua taun. Kati tu maya iya patut belelak enda lama? Enda. Tang Jesus bebendar agi ngijil. Iya “bejalai ngagai semua nengeri enggau genturung pendiau [ba Galili]. Iya ngajar dalam balai gempuru sereta nusui Berita Manah pasal Perintah Petara. Iya mega ngeraika orang ari semua macham pemedis enggau penyakit.” (Matthew 9:35) Utai ke dipeda Jesus ngasuh iya yakin, iya patut ngemesaika agi pengawa nginjil. Tang baka ni iya deka ngereja nya?

Lebuh Jesus bejalai, iya meda orang ke begunaka tulung sereta pengelantang ati ari Petara. Sida baka bedus ti nadai orang ngibun. Sida ditekan sereta enda dikeibuhka orang. Nya alai, Jesus kasihka sida, lalu iya madah ngagai bala murid iya: “Utai ti diketau endang mayuh, tang orang ke ngetau mimit. Nya alai, minta ngagai Orang ke bempu ladang ngambika ngirum mayuh agi orang ngetau.”—Matthew 9:37, 38.

Jesus nemu nama patut digaga iya. Iya ngangauka 12 iku rasul iya lalu ngasuh sida bejalai dua iku dua iku. Lalu Jesus meri pesan tu ngagai sida: “Anang ngagai menua orang bansa bukai tauka ngagai nengeri orang Samaria. Tang kita patut ngagai orang Israel ke baka bedus ti tesat. Lebuh kita bejalai, padahka ngagai orang: ‘Perintah serega nyau semak.’”—Matthew 10:5-7.

Perintah ke ditusui sida sama enggau perintah ke disebut Jesus dalam chunto sampi. Nama reti ‘Perintah serega nyau semak’? Reti  iya, raja ke dipilih Petara iya nya Jesus Kristus bisi ba dia. Tang nama deka nyadi bukti ti nunjukka bala murid Jesus ngarika perintah nya? Jesus meri sida kuasa ngeraika orang ke sakit sereta ngidupka baru orang ke udah mati. Sida patut ngereja semua nya enggau pechuma. Nyadi baka ni bala rasul Jesus deka ngulihka utai ke diguna kena sida beridup, baka pemakai ninting hari?

Jesus madah ke bala murid, sida enda ibuh mai nama-nama utai ke diguna sida ba pejalai nginjil tu. Sida enda patut mai duit emas, pirak sereta temaga dalam kambut duit sida. Pia mega, sida enda ibuh mai kambut pemakai, baju kena besilih tauka kasut. Nama kebuah? Jesus madahka utai tu ngambika sida andal: “Orang ke bekereja endang patut nerima pemakai.” (Matthew 10:10) Orang ke nerima pesan bala murid Jesus deka meri utai ke diguna sida. Jesus madahka: “Lebuh kita datai ba siti-siti nengeri, diau ba rumah orang siku, nyentuk ke kita mupuk ari nengeri nya.”—Mark 6:10.

Jesus mega meri iring pasal baka ni bala murid iya ulih bekunsika berita pasal perintah Petara ngagai orang ke ditemu sida. Ku iya: “Lebuh kita tama ngagai rumah orang, beri jaku tabi ngagai orang ba rumah nya. Enti sida deka nerima kita, awakka sida diberekat. Tang enti sida enggai nerima kita, awakka berekat nya pulai baru ngagai kita. Enti bisi orang enggai nerima kita tauka enggai mendingka kita, tesai debu ari kaki kita lebuh kita angkat ari rumah tauka ari nengeri nya.”—Matthew 10:12-14.

Indah semua orang ba siti nengeri tauka siti genturung pendiau engka enggai nerima pesan ke dibai sida. Nama deka nyadi ngagai sida ke nulak pesan nya? Jesus madahka sida deka diakim sereta diukum enggau berat. Ku iya: “Enggau bendar aku madah ngagai kita: Lebuh Hari Pechara ila, ukum ke ninggang Sodom enggau Gomorah deka lempung agi ari ukum ke ninggang nengeri nya.”—Matthew 10:15.